iKarua ni Samuela 16:1-23
16 Ni sivita vakalailai na delana+ o Tevita, e mai tavaki koya e kea o Sipa+ na dauveiqaravi nei Mefiposeci+ kei na rua na asa vakaidabedabe, e usana tiko mai e 200 na ibuli madrai, e 100 na ibuli vuanivaini rabaraba, e 100 na ibuli vuata ni vulaikatakata,* kei na dua na saqa waini levu.+
2 E kaya sara na tui vei Sipa: “Na cava o kauta mai kina qo?” E tukuna o Sipa: “Na asa mera vodo kina na nona vuvale na tui, na madrai kei na keke vuata ni vulaikatakata mera kania na cauravou, kei na waini me gunuva o koya e oca ena vanua talasiga.”+
3 E kaya sara na tui: “I vei na luvei* nomu turaga?”+ E kaya o Sipa vua na tui: “E tiko mai Jerusalemi ni kaya o koya, ‘Nikua ena solia tale vei au+ na vuvale i Isireli na veiliutaki vakatui nei tamaqu.’”
4 E qai kaya na tui vei Sipa: “Raica! Sa nomu na ka kece e nei Mefiposeci.”+ E kaya o Sipa: “Au cuva e matamuni. Me nanumi au mada ga na matamuni, noqu turaga na tui.”+
5 Ni yaco o Tui Tevita e Peurimi, e lako mai e dua na turaga ena vuvale i Saula, na yacana o Semeai+ na luvei Kira, e vosavakacaca tiko vakadomoilevu ni lako tiko mai.+
6 E vakaviriki Tevita kei ira kece na dauveiqaravi nei Tui Tevita ena vatu, kei ira kece na lewenivanua kei ira na tagane qaqa era tu ena nona imatau kei na nona imawi.
7 E tukuna o Semeai ni vosavakacaca tiko: “Lako tani, lako tani o iko na dau vakadavedra! Tamata macawa!
8 Sa sauma vei iko o Jiova na dra kece e dave ena vuvale i Saula o koya o sosomitaka mo veiliutaki vakatui, ia sa solia o Jiova na veiliutaki vakatui ena liga i Apisalome na luvemu. O sa leqa tu qo ni o dau vakadavedra!”+
9 E qai tukuna vua na tui o Apisai na luvei Seruaia:+ “Na cava me vosavakacacataka kina na noqu turaga na tui+ na koli mate qo?+ Yalovinaka, meu lako mada meu tamusuka na uluna.”+
10 Ia e kaya na tui: “Me icavai vei kedatou, kemudou na luvei Seruaia?+ Dou biuti koya me vosavakacacataki au+ ni o Jiova ga e tukuna vua,+ ‘Mo vosavakacacataki Tevita!’ O cei gona me kaya, ‘Na cava o cakava kina qo?’”
11 E kaya sara o Tevita vei Apisai kei ira kece na nona dauveiqaravi: “E via vakamatei au tiko+ o luvequ, o koya e lako mai yagoqu, sa qai wacava na Penijamini+ qo! Biuti koya ga me vosavakacacataki au ni tukuna vua o Jiova!
12 De dua ena raica o Jiova na noqu rarawa,+ ena qai yalovinaka tale vei au o Jiova meu kua ni vosavakacacataki nikua.”+
13 E lako tiko ga e gaunisala o Tevita kei ira na nona tamata, ia o Semeai e lako tiko ena yasa ni ulunivanua donui Tevita ni vosavakacaca tiko,+ e viritaka tiko na vatu qai kaburaka e levu na kuvuniqele.
14 Sa dede toka qai yaco yani na tui kei ira kece era tomani koya ena vanua era lako kina, dua na ka nodra wawale, era mani vakacegu e kea.
15 E yaco i Jerusalemi o Apisalome kei ira kece na lewe i Isireli, e tiko vata kei koya o Etofeli.+
16 Ni yaco ga yani vei Apisalome o Usai+ na kai Ariki,+ na itokani* i Tevita, e kaya sara vei Apisalome o Usai: “Me bula balavu na tui!+ Me bula balavu na tui!”
17 E kaya sara o Apisalome vei Usai: “E va qo na dei ni nomu lomana na nomu itokani? Na cava o sega ni salavata kina kei na nomu itokani?”
18 E kaya o Usai vei Apisalome: “Sega, au na to vei koya e digitaka o Jiova, o ira na tamata qo, kei ira kece na lewe i Isireli. Au na tiko vata kei koya.
19 Au tukuna tale, O cei meu qarava? Sega ni o luvena ga? Me vaka ga na noqu qaravi tamamuni, au na qaravi kemuni tale ga.”+
20 Oti e kaya o Apisalome vei Etofeli: “Dou tukuna mai na nomudou nanuma.*+ Na cava meda cakava?”
21 E kaya vei Apisalome o Etofeli: “Moni veiyacovi mada kei ratou na watina lalai+ na tamamuni a biuti ratou tu mai me ratou vakatawa na vale.*+ Era na rogoca kece na Isireli ni o vakaboicataki tamamu, era na qai kaukaua o ira na tokoni kemuni.”
22 Era birika sara e dua na valelaca nei Apisalome ena delanivale,+ e qai veiyacovi o Apisalome kei ira na watina lalai na tamana+ e matadra kece na Isireli.+
23 Ena gauna oya e dau rokovi* na ivakasala i Etofeli+ me vaka ga e vosa ni Kalou dina. Rau dau doka na ivakasala kece i Etofeli o Tevita kei Apisalome.
iVakamacala e ra
^ Vakabibi na lolo, de vuaniniuniu tale ga.
^ Se “makubui.”
^ Se “itokani voleka.”
^ Se “ivakasala.”
^ Se “valenitui.”
^ Se “vaka ga ni dua e taroga tiko.”
