iKarua ni Samuela 17:1-29
17 E kaya sara o Etofeli vei Apisalome: “Meu digia mada e 12,000 na tagane, mera vakarau me keimami cicimuri Tevita ena bogi nikua.
2 Au na torovi koya yani ni oca qai malumalumu,*+ ia au na vakataqayataki koya, era na dro kece na tamata era tiko vata kei koya, au na mokuta ga na tui.+
3 Au na vakasukai ira kece mai na tamata vei kemuni. Na nodra suka kece na tamata ena vakatau ena ka e yacovi koya oni qara tiko. Era na qai veiyaloni na tamata kece.”
4 E donu sara ga na vakatutu qori vei Apisalome kei ira kece na qase ni Isireli.
5 Ia e kaya o Apisalome: “Yalovinaka, me kacivi tale ga mai o Usai+ na kai Ariki meda rogoca na ka e tukuna.”
6 E mani lako vei Apisalome o Usai. E kaya vua o Apisalome: “Qo na ivakasala nei Etofeli. Meda muria na nona ivakasala? Ke sega, mo tukuna mai vei keimami.”
7 E kaya vei Apisalome o Usai: “E sega ni vinaka na ivakasala nei Etofeli ena tikina qo!”+
8 E tomana o Usai: “Oni kila vinaka ni tamata qaqa o tamamuni kei ira na nona tamata,+ era rerevaki* me vaka na bea e yali na luvena mai veikau.+ E tamataivalu tale ga o tamamuni,+ ena sega ni moce vata kei ira na tamata.
9 Ena gauna sara ga qo e vuni tiko o koya ena dua na qaravatu* se so tale na vanua,+ ia ni ravuravu e liu era na kaya o ira na rogoca, ‘Era sa vakadrukai na tamata era muri Apisalome tiko!’
10 Na tamata yaloqaqa mada ga vaka na yalo ni laione+ ena waicala ga ena rere, nira kila kece tu na Isireli ni tamata qaqa+ o tamamuni ra qai yaloqaqa na tamata era tokoni koya.
11 Qo na noqu ivakasala: Mera soqoni kece vei kemuni o ira na Isireli mai Tani me yaco i Pieri-sepa+ me vaka na mataninuku ni matasawa na kedra levu,+ moni qai liutaki ira ina ivalu.
12 Eda na valuti koya ena vanua ga e kune kina, eda na lutuki koya me vaka na lutu ni tegu ena qele, ena sega ni bula e dua, o koya se dua na tamata e tiko vata kei koya.
13 Ke dro ina dua na koro, era na kauta kece na Isireli na dali ina koro oya, eda na qai dreta sobu ina buca me sega tale ni vo kina e dua na vatu lailai.”
14 E kaya sara o Apisalome kei ira kece na Isireli: “E vinaka sara na ivakasala i Usai na kai Ariki+ mai na ivakasala nei Etofeli!” Ni nakita* o Jiova me vakaseva na ivakasala vinaka nei Etofeli+ me vakayacora o Jiova na ka ca vei Apisalome.+
15 Oti e kaya o Usai vei rau na bete o Setoki kei Epaiaca:+ “Qo na ivakasala nei Etofeli vei Apisalome kei ira na qase ni Isireli, ia qo na noqu ivakasala.
16 Drau talatala sara vakatotolo vei Tevita me tukuni vua: ‘Moni kua ni moce ena vanua mamatia ni vanua talasiga ena bogi nikua, ia moni takosova na uciwai de vakamatei* na tui kei ira kece na tamata era tiko vata kei koya.’”+
17 Erau tiko ga o Jonacani+ kei Eimasi+ e Enirokeli,+ e lako sara e dua na yalewa dauveiqaravi me tukuna vei rau, erau mani lai tukuna vei Tui Tevita, ni rau sega ni vinakata me laurai ni rau curu ina koro.
18 Ia e raici rau e dua na cauravou qai tukuna vei Apisalome. Erau lako totolo sara ina nona vale e dua na turaga e Peurimi+ e tiko ena nona lomanibai e dua na toevu. Erau lako sobu kina,
19 e tevuka na watina na turaga qori na iubi ena gusu ni toevu qai kaburaka kina na covuata qaqi, e sega ni dua e kila na ka qori.
20 Era lako yani na dauveiqaravi nei Apisalome ina nona vale na marama qori, era taroga: “I vei o Eimasi kei Jonacani?” E kaya na marama: “Rau sa lakosivita na uciwai.”+ Era qarai rau tiko ga ia era sega ni kunei rau, era mani lesu i Jerusalemi.
21 Nira sa lako, erau lako cake mai na toevu, rau lako sara me rau tukutuku vei Tui Tevita. Rau kaya vua: “Moni cavutu moni takosova totolo na uciwai, ni va qo na ivakasala i Etofeli moni valuti kina.”+
22 Sega ni bera ni cavutu o Tevita kei ira kece na tamata era tiko vata kei koya mera takosova na Joritani. Ni kida na mataka e sega ni dua e vo, era takosova kece na Joritani.
23 Ni kila o Etofeli ni sega ni muri na nona ivakasala, e vakarautaka sara na idabedabe ni asa me vodo kina i nona vale ena nona tauni.+ E tatau sara vei ratou na nona vuvale+ qai vakaliligi* koya.+ E mani mate qai bulu ena nodra ibulubulu na tukana.
24 E lako sara o Tevita i Meneimi,+ ia e takosova na Joritani o Apisalome kei ira kece na Isireli.
25 E lesi Amasa+ o Apisalome me sosomitaki Joapi+ me liutaka na mataivalu. O Amasa e luvei Icera, e dua na Isireli a veiyacovi* kei Apikali+ na luvei Neasi na taci Seruaia na tinai Joapi.
26 Era keba na Isireli kei Apisalome ena vanua o Kiliati.+
27 Ni yaco ga yani o Tevita i Meneimi, o Sopi na luvei Neasi mai Rapa+ na nodra na Amoni, o Mekiri+ na luvei Amieli mai Lotipari, kei Pasilai+ na kai Kiliati mai Rokilimi
28 eratou kauta yani na imocemoce, na beseni, na kuro qele, na witi, na varile, na falawa, na covuata tavu, na bini lelevu, na lenitili,* na covuata sigani,
29 na denioni, na bata, na sipi, na jisi.* Eratou kauta kece qo vei Tevita kei ira na tiko vata kei koya mera kania,+ nira kaya: “Era sa walokai na tamata, era wawale, era karamaca ena vanua talasiga.”+
iVakamacala e ra
^ Se “malumu na ligana ruarua.”
^ Se “rarawa.”
^ Se “qara, qakilo.”
^ Se “vakarota.”
^ Ipe., “tilomi.”
^ Se “kunati.”
^ Kena irairai ni wati Apikali o Icera.
^ Dua na mataqali bini. Ena vosa vavalagi, lentil.
^ Ipe., “uro ni sucu ni bulumakau.”
