iKarua ni iVola Vei Ira mai Korinica 4:1-18
4 Oya na vuna keitou na sega ni soro kina ena cakacaka vakaitalatala e soli vakayalololoma vei keitou.
2 Ia keitou sa biuta na veidabui kece e dodonu me madualaki, keitou sega ni lawaki, se vakawaicalataka na vosa ni Kalou,+ keitou vakavotuya ga na dina. Koya gona ena mata ni Kalou,+ keitou ivakaraitaki vinaka kina ena nodra lewaeloma na tamata kece.
3 Ke tabonaki na itukutuku vinaka keitou kacivaka, e tabonaki ga vei ira era vakarau vakarusai,
4 ni vakamatabokotaka na nodra vakasama na kalou ni veika vakavuravura qo,*+ me kua ni cilavi ira+ kina na tawavakabauta+ na itukutuku vinaka lagilagi me baleti Karisito, na iyaloyalo ni Kalou.+
5 Keitou sega ni vunautaki keitou, keitou vunautaki Jisu Karisito ga ni Turaga, e lesi keitou tale ga o Jisu me keitou nomuni dauveiqaravi.
6 Ni Kalou ga e tukuna: “Me cila na rarama mai na vanua butobuto,”+ e sa cilava gona na lomada+ na kilaka lagilagi me baleta na Kalou ena mata i Karisito.
7 Ia e tiko ena saqa qele+ qo e dua na iyau talei,+ me laurai kina vei keitou na kaukaua e uasivia na kaukaua ni tamata, ya na kaukaua ni Kalou, e sega ni neitou.+
8 Keitou sogolati ena sala kece, ia keitou se veitosoyaki rawa ga, keitou veilecayaki, ia keitou se dro rawa ga,*+
9 keitou vakacacani, ia keitou sega ni vakanadakui,+ keitou vakabalei, keitou sega ga ni vakarusai.+
10 Me vakataki Jisu, keitou* dau sotava ena veivanua na ka rarawa+ era vakavuna eso e rawa ni vakavumate, me vakavotui kina ena yago i keitou na bula i Jisu.
11 O keitou na bula keitou dau voleka sara ni mate+ ena vuku i Jisu, me vakavotui kina ena yago i keitou na bula i Jisu.
12 O koya gona, e cakacaka vei keitou na mate, ia na bula vei kemuni.
13 E laurai vei keitou na igu ni vakabauta e tautauvata kei na ka e volai: “Na noqu vakabauta au vosa kina,”+ na neitou vakabauta tale ga keitou vosa kina,
14 ena neitou kila ni o koya e vakaturi Jisu ena vakaturi keitou vata kei Jisu, ena qai kauti keda vata vua.+
15 E caka na ka kece qo ena vukumuni, me tubu kina na loloma levu e soli wale ena vuku ni nodra vakavinavinaka e levu, qo me vakalagilagi kina na Kalou.+
16 O koya gona eda sega ni soro, de na yavu tiko yani na tamata e sau, ia e vakavoui tiko e veisiga na tamata e loma.
17 E dina ni lekaleka qai mamada ga na rarawa e sotavi, ia ena kauta mai vei keda na lagilagi e bibi cake sara qai tawamudu,+
18 nida sega ni raica tiko ga na ka e rairai, na ka ga e sega ni rairai.+ Ni lekaleka ga na ka e rairai, ia na ka e sega ni rairai e tawamudu.
iVakamacala e ra
^ Se “ni itabagauna qo.” Raica na iVakamacala ni Vosa.
^ Se rawa ni, “ia keitou sega ni yalolailai.”
^ Kir., “ena yago i keitou.”
