iMatai ni Veigauna 21:1-30
21 E vorati ira na Isireli o Setani* qai uqeti Tevita me wiliki ira na Isireli.+
2 E mani tukuna o Tevita vei Joapi+ kei ira na nodra turaga na lewenivanua: “Ni lako moni wiliki ira na Isireli mai Pieri-sepa me yaco i Tani,+ ni qai mai tukuna vei au meu kila na kedra iwiliwili.”
3 Ia e kaya o Joapi: “Me vakalevutaka mada ga vakaduanadrau o Jiova na kedra levu na nona tamata! Kemuni na noqu turaga na tui, era sega ni dauveiqaravi kece ga ni noqu turaga o ira qo? Na cava e via cakava kina qo na noqu turaga? Na cava moni vakavuna kina mera cala na Isireli?”
4 E yaco ga na vosa ni tui vei Joapi. E mani lako o Joapi ena vanua taucoko o Isireli qai yaco yani i Jerusalemi.+
5 E solia sara o Joapi vei Tevita na kedra iwiliwili na lewenivanua era volai. Era le 1,100,000 taucoko na Isireli era vakaiyaragi ena iseleiwau, era le 470,000 na Juta era vakaiyaragi ena iseleiwau.+
6 Ia era sega ni wili vata kei ira qori o ira na Livai kei ira na Penijamini+ ni sevaka o Joapi+ na nona vosa na tui.
7 E sega sara ga ni taleitaka qori na Kalou dina mani mokuti ira na Isireli.
8 E qai kaya o Tevita vua na Kalou dina: “Au sa cala+ vakalevu niu cakava qo. Au kerea moni vosota na nona cala na nomuni dauveiqaravi+ niu cakacaka vakalialia.”+
9 E vosa o Jiova vei Kata,+ na dauraivotu nei Tevita, e kaya:
10 “Lai kaya vei Tevita, ‘Qo na ka e tukuna o Jiova: “Au solia vei iko e tolu na digidigi. Digia e dua meu vakayacora vei iko.”’”
11 E lako sara o Kata vei Tevita, e kaya vua: “Qo na ka e tukuna o Jiova, ‘Mo digia mada
12 me tolu na yabaki ni dausiga,+ se me tolu na vula mera vakarusai iko na kemu meca nira ravuti iko ena nodra iseleiwau,+ se tolu na siga me ravuti iko na iseleiwau i Jiova, io na matedewa ena vanua,+ me veivakarusai na agilosi i Jiova+ ena vanua taucoko o Isireli.’ Moni vakasamataka na ka meu lai tukuna vei koya e talai au mai.”
13 E mani kaya vei Kata o Tevita: “Sa dua na ka na noqu rarawa. Yalovinaka, meu bale ga ena liga i Jiova ni levu sara na nona yalololoma,+ meu kua ga ni bale ena liga ni tamata.”+
14 E qai vakayacora o Jiova na matedewa+ e Isireli, era bale kina e 70,000 na lewe i Isireli.+
15 E tala tale ga na Kalou dina e dua na agilosi i Jerusalemi me vakarusa, ia ni vakarau veivakarusai sara tu ga, e raica o Jiova qai rarawataka na ka ca qori,+ mani tukuna vua na agilosi e veivakarusai tiko: “Sa rauta!+ Me cegu na ligamu.” E duri tu na agilosi i Jiova volekata na rara ni butu covuata nei Orinani+ na Jepusaiti.+
16 Ni tacake o Tevita e raica sara na agilosi i Jiova ni duri tu ena maliwa ni vuravura kei na lomalagi, e ucuna tu na nona iseleiwau+ qai dodoka i Jerusalemi. E davo sara vakatoboicu ina qele+ o Tevita kei ira na qase era vakaisulutaga tu.+
17 E tukuna o Tevita vua na Kalou dina: “Sega ni o yau ga au tukuna mera wiliki na lewenivanua? O yau ga au valavala ca, au cala,+ ia na cava era cakava na sipi qo? Kemuni Jiova na noqu Kalou, yalovinaka me cudruvi au mada ga kei na vuvale i tamaqu na ligamuni, moni kua ga ni vakamatei ira na nomuni tamata.”+
18 E kaya na agilosi i Jiova vei Kata+ me tukuna vei Tevita me lako cake me vakaduria e dua na icabocabonisoro vei Jiova ena rara ni butu covuata nei Orinani na Jepusaiti.+
19 E mani lako cake o Tevita ni rogoca na vosa i Kata e cavuta ena yaca i Jiova.
20 Ni vuki o Orinani e raica sara na agilosi, eratou qai vuni na va na luvena tagane eratou tiko vata kei koya. E samu witi tiko o Orinani.
21 Ni lako cake yani vua o Tevita, e rai yani o Orinani qai raici Tevita, e biuta sara na rara ni butu covuata, e tekicuva vei Tevita ni tara na matana na qele.
22 E kaya o Tevita vei Orinani: “Volitaka* vei au na vanua ni butu covuata meu tara kina e dua na icabocabonisoro vei Jiova. Volitaka vei au ena kena isau taucoko me mudu kina na mate levu vei ira na lewenivanua.”+
23 Ia e kaya vei Tevita o Orinani: “Taura me nomuni, me cakava na noqu turaga na tui na ka e vinaka vua.* Au sa vakarautaka na bulumakau me isoro kama, na iyaya ni samusamu+ me buka, kei na witi me isoro kakana. Au sa solia taucoko.”
24 Ia e kaya vei Orinani o Tui Tevita: “Sega, au na volia ena kena isau taucoko, niu na sega ni kauta na ka e nomu meu solia vei Jiova se cabora na isoro kama e sega ni saumi.”+
25 E mani solia o Tevita vei Orinani e 600 na sikeli* koula e vakarautaki na kena bibi, me isau ni vanua oya.
26 E tara sara e kea o Tevita e dua na icabocabonisoro+ vei Jiova, e cabora na isoro kama kei na isoro ni veiyaloni, e masuti Jiova qai vosa vua o koya ena bukawaqa+ mai lomalagi ena isoro kama ena dela ni icabocabo ni isoro kama.
27 E qai vakarota na agilosi+ o Jiova me biuta lesu na nona iseleiwau ina kena taga.
28 Ena gauna oya ni raica o Tevita ni sauma tiko mai o Jiova na ka e kerea ena rara ni butu covuata nei Orinani na Jepusaiti, e mani vakacaboisoro tiko ga e kea.
29 Ia na valeniveitavaki i Jiova e tara o Mosese ena vanua talasiga kei na icabocabo ni isoro kama e tiko ena gauna oya ena vanua cecere mai Kipioni.+
30 E sega ni lako rawa kina o Tevita me taroga na Kalou ni domobulataka na iseleiwau ni agilosi i Jiova.
iVakamacala e ra
^ Se rawa ni, “dauveivorati.”
^ Ipe., “Solia.”
^ Ipe., “ka e vinaka e matana.”
^ Dua na sikeli e tautauvata kei na 11.4 na karamu (0.367 na onisi). Raica na iKuri B14.
