iMatai ni Veigauna 27:1-34
-
Vakailesilesi era qarava na tui (1-34)
27 Qo na kedra iwiliwili na Isireli, o ira na turaga ni mataqali, o ira na turaga ni vica vata na udolu kei na vica vata na drau,+ kei na nodra vakailesilesi era qarava na tui+ ena ka kece me baleta na iwasewase era lako mai ra qai lako yani e veivula, ena vula kece ga ni yabaki, era le 24,000 ena dua na iwasewase.
2 E liutaka na imatai ni iwasewase ena imatai ni vula o Jasopiami+ na luvei Sapitieli, era le 24,000 ena nona iwasewase.
3 Vei ira na luvei Feresi,+ o koya ga e liutaki ira na turaga kece ni veiwasewase era lesi mera veiqaravi ena imatai ni vula.
4 E lewa o Totei+ na luvei Aoa+ na nona iwasewase e lako ena ikarua ni vula, e liutaka o Mikiloci, era le 24,000 ena nona iwasewase.
5 Na turaga ni ikatolu ni iwasewase e lesi me veiqaravi ena ikatolu ni vula o Penaia+ na luvei Jioiata+ na iliuliu ni bete, era le 24,000 ena nona iwasewase.
6 O Penaia qo e dua na turaga qaqa vei ira na le tolusagavulu, e lewai ira na le tolusagavulu, e liutaka na nona iwasewase o Amisapati na luvena tagane.
7 Na kena ikava, ena ikava ni vula o Asaeli+ na taci Joapi,+ e taravi koya o Sepataia na luvena, era le 24,000 ena nona iwasewase.
8 Na ikalima ni turaga ena ikalima ni vula o Samuci na Isira, era le 24,000 ena nona iwasewase.
9 Na kena ikaono, ena ikaono ni vula o Aira+ na luvei Ikesi na kai Tikoa,+ era le 24,000 ena nona iwasewase.
10 Na kena ikavitu, ena ikavitu ni vula o Ilesi+ na kai Peloni vei ira na Ifireimi, era le 24,000 ena nona iwasewase.
11 Na kena ikawalu, ena ikawalu ni vula o Sipikei+ na luvei Usa, na luvei Sira,+ era le 24,000 ena nona iwasewase.
12 Na kena ikaciwa, ena ikaciwa ni vula o Epieseri+ na kai Anacoci+ vei ira na Penijamini, era le 24,000 ena nona iwasewase.
13 Na kena ikatini, ena ikatini ni vula o Merei+ na kai Nitofa e luvei Sira,+ era le 24,000 ena nona iwasewase.
14 Na kena ika11, ena ika11 ni vula o Penaia+ na kai Piraconi vei ira na Ifireimi, era le 24,000 ena nona iwasewase.
15 Na kena ika12, ena ika12 ni vula o Elitai na kai Nitofa mai vei Ocinieli, era le 24,000 ena nona iwasewase.
16 Qo na nodra turaga ni yavusa na Isireli: Vei ira na Rupeni e nodra turaga o Eliesa na luvei Sikiri, vei ira na Simione e nodra turaga o Sefataia na luvei Meaka,
17 vei ira na Livai o Esapaia na luvei Kemueli, vei ira na Eroni o Setoki,
18 vei ira na Juta o Ilaiu+ e dua na tuakai Tevita, vei ira na Isakari o Omirai na luvei Maikeli,
19 vei ira na Sepuloni o Isimaia na luvei Opetaia, vei ira na Nafitalai o Jirimoci na luvei Asirieli,
20 vei ira na Ifireimi o Osia na luvei Asasaia, vei ira na veimama ni yavusa i Manasa o Joeli na luvei Petaia,
21 vei ira na veimama ni yavusa i Manasa mai Kiliati o Ito na luvei Sakaraia, vei ira na Penijamini o Jesieli na luvei Apineri,+
22 vei ira na Tani o Esareli na luvei Jiroame. Qo o ira na turaga ni yavusa e Isireli.
23 E sega ni wiliki ira na yabaki 20 lako sobu o Tevita, ni yalataka o Jiova ni na vakalevutaki Isireli me vaka na kalokalo ni lomalagi.+
24 E tekivu wiliwili o Joapi na luvei Seruaia ia e sega ni vakaotia, e qai cudruvi* Isireli na Kalou ena vuku ni ka qo,+ mani sega ni volai na iwiliwili ena ivolatukutuku ni nona gauna o Tui Tevita.
25 E lewa na valeniyau ni tui+ o Asimavece na luvei Etieli. E lewa o Jonacani na luvei Usaia na lololo ena were, ena koro lelevu, ena koro lalai, kei na valececere.
26 E lewai ira na cakacaka ena iteitei kei ira na teivaka na qele o Esirai na luvei Kilupi.
27 E lewa na loganivaini o Semeai na kai Rama, e lewa na ka kece ena loganivaini kei na vale ni waini o Sapiti na kai Sifimoci.
28 E lewa na veiolive kei na vunilolo+ ena Sefila+ o Peali-anani na kai Keteri, e lewa na vakarautaki ni waiwai o Joasi.
29 E lewa na qelenimanumanu era kana voli e Saroni+ o Sitirei na kai Saroni, e lewa na qelenimanumanu ena buca o Safati na luvei Atilai.
30 E lewa na kameli o Opili na Isimeli, e lewa na asa* o Jetaia na kai Meronoci.
31 E lewa na qelenisipi o Jasisi na Akiri. Qo kece o ira na turaga era lewa na iyau nei Tui Tevita.
32 O Jonacani+ na vugoi Tevita e daunivakasala, e turaga yalomatua, e vunivola, o Jieli na luvei Akimoni e qaravi ira na luvena tagane na tui.+
33 E nona daunivakasala na tui o Etofeli,+ o Usai+ na kai Ariki e nona itokani* na tui.
34 E taravi Etofeli o Jioiata na luvei Penaia+ kei Epaiaca,+ o Joapi+ e turaga ni nona mataivalu na tui.
