iKarua ni Samuela 18:1-33
18 E wiliki ira sara na tamata era tiko vata kei koya o Tevita, e lesia eso mera turaga ni vica vata na udolu kei na so mera turaga ni vica vata na drau.+
2 E tala o Tevita e dua na ikatolu ni tamata me lewai ira o Joapi,+ e dua na ikatolu me lewai ira na taci Joapi o Apisai+ na luvei Seruaia,+ e dua tale na ikatolu me lewai ira o Itai+ na kai Kaca. E qai tukuna na tui vei ira na tamata: “Au na lako tale ga kei kemuni.”
3 Ia era kaya: “Moni kua sara ni lako,+ ni keimami dro era na sega ni kauaitaki keimami, ke mate e veimama vei keimami era na sega tale ga ni kauaitaki keimami, ni o kemuni oni tautauvata kei na 10,000 vei keimami.+ E vinaka ga moni vukei keimami mai na koro.”
4 E kaya vei ira na tui: “Au na cakava na ka e vinaka vei kemuni.” E duri tiko na tui ena yasa ni matamatanikoro, era lako sara yani vakayadrau, vakayaudolu tale ga na tamata kece.
5 E vakaroti Joapi, Apisai, kei Itai na tui: “Dou lewa vakamalua vua na cauravou o Apisalome ena vukuqu.”+ Era rogoca kece tu na tamata ni vakaroti ratou kece na iliuliu na tui me baleti Apisalome.
6 Era lako yani na tamata ina lomanivanua mera vakasota kei ira na Isireli, era mani vala ena veikau e Ifireimi.+
7 Era vakadrukai ira na Isireli+ e kea na dauveiqaravi i Tevita,+ e levu sara era mate ena siga oya, era le 20,000.
8 E toso tiko na ivalu ena vanua taucoko oya. E levu gona era mate e veikau ni vakatauvatani kei ira na mate ena iseleiwau ena siga oya.
9 E qai sotavi ira na dauveiqaravi i Tevita o Apisalome. E vodo tiko ena dua na meule o Apisalome mani lako yani na meule ena ruku ni dua na vunikau levu e levu na tabana, qai tao na ulu i Apisalome ena vunikau levu mani lili toka e macawa, ia e lako ga na meule a vodoka tiko.
10 E raica qori e dua na tamata, e kaya sara vei Joapi:+ “Raica! Au raici Apisalome ni lili tu ena dua na vunikau levu.”
11 E kaya sara o Joapi vei koya e tukutuku vua: “Ni o sa raica, na cava o sega ni mokuti koya kina me lutu i ra? Au na marau sara ga meu solia vei iko e tini na tikinisiliva kei na dua na beleti.”
12 Ia e kaya na tamata vei Joapi: “Ke soli* mada ga vei au e 1,000 na tikinisiliva, au na sega ni dodoka na ligaqu meu mokuta na luvenitui, ni keimami rogoca ni a vakaroti kemudou na tui, o iko, o Apisai, kei Itai, ‘Mo dou taqomaka na cauravou o Apisalome.’+
13 Keu talaidredre meu vakamatei koya,* ena sega ni vunitaki vua na tui, o iko tale ga o na sega ni taqomaki au.”
14 E kaya o Joapi: “Au na sega ni vakaoti gauna vei iko!” E taura sara e ligana e tolu na moto* qai coka kina na uto i Apisalome ni se bula tiko ena loma ni vunikau levu.
15 Eratou lako yani e tini na dauveiqaravi i Joapi eratou dau cola na nona iyaragi, eratou mokuti Apisalome me mate sara.+
16 E uvuca sara o Joapi na davui* mera lesu mai kina na tamata ena nodra cicimuri ira na Isireli, e mani tarovi ira o Joapi.
17 Era tauri Apisalome era biuti koya ena dua na qara levu e veikau, era binia e delana e dua na ibinibini vatu levu sara.+ Era dro kece na Isireli ina nodra vale.
18 Ni se bula o Apisalome, e kauta e dua na duru qai vakaduria me nona ena Buca ni Tui,+ e kaya: “E sega na luvequ tagane me nanumi kina na yacaqu.”+ E mani vakayacana na duru ena yacana, e yacana tiko ga na iVakananumi kei Apisalome me yacova mai qo.
19 E kaya o Eimasi+ na luvei Setoki: “Yalovinaka, meu cici mada meu tukuna vua na tui ni sa vakataulewataka o Jiova me sereki koya mai vei ira na kena meca.”+
20 Ia e kaya vua o Joapi: “O na sega ni lai tukutuku nikua. Mo qai tukutuku ena dua tale na siga, ia o na sega ni tukuna na itukutuku nikua, ni sa mate na luvenitui.”+
21 E kaya sara o Joapi vua na kai Kusi:+ “Mo lai tukuna vua na tui na ka o raica.” E cuva vei Joapi na kai Kusi qai cici yani.
22 E tukuna tale vei Joapi o Eimasi na luvei Setoki: “Yalovinaka, se cava e yaco, meu cicimuria ga na kai Kusi.” Ia e kaya o Joapi: “Na cava mo cici kina luvequ, ni sega na ka mo lai tukuna?”
23 E kaya tale: “Se cava e yaco, meu cici ga.” E mani kaya vua o Joapi: “Cici!” E cici o Eimasi ni muria na yasayasa na Joritani, e sivita sara na kai Kusi.
24 Ia e dabe tiko o Tevita ena maliwa ni matamata ruarua ni koro,+ e lako na yadra+ ina dela ni matamata volekata na bai. E rai yani qai raica ni cici duadua tiko mai e dua na tamata.
25 E kaci sara na yadra me tukutuku vua na tui. E kaya na tui: “Ke o koya duadua ga, e mai tukuna e dua na ka.” Ni voleka mai o koya,
26 e raica na yadra ni cici tiko mai e dua tale na tamata. E kaci sara na yadra vua na ivakatawa ni matamata: “Raica! E dua tale na tamata e cici duadua tiko mai qori!” E kaya sara na tui: “E mai tukutuku tale ga o koya qori.”
27 E kaya na yadra: “Au raica na ivakarau ni nona cici na kena imatai e vakataki Eimasi+ na luvei Setoki,” e kaya sara na tui: “Qori na tamata vinaka, e kauta mai na itukutuku vinaka.”
28 Oti e kacivaka o Eimasi vua na tui: “Qo na itukutuku vinaka!” E tekicuva sara vua na tui qai davo vakatoboicu ena qele. E tomana: “Me vakavinavinakataki mada ga o Jiova na nomuni Kalou, o koya e soli ira mai era vorata* na noqu turaga na tui!”+
29 Ia e kaya na tui: “Vakacava, e bula vinaka tiko na cauravou o Apisalome?” E kaya sara o Eimasi: “Au raica nira ue vakalevu ena gauna e tala kina o Joapi na nona dauveiqaravi na tui kei na nomuni dauveiqaravi, au sega ga ni kila na ka e yaco.”+
30 E kaya sara na tui: “Mo toso vakatikitiki, duri eke.” E mani vakatikitiki qai duri tu e kea.
31 E yaco sara yani na kai Kusi,+ e kaya na kai Kusi: “Me rogoca mada ga na itukutuku qo na noqu turaga na tui: Sa vakataulewataka nikua o Jiova me sereki kemuni mai na ligadra kece era vorati kemuni.”+
32 Ia e kaya na tui vua na kai Kusi: “Vakacava, e bula vinaka tiko na cauravou o Apisalome?” E kaya na kai Kusi: “Mera tautauvata ga kei na cauravou qo o ira kece na meca ni noqu turaga na tui kei ira kece era vorati kemuni mera vakaleqai kemuni!”+
33 E rarawa sara ga na tui, e mani lako cake ina rumu ena tabavale e cake ena matamata qai sorova na tagi, e tukuna ni lako tiko: “I luvequ Apisalome, na luvequ, na luvequ Apisalome! Meu a mate ga o yau mo kua ni mate Apisalome na luvequ, na luvequ!”+
iVakamacala e ra
^ Ipe., “vakarautaki e qeteqeteniligaqu.”
^ Se “dabui koya.”
^ Se rawa ni, “moto lalai.”
^ Ipe., “ileu.”
^ Ipe., “dodoka na ligadra.”