iKarua ni Samuela 15:1-37
15 Oti na ka kece qori, e vakarautaka o Apisalome e dua na nona qiqi, eso na ose kei na 50 na tamata mera cici tiko e liu vua.+
2 E sou vakamataka o Apisalome me duri ena batinisala e gole ina matamatanikoro.+ Ni lako yani vua na tui e dua me vakatulewataka na nona kisi ni veilewai,+ ena kacivi koya o Apisalome, e tukuna: “O lako mai na koro cava?” ena sauma yani: “E lako mai ena dua na yavusa e Isireli na nomuni dauveiqaravi.”
3 E qai kaya vua o Apisalome: “Raica, e dina e donu na ka e baleti iko, ia e sega ni lesia na tui e dua me rogoci iko.”
4 E dau kaya o Apisalome: “Meu lesi mada ga meu turaganilewa ena vanua! Me lako mai vei au na tamata yadua e tiko na nona kisi ni veilewai se ka me vakatulewataki, au na lewai koya vakadodonu.”
5 Ni torovi koya e dua me cuva vua, ena dodoka na ligana o Apisalome me tauri koya me reguca.+
6 E cakava tiko qori o Apisalome vei ira kece na Isireli era lako yani me lewai ira na tui, e rawa tiko ga na lomadra na lewe i Isireli+ o Apisalome.
7 Ni cava e va na yabaki* e tukuna vua na tui o Apisalome: “Yalovinaka meu lako mada i Epironi+ meu vakayacora na ka au bubuluitaka vei Jiova.
8 Ni cavuta na bubului bibi+ qo na nomuni dauveiqaravi niu tiko e Kesuri+ mai Siria: ‘Ke kauti au lesu i Jerusalemi o Jiova, au na vakacaboisoro* vei Jiova.’”
9 E qai tukuna vua na tui: “Lako ena vakacegu.” E tucake sara o koya me lako i Epironi.
10 E tala o Apisalome eso na yamata vei ira kece na yavusa e Isireli, e kaya: “Ena gauna ga oni rogoca kina ni uvuci na davui* moni kaya sara, ‘Sa tui o Apisalome e Epironi!’”+
11 Era lako vata kei Apisalome e 200 na tamata mai Jerusalemi, era sureti ia era lako wale sara tu ga nira sega ni kila na ka e yaco tiko.
12 Ena gauna tale ga e vakacaboisoro kina o Apisalome e talatala sara me kau mai o Etofeli+ na kai Kilo, na daunivakasala nei Tevita+ ena koro o Kilo.+ E kaukaua tiko ga na bukivere qai tubu tiko ga na kedra iwiliwili na tokoni Apisalome.+
13 E lai vakatukutuku sara vei Tevita e dua, e kaya: “Sa golevi Apisalome na lomadra na lewe i Isireli.”
14 E kaya sara o Tevita vei ira na nona dauveiqaravi era tiko vata kei koya e Jerusalemi: “Moni tucake meda dro,+ nida na sega ni dro bula rawa mai vei Apisalome! Moni vakusakusa, de totolo mai qai toboki keda, ena kauta mai vei keda na ca qai ravuta na koro ena iseleiwau!”+
15 Era kaya vua na tui na nona dauveiqaravi: “Na ka kece e vakatulewataka na neimami turaga na tui keimami tu vakarau ni cakava na nomuni dauveiqaravi.”+
16 E lako yani na tui kei ira kece na lewe ni nona vuvale era muri koya tiko, ia e biuta tu mai na tui e tini na watina lalai+ me ratou vakatawa tiko na vale.*
17 E lako tiko ga yani na tui kei ira kece na muri koya tiko, era lai cegu e Pecimeraki.
18 O ira kece na nona dauveiqaravi era biubiu vata kei koya, o ira kece na kai Kireci, o ira na kai Pileci,+ kei ira na kai Kaca,+ era le 600 na tamata era muri koya mai Kaca,+ era lako tiko ni vakaraici ira na tui.*
19 E qai kaya na tui vei Itai+ na kai Kaca: “Na cava mo lako vata kina kei keimami? Mo lesu lai tiko vata kei na tui vou ni o vulagi, ni o na sega tale ga ni lesu rawa ina nomu vanua.
20 O qai lako ga mai enanoa, meu sa kauti iko tale nikua mo veilakoyaki vata kei keimami, mo lako ena gauna au lako kina kei na vanua au lakova? Lesu, mo kauti ira na tacimu, me dei mada ga na nona lomani iko o Jiova qai yalodina vei iko!”+
21 Ia e sauma vua na tui o Itai: “Me vaka ni bula dina tiko o Jiova, oni bula tale tiko ga na noqu turaga na tui, na vanua ga ena tiko kina na tui, se mani mate se bula, ena tiko kina na nomuni dauveiqaravi!”+
22 E kaya sara o Tevita vei Itai:+ “Lako, mo takoso yani.” E takoso sara o Itai na kai Kaca, o ira kece na nona tamata kei ira na gone era tiko vata kei koya.
23 Era tabalaka na tagi o ira kece na lewenivanua nira sa takoso na tamata kece qo, qai duri tu na tui ena Buca o Kitironi,+ era takoso tiko na tamata kece ena gaunisala e gole ina vanua talasiga.
24 E tiko tale ga e kea o Setoki+ kei ira na Livai+ kece era colata tiko na kato+ ni veiyalayalati ni Kalou+ dina, era biuta sobu na Kato ni Kalou dina qai lako cake o Epaiaca+ nira takoso kece na tamata era biuta mai na koro.
25 Ia e kaya na tui vei Setoki: “Mo kauta tale ina koro+ na Kato ni Kalou dina. Ke lomani au o Jiova ena kauti au lesu mai meu raica na kato kei na kena vale.+
26 Ia ke tukuna, ‘Au sega ni taleitaki iko,’ me cakava ga vei au na ka e vinaka e matana.”
27 E kaya na tui vei Setoki na bete: “O dauraivotu?+ Mo lesu ena vakacegu ina koro, mo kauti rau na luvemudrau tagane o Eimasi na luvemu, kei Jonacani+ na luvei Epaiaca.
28 Raica, au na tiko ga ena vanua mamatia volekata na vanua talasiga me yacova ni dou vakauitukutuku mai vei au.”+
29 Erau kauta lesu gona i Jerusalemi o Setoki kei Epaiaca na Kato ni Kalou dina, rau qai tiko ga e kea.
30 Ni cabeta tiko na Ulunivanua* ni Veiolive+ o Tevita, e tagi ni lako cake tiko, e ubia na uluna qai sega ni vakaivava. Era ubia tale ga na uludra na tamata kece era salavata kei koya, ra qai tagi nira lako cake tiko.
31 E tukuni vei Tevita: “O Etofeli e dua vei ira na bukivere+ tiko kei Apisalome.”+ E kaya sara o Tevita: “Kemuni Jiova,+ moni vukica mada ga na ivakasala i Etofeli me ivakasala ni tamata lialia!”+
32 Ni yaco o Tevita ena delana, ena vanua era dau cuva kina vua na Kalou na tamata, e tavaki koya mai kea o Usai+ na kai Ariki,+ e kadresu tu na nona isulu balavu, e tu e uluna na qele.
33 Ia e tukuna vua o Tevita: “Ke o takoso vata kei au, o na vakaocai au ga.
34 Ia ke o lesu ina koro mo tukuna vei Apisalome, ‘O yau na nomuni dauveiqaravi kemuni na Tui. Au a dauveiqaravi tu nei tamamuni ena gauna oya, ia qo au sa nomuni dauveiqaravi,’+ mo qai vakaseva na ivakasala i Etofeli me baleti au.+
35 Erau na tiko vata kei iko mai kea o Setoki kei Epaiaca. Mo tukuna vei rau na bete o Setoki kei Epaiaca na ka kece o rogoca mai na valenitui.+
36 Raica! Erau tiko e kea na luvedrau tagane, o Eimasi+ na luvei Setoki kei Jonacani+ na luvei Epaiaca, mo talai rau mai vei au ena ka kece dou rogoca.”
37 E lako sara ina koro o Usai na itokani*+ i Tevita ni lako i Jerusalemi o Apisalome.
iVakamacala e ra
^ Se rawa ni, “40 na yabaki.”
^ Ipe., “qaravi.”
^ Ipe., “ileu.”
^ Se “valenitui.”
^ Se “takoso e matana na tui.”
^ Se “icabecabe.”
^ Se “itokani voleka.”
