iMatai ni Veigauna 29:1-30
29 E kaya o Tui Tevita ina ivavakoso taucoko: “Na luvequ o Solomoni e digi koya na Kalou,+ e se gone, e lailai na ka e kila,*+ ia e levu tu na cakacaka, e sega ni valenisoro* ni tamata, e nei Jiova ga na Kalou.+
2 Au vakarautaka na ka qori ena noqu kaukaua kece me tara kina na vale ni noqu Kalou, au vakarautaka na koula me buli kina na iyaya koula, na siliva me buli kina na iyaya siliva, na kopa me buli kina na iyaya kopa, na kaukamea me buli kina na iyaya kaukamea,+ na kau+ me buli kina na iyaya kau, na vatu onikisa, na vatu e dregati ena ibulu kaukaua, na vatu lalai duiroka, na vatutalei kece, kei na levu sara na vatu vulavula.*
3 Niu marautaka na vale ni noqu Kalou,+ au solia tale ga kina na koula kei na siliva au taukena+ ina vale ni noqu Kalou me ikuri ni ka kece au vakarautaka me baleta na vale tabu,
4 e wili kina e 3,000 na taledi* na koula ni Oferi,+ kei na 7,000 na taledi siliva savasava me boro kina na lalaga ni vale,
5 na koula me buli kina na iyaya koula, na siliva me buli kina na iyaya siliva, kei na cakacaka kece era cakava e ligadra na matai. Ia qo o cei e via lako mai me soli iloloma e ligana vei Jiova?”+
6 Era mani bole mera soli ka na turaga ni mataqali nei tamadra, o ira na turaga ni yavusa e Isireli, o ira na turaga ni vica vata na udolu kei na vica vata na drau,+ vaka kina o ira na turaga era qarava na ka me baleta na tui.+
7 Era solia ina cakacaka ni vale ni Kalou dina: e 5,000 na taledi koula, e 10,000 na deriki,* e 10,000 na taledi siliva, e 18,000 na taledi kopa, kei na 100,000 na taledi kaukamea.
8 O ira kece e tu vei ira na vatutalei era solia ina valeniyau ni vale i Jiova, e lewa tiko o Jieli+ na kawa nei Kerisoni.+
9 Era marautaka na lewenivanua na nodra soli ka nira soli ka mai vu ni lomadra vei Jiova,+ e marautaka tale ga vakalevu o Tevita na tui.
10 E mani vakavinavinakataki Jiova o Tevita e matadra kece na ivavakoso. E kaya o Tevita: “Moni vakavinavinakataki mada ga o kemuni Jiova na Kalou ni Isireli na tamai keimami, me tawamudu.
11 Kemuni ga Jiova oni cecere,+ oni kaukaua,+ oni lagilagi, oni uasivi, oni rokovi,+ ni nomuni na ka kece mai lomalagi kei vuravura.+ E nomuni ga Jiova na matanitu.+ Oni cecere oni ulu ni ka kece.
12 E vu mai vei kemuni na iyau kei na lagilagi,+ oni lewa na ka kece,+ e tiko e ligamuni na kaukaua+ kei na qaqa,+ e rawarawa e ligamuni moni vakalevulevuya+ na tamata kece, moni vakaukauataki ira.+
13 Ia qo na neimami Kalou, keimami vakavinavinakataki kemuni, keimami vakacaucautaka na yacamuni lagilagi.
14 “O cei o yau kei ira na noqu tamata me rawarawa kina neimami soli ka va qo ena yalovinaka? Ni vu vei kemuni na ka kece, e nomuni ga na ka keimami solia vei kemuni.
15 Ni keimami vulagi e matamuni, keimami kaitani me vakataki ira kece na tukai keimami.+ Na neimami siga e vuravura e vaka na yaloyalo,+ e sega ni dei.
16 Kemuni Jiova na neimami Kalou, e vu vei kemuni na iyau levu kece keimami vakarautaka tu qo me tara kina na nomuni vale ena yacamuni tabu, e nomuni kece ga.
17 Au kila vinaka kemuni na noqu Kalou ni oni raica na loma ni tamata,+ oni vinakata na yalodina.*+ Ena dina ni lomaqu au solia kina ena yalo e vinakata na ka kece qo, au marau tale ga vakalevu niu raici ira na nomuni tamata era tu qo mera soli ka vei kemuni ena yalovinaka.
18 Kemuni Jiova na Kalou i Eparama, Aisake kei Isireli na tukai keimami, moni vakadeitaka na rai kei na nanuma qo e lomadra na nomuni tamata me tawamudu, moni dusimaka na lomadra vei kemuni.+
19 Moni vukei Solomoni na luvequ me taucoko na lomana+ me rawa ni muria na nomuni ivakaro,+ na nomuni veivakadreti, kei na nomuni lawa, me vakayacora na ka kece qo, me tara tale ga na valenisoro* au vakarautaka na kena iyaya kece.”+
20 E qai kaya o Tevita vei ira na ivavakoso kece: “Moni vakavinavinakataki Jiova na nomuni Kalou.” E mani vakavinavinakataki Jiova na Kalou i tukadra na ivavakoso taucoko, era cuva ra qai davo vakatoboicu vei Jiova kei na tui.
21 Era cabora tiko ga na isoro vei Jiova, era cabora na isoro kama+ vei Jiova ena siga tarava, e 1,000 na luvenibulumakau tagane, e 1,000 na tamanisipi, e 1,000 na lami tagane kei na nodra isoro livi,+ era cabora e levu sara na isoro me baleti ira kece na Isireli.+
22 Era kana tiko ga, era gunu ena mata i Jiova ena siga oya ena marau levu,+ era qai buli Solomoni na luvei Tevita me tui ena ikarua ni gauna, era lumuti koya ena mata i Jiova me iliuliu,+ kei Setoki me bete.+
23 E dabe o Solomoni ena idabedabe vakaturaga+ i Jiova me tui me sosomitaki Tevita na tamana, e vinaka sara na nona veiliutaki, era talairawarawa kece vua na Isireli.
24 O ira kece na turaga,+ o ira na tagane qaqa+ kei ira kece na luvei Tui Tevita+ era vakamalumalumu vei Solomoni na tui.
25 E vakalevulevui Solomoni vakalevu o Jiova e matadra kece na Isireli, e solia vua na vakarokoroko vakatui se sega ni bau caka vua e dua na tui Isireli e liu vua.+
26 E veiliutaki e Isireli taucoko o Tevita na luvei Jese,
27 e 40 na yabaki na dede ni nona veiliutaki e Isireli. E 7 na yabaki+ e veiliutaki kina e Epironi, e 33 na yabaki e veiliutaki kina e Jerusalemi.+
28 E qai mate ni sa qase sara,+ e marautaka nona bula balavu, na nona iyau kei na nona lagilagi, e veiliutaki sara o Solomoni na luvena me sosomitaki koya.+
29 Na itukutuku me baleti Tui Tevita, na kena itekivu ina kena iotioti e volai ena vosa i Samuela na dauraivotu, na vosa i Necani+ na parofita, kei na vosa i Kata+ na dauraivotu,
30 vaka kina na nona veiliutaki vakatui, na nona kaukaua, kei na ka e yaco ena nona gauna, e Isireli, kei na veimatanitu kece e volekata.
iVakamacala e ra
^ Se “e malumalumu.”
^ Se “ni koronivalu, valenitui.”
^ Se “na alapasita.”
^ Dua na taledi e 34.2 na kilokaramu (1,101 na onisi). Raica na iKuri B14.
^ Na deriki e dua na ilavo koula ni Perisia. Raica na iKuri B14.
^ Se “na ivalavala dodonu.”
^ Se “koronivalu, valenitui.”
