iKarua ni Pita 3:1-18
3 Kemuni na wekaqu lomani, qo na ikarua ni noqu ivola vei kemuni, e vaka ga na kena imatai, niu via vakayadrata na nomuni vakasama ena noqu taleva eso na ka,+
2 moni nanuma na ka era tukuna e liu na parofita yalosavasava kei na ivunau ni Turaga, na iVakabula, era tukuna na nomuni yapositolo.
3 Moni kila mada e liu qo, nira na lako mai ena iotioti ni veisiga na dauveivakasewasewani ena nodra veivakasewasewani, era cakava ga na ka era vinakata+
4 ra qai kaya: “I vei na ka a yalataka? E sa tiko dina o koya?+ Mai na gauna era moce kina na tukada, oya nira sa mate, e duadua tu ga na ka kece me vaka mai na gauna e buli kina na vuravura.”+
5 Nira nakita mera lecava na tikina qo, ni vosa ga ni Kalou+ e tiko kina na lomalagi ni gauna makawa kei na vuravura, e votu mai wai na qele mamaca, ena maliwa tale ga ni wai,
6 ena vuku gona ni ka kece qo e vakarusai kina na vuravura ena gauna ya ni luvuci ena wai.+
7 Ia ena vosa vata ga ya e maroroi kina na lomalagi kei na vuravura ni gauna qo me qai vakamai, e vakalaivi tale ga me yacova na siga ni lewa mera vakarusai kina o ira na sega ni doka na Kalou.+
8 Ia kemuni na wekaqu lomani, moni kua ni vakalecalecava na tikina qo, ni dua na siga vei Jiova* e tautauvata kei na duanaudolu na yabaki, na duanaudolu na yabaki e tautauvata kei na dua na siga.+
9 E sega ni dau berabera ni vakayacora nona yalayala+ o Jiova* me vaka era nanuma eso ni berabera, ia e vosoti kemuni ga ni sega ni vinakata me rusa e dua, e vinakata ga moni veivutuni kece.+
10 Ia ena lako mai na siga i Jiova*+ me vaka na daubutako,+ ena takali kina vakasauri na lomalagi,+ ena vadugu vaka na kurukuru na kena rorogo, ena waicala tale ga na ka era tu e lomalagi kei vuravura, ena vakatakilai* o vuravura kei na ka e tu kina.+
11 Nira na vakawaicalataki na ka kece qo, ni vakasamataka vinaka na ivalavala moni muria moni savasava kina, moni qarava tale ga na Kalou,
12 ni oni waraka qai namaka tiko* me yaco mai na siga i Jiova,*+ ena vakarusai kina na lomalagi ena bukawaqa,+ era na vakawaicalataki tale ga ena levu ni katakata na veika kece e lomalagi kei vuravura!
13 Ia eda waraka na lomalagi vou kei na vuravura vou me vaka na nona yalayala,+ era na tiko kina na yalododonu.+
14 O koya gona kemuni na wekaqu lomani, ni oni waraka tiko na ka kece qo, ni cakava nomuni vinaka taucoko moni kua ni tauvi duka, moni kua ni vakamelei rawa, moni bula veiyaloni tale ga.+
15 Kena ikuri, moni okata na nona dauvosota na noda Turaga me sala eda vakabulai kina, me vaka e vola tale ga vei kemuni na tacida lomani o Paula ena vuku e soli vua,+
16 ni dau cavuta na ka kece qo ena nona ivola kece. Ia e dau okati kina eso na ka e kilakilai dredre, era dau qai vakayagataka vakatani o ira na sega ni vuli kei ira na malumalumu me vaka era dau cakava ena vo ni iVolatabu, ia era na rusa ga kina.
17 O koya gona kemuni na wekaqu lomani, ni oni sa kila rawa qo, moni qarauna de oni vakasesei vata kei ira ena nodra veivakacalai na dau murilomadra, oni qai sega ni tudei.+
18 Me kua sara, ia me sobuti kemuni mada ga vakalevu na loloma soli wale kei na nomuni kila na noda Turaga, na noda iVakabula o Jisu Karisito. Me vakalagilagi mada ga o koya ena gauna qo me tawamudu. Emeni.
