iKarua ni Pita 1:1-21
1 O yau o Saimoni Pita, au dauveiqaravi, au yapositolo i Jisu Karisito, vei kemuni eda vakalougatataki vata meda taukena na vakabauta, ena vuku ni yalododonu ni noda Kalou, kei na iVakabula o Jisu Karisito.
2 Me vakalevutaki mada ga vei kemuni na loloma soli wale kei na vakacegu e rawati mai na kilaka dodonu+ me baleta na Kalou, kei Jisu na noda Turaga,
3 ni kaukaua ni Kalou e solia vei keda na ka kece me baleta na bula kei na noda qaravi Kalou, ena vuku ni kilaka dodonu me baleti koya e kacivi keda+ ena nona lagilagi kei na nona vinaka.
4 Ena vuku ni ka kece qo, e vakarautaka wale kina vei keda o koya na vosa ni yalayala e talei qai uasivi,+ meda kabula vakayalo me vaka na Kalou,+ nida sa dro tani mai na veika torosobu ni vuravura qo e veiuqeti kina na garovi ni ka ca.
5 Ena vuku ni ka kece qo, moni vakavinavinaka vua ena nomuni saga vagumatua+ me vakaikuritaki na nomuni vakabauta ena ivalavala vinaka,+ na nomuni ivalavala vinaka ena kilaka,+
6 na nomuni kilaka ena nomuni lewa vinaka,+ na nomuni lewa vinaka ena vosota, na nomuni vosota ena nomuni qarava na Kalou,+
7 na nomuni qarava na Kalou ena nomuni veilomani vakaveitacini, kei na nomuni veilomani vakaveitacini ena loloma.+
8 Ke oni vuabale ena ka kece qo, oni na sega ni vakasavuliga se tawavua+ ena nomuni kila na ka dina me baleta na noda Turaga o Jisu Karisito.
9 E mataboko o koya e sega ni laurai tiko vua na ka kece qo, e sega ni via raica na rarama,+ e guilecava tale ga na nona vakasavasavataki mai na ivalavala ca+ e vakayacora ena gauna sa oti.
10 O koya gona raveitacini, moni saga vagumatua moni yalodina, moni okati tiko ga kina kei ira e kaciva+ qai digitaka na Kalou, ke oni vakayacora tiko ga na ka kece qo, oni na sega vakadua ni bale.+
11 Io ena nomuni vakayacora qori, oni na qai vakalougatataki vakalevu, oni na vakadonui moni curu ina Matanitu tawamudu+ ni noda Turaga kei na iVakabula o Jisu Karisito.+
12 Qo na vuna au dau tu vakarau kina meu taleva na ka kece qo, e dina ni oni kila vinaka, oni dei tale ga ena ka dina e laurai tiko vei kemuni.
13 Ia au raica ni dodonu meu vakayadrati kemuni ena noqu taleva+ qori ena gauna kece au tiko kina ena valeniveitavaki qo,+
14 niu sega ni lecava ni sa vakarau biu laivi na noqu valeniveitavaki, me vaka e vakaraitaka vei au na noda Turaga o Jisu Karisito.+
15 Au na solia noqu igu taucoko ena gauna qo, niu vinakata moni nanuma tiko ga na ka kece qo ni oti noqu biubiu.
16 Na neitou vakavulici kemuni me baleta nona kaukaua kei na gauna me sa tiko kina na noda Turaga o Jisu Karisito e sega ni yavutaki ena italanoa lasu e buli vakailawaki, ia keitou a vakadinadinataka sara ga na nona cecere.+
17 E vakacerecerei koya na Kalou na Tamada qai vakalagilagi koya, ena gauna e tukuna kina o koya e lagilagi: “Qo na Luvequ lomani, au sa vakadonuya.”+
18 Io keitou rogoca na vosa qo ni voqa mai lomalagi ni keitou a tiko vata kei koya ena ulunivanua tabu.
19 O koya gona, sa qai dei ga na noda nuitaka na vosa ni parofisai, e vinaka tale ga ni oni kauaitaka tiko ga, me vaka na cina+ e ramase ena vanua butobuto, (me yacova ni kida na mataka qai cabe na ivolasiga)+ e lomamuni.
20 Oni sa kila oti ni sega ni yavutaki ena vakasama ni tamata na parofisai ena iVolatabu.
21 Ni sega ni bau dua na parofisai e vu ena lewa ni tamata,+ e tukuna ga na tamata na ka e vinakata na Kalou ena veiuqeti ni yalo tabu.+
