iMatai ni Veigauna 5:1-26
5 Qo o ira na tagane na luvei Rupeni+ na ulumatua nei Isireli. E ulumatua o koya, ia ni vakadukadukalitaka* na idavodavo nei tamana,+ e soli kina na nona dodonu vakaulumatua vei rau na luvei Josefa+ na luvei Isireli, mani sega ni wili o koya ena iyatukawa e nodra na dodonu vakaulumatua.
2 E cecere vei ira na tacina o Juta,+ e vu mai vua o koya me veiliutaki,+ ia e nei Josefa na dodonu vakaulumatua.
3 O ratou na tagane na luvei Rupeni na ulumatua nei Isireli o Enoke, o Palu, o Esironi, kei Kamai.+
4 O ratou na tagane na luvei Joeli o Semaia, o Koki, o Semeai,
5 o Maika, o Riaia, o Peali,
6 kei Piera, e dua na nodra turaga na Rupeni e kauta vakavesu o Tui Tikilaci-pilineseri+ e Asiria.
7 O ira na tacina ena nodra mataqali me vaka e laurai ena itukutuku ni nodra vuvale, e kena iliuliu o Jaeli, o Sakaraia,
8 kei Pela na luvei Asasi na luvei Sema na luvei Joeli, e tiko e Aroeri+ me yaco sara i Nipo kei Peali-mioni.+
9 Ni levu na nodra manumanu ena vanua o Kiliati,+ e mani tiko o koya ena tokalau me yaco sara ina icurucuru ena vanua talasiga ena Uciwai na Uferetisi.+
10 Ena gauna i Saula era valuti ira na Akiri, era vakadrukai ira, era mani tiko ena nodra valelaca ena vanua taucoko ena tokalau kei Kiliati.
11 O ira na kawa i Kata era tiko volekati ira ena vanua o Pasani me yaco sara i Salika.+
12 E nodra iliuliu o Joeli, o Safami na kena ikarua, o Jenai kei Safati mai Pasani.
13 O ratou na wekadratou ena mataqali nei tamadratou o Maikeli, o Mesulame, o Sipa, o Jorei, o Jakani, o Sia, kei Iperi, eratou le vitu kece.
14 Qori o ratou na luvei Epaieli na luvei Urai, na luvei Jaroa, na luvei Kiliati, na luvei Maikeli, na luvei Jisisei, na luvei Jato, na luvei Pusa.
15 O Ei na luvei Apitieli, na luvei Kuni, na turaga ni mataqali nei tamadra.
16 Era tiko e Kiliati,+ e Pasani+ kei na kena tauni lalai,* kei na vanua veico kece kei Saroni me yaco sara ina kena iyalayala.
17 Era volai kece ena ivola ni iyatukawa ena gauna nei Tui Jocame+ e Juta kei na gauna nei Tui Jerepoami*+ e Isireli.
18 O ira na Rupeni, o ira na Kata, kei na veimama ni yavusa i Manasa, era le 44,760 na tamata qaqa era lewe ni nodra mataivalu era taura na isasabai kei na iseleiwau, era vakaiyaragi ena dakaititi* ra qai vulica na ivalu.
19 Era valuti ira na Akiri,+ o ira na Jeturi, o ira na Nefisi,+ kei ira na Notapi.
20 Era vukei nira valuti ira, era mani soli kina na Akiri kei ira kece na tiko vata kei ira e ligadra, nira masuta na Kalou me vukei ira ena ivalu qai rogoca nodra vakamamasu nira nuitaki koya.+
21 Era mani kauta na nodra manumanu, e 50,000 na kameli, e 250,000 na sipi, kei na 2,000 na asa, vaka kina e 100,000 na tamata.
22 Levu era balemate, ni nona na Kalou dina na ivalu.+ Era tiko ena nodra vanua me yacova na gauna era kau kina vakavesu.+
23 Era tiko na veimama ni yavusa i Manasa+ ena vanua mai Pasani me yaco i Peali-erimoni, e Siniri, kei na Ulu i Erimoni.+ Era lewe levu sara.
24 Qo o ira na turaga ni mataqali nei tamadra: o Iferi, o Isai, o Ilieli, o Asirieli, o Jeremaia, o Otevaia, kei Jatieli, era tamata qaqa, era rogo, era turaga ni mataqali nei tamadra.
25 Ia era tawayalodina vua na Kalou nei tukadra, era lai saqamua kei na nodra kalou na lewe ni veivanua+ e vakawabokotaka na Kalou mai matadra.
26 E mani uqeta na Kalou na loma i Tui Puli e Asiria+ (oya o Tui Tikilaci-pilineseri+ e Asiria) me kauti ira vakavesu na Rupeni, o ira na Kata, kei na veimama ni yavusa na Manasa i Eyala, Apori, Ara, kei na uciwai na Kosani+ mera tiko kina me yacova na siga qo.
iVakamacala e ra
^ Se “beca.”
^ Se “wavokita.”
^ Qo o Jerepoami na iKarua.
^ Ipe., “butuka na dakaititi.”
