iKarua ni Samuela 13:1-39
13 E dua tiko na ganei Apisalome na luvei Tevita, na yacana o Tema,+ e goneyalewa totoka, e qai domoni koya o Aminoni+ na luvei Tevita.
2 E rarawa vakalevu o Aminoni mani tauvimate ena vuku i ganena o Tema, ni se goneyalewa, e rairai dredre vei Aminoni me cakava vua e dua na ka.
3 E dua na itokani i Aminoni na yacana o Jionatapi,+ na luvei Simea,+ na tuakai Tevita, ia e turaga qaseqase dina o Jionatapi.
4 E mani kaya vua: “O iko na luvenitui, na cava o dau rarawa kina ena veimataka? Tukuna mai vei au.” E kaya vua o Aminoni: “Au domoni Tema tiko na ganei+ Apisalome na taciqu.”
5 E qai kaya vua o Jionatapi: “Davo ena nomu idavodavo me vaka ga ni o tauvimate. Ni lako mai o tamamu me mai raici iko, mo tukuna vua, ‘Yalovinaka me lako mada mai na ganequ o Tema me vakarautaka na kequ. Ke vakarautaka e mataqu na kena kakana na tauvimate,* au na kania mai ligana.’”
6 E davo sara o Aminoni me vaka ga ni tauvimate, e lako yani na tui me raici koya. E qai kaya o Aminoni vua na tui: “Yalovinaka me lako mai o Tema na ganequ me vavia e mataqu e rua na madrai e buli vaka na yate, meu kania mai ligana.”
7 E talatala sara i vale vei Tema o Tevita, e kaya: “Yalovinaka, lako ina vale i Aminoni na ganemu, mo vakarautaka vua na kakana.”*
8 E mani lako o Tema ina vale i Aminoni na ganena, na vanua e davo tiko kina. E taura mai na falawa sa uli oti, e bulia kina na madrai ni rai tiko o Aminoni qai vakabutara.
9 Oti e taura mai na itavuteke me vakarautaka na kena. Ia e sega ni via kana o Aminoni, e kaya: “Mera lako i tuba na tamata kece!” Era mani biuti koya mera lako kece.
10 E kaya sara o Aminoni vei Tema: “Kauta mai na kakana* ina rumu meu kania mai ligamu.” E mani taura o Tema na madrai e vaka na yate a bulia me kauta ina rumu vei Aminoni na ganena.
11 Ni kauta yani vua me kania, e vesuki koya qai kaya: “Lako mai, daru mocevata ganequ.”
12 E qai kaya vua o Tema: “Sega na ganequ! Kua ni vakamaduataki au, ni sega ni dau caka va qori e Isireli.+ Kua ni cakava na ka veivakamaduataki qo.+
13 Na cava au na cakava ena ka beci qo? O iko o na vaka e dua na tamata vakamadua e Isireli. Yalovinaka, mo vosa sara ga qo vua na tui, ni na sega ni bureitaki au vei iko.”
14 E sega ni via vakarorogo vua o Aminoni, e vakasaurarataki koya qai vakamadualaka ni kucuvi koya.
15 E mani sevaki koya vakalevu o Aminoni, e levu sara na nona sevaki koya mai na nona domoni koya. E kaya vua o Aminoni: “Tucake, lako tani!”
16 E qai kaya vua o Tema: “Sega na ganequ, e ca sara ni o vakatalai au qo ni vakatauvatani kei na ka o cakava vei au!” E sega ga ni via vakarorogo vua.
17 Oti e kaciva o Aminoni na nona dauveiqaravi gone, e kaya: “Yalovinaka, kauti ka qo i tuba, mo lokata na katuba mai dakuna.”
18 (Ia e dara tu o Tema e dua na isulu balavu totoka,* nira dau vakaisulu va qori na luvenitui era se goneyalewa.) E mani kauti koya i tuba na dauveiqaravi, e lokata sara na katuba mai dakuna.
19 E qai biuta o Tema na dravusa e uluna,+ e dresulaka na isulu balavu totoka e dara tu, e biuta tiko ga na ligana i uluna ni lako yani, e tagi ni lako tiko.
20 E tarogi koya sara o Apisalome+ na ganena: “E vakasaurarataki iko na ganemu o Aminoni? Mo kua ni tukuna e dua na ka ganequ. E ganemu o koya.+ Mo kua ni katona e lomamu na ka qo.” E mani tiko vakatikitiki ga o Tema ena vale nei Apisalome na ganena.
21 Ni rogoca o Tui Tevita na ka kece qo, dua na ka na nona cudru.+ Ia e sega ni via vakararawataka na loma i Aminoni na luvena, ni lomani koya, e nona ulumatua.
22 E sega ni tukuna o Apisalome e dua na ka ca se vinaka vei Aminoni, ni sevaki+ Aminoni o Apisalome ni a vakamaduataki Tema+ na ganena.
23 Ni oti e rua na yabaki, era tiko na daukotisipi nei Apisalome e Pealiasori volekati Ifireimi,+ e mani sureti ira kece na luvena tagane na tui+ o Apisalome.
24 E lako vua na tui o Apisalome e kaya: “Sa koti oti na sipi ni nomuni dauveiqaravi! Yalovinaka moni tomani au, o kemuni na tui kei ira na nomuni dauveiqaravi.”
25 Ia e kaya na tui vei Apisalome: “Sega luvequ! Ke keimami lako kece, keimami na vakaocai iko.” E cikevi koya tiko ga ia e sega ni vakadonuya me lako, e vosa vakalougatataki koya ga.
26 E qai kaya o Apisalome: “Ke oni sega ni lako, yalovinaka me lako vata kei keimami o Aminoni na tuakaqu.”+ E kaya sara vua na tui: “Na cava me lako vata kina kei iko?”
27 Ia e cikevi koya o Apisalome mani talai Aminoni kei ira kece na luvena tagane na tui mera lako vata kei koya.
28 E vakaroti ira sara na nona dauveiqaravi o Apisalome: “Moni raica ni marau na loma i Aminoni ena waini, au na kaya vei kemuni, ‘Mokuti Aminoni!’ Moni vakamatei koya. Moni kua ni rere. O yau ga au vakaroti kemuni. Moni kaukaua, moni yaloqaqa.”
29 Era qai cakava vei Aminoni na dauveiqaravi i Apisalome na ka sara ga e vakaroti ira kina, era mani tucake kece na vo ni luvena tagane na tui, era dui vodoka na nodra meule ra qai dro.
30 Nira se lako tiko yani, sa yaco vei Tevita na itukutuku: “E mokuti ira kece na luvenitui o Apisalome, e sega ni dua e bula.”
31 E duri sara na tui, e dresulaka na nona isulu qai davo ina qele, era dresulaka tale ga na nodra isulu o ira na nona dauveiqaravi era duri tu e yasana.
32 Ia e kaya o Jionatapi+ na luvei Simea,+ na tuakai Tevita: “Me kua ni nanuma na noqu turaga nira sa vakamatei kece na cauravou era luvenitui, e mate ga o Aminoni.+ Qo na ivakaro i Apisalome, ni nakita+ me cakava qo mai na siga e vakamadualaki Tema+ kina na ganena+ o Aminoni.
33 Me kua ni vakabauta* na noqu turaga na tui na itukutuku e tukuni, ‘Era sa mate kece na luvenitui,’ e mate duadua ga o Aminoni.”
34 E mani dro o Apisalome.+ Ni rai yani na yadra, e raica sara nira lako tiko mai e levu na tamata ena gaunisala e dakuna volekata na ulunivanua.
35 E kaya sara o Jionatapi+ vua na tui: “Raica! Era sa lesu mai na luvena tagane na tui, me vaka ga e kaya na nomuni dauveiqaravi.”
36 Ni vosa oti ga, era curu yani na luvena tagane na tui, era tagi vakadomoilevu, e sorova tale ga na tagi na tui kei ira kece na nona dauveiqaravi.
37 Ia e dro o Apisalome me lako sara vei Talimei+ na luvei Amiute na tui Kesuri. E lolositaki luvena o Tevita me vica vata na siga.
38 E mani dro o Apisalome me lako i Kesuri,+ e tiko ga e kea me tolu na yabaki.
39 E vinakata sara o Tevita me raici Apisalome, ni sa oti na nona rarawataka na mate nei Aminoni.
iVakamacala e ra
^ Se “madrai ni veivakacegui.”
^ Se “madrai ni veivakacegui.”
^ Se “madrai ni veivakacegui.”
^ Se “ukutaki.”
^ Ipe., “tugana e lomana.”
