iKarua ni Samuela 24:1-25
24 E cudruvi ira tale na Isireli o Jiova,+ ni uqeti Tevita e dua me saqati ira, e kaya: “Lako, mo wiliki+ ira na Isireli kei ira na Juta.”+
2 E mani tukuna na tui vei Joapi+ na iliuliu ni mataivalu e tiko vata kei koya: “Yalovinaka, mo lako yani ena yavusa kece e Isireli mai Tani me yaco i Pieri-sepa,+ moni volai ira na lewenivanua meu kila na kedra iwiliwili.”
3 Ia e kaya o Joapi vua na tui: “Me kuria mada ga vakaduanadrau na nomuni Kalou o Jiova na kedra levu na lewenivanua, me raica mada ga na matamuni na noqu turaga na tui, ia na cava e vinakata kina na ka qo na noqu turaga na tui?”
4 Ia e yaco ga na vosa ni tui vei Joapi kei ira na iliuliu ni mataivalu. E biubiu sara o Joapi kei ira na iliuliu ni mataivalu e matana na tui mera volai ira na lewe i Isireli.+
5 Era takosova na Joritani, era lai keba sara e Aroeri+ ena yasa imatau* ni koro ena lomadonu ni buca* donuya na nodra vanua na Kata me gole yani i Jaseri.+
6 Oti qori era lako sara i Kiliati+ kei na vanua o Tatimiotisi, era toso tiko ga me yaco i Tanijeani, era lako wavoki me yaco i Saitoni.+
7 Era qai yaco ina koronivalu e Taia,+ na nodra koro kece na Aivaiti+ kei na kai Kenani, era yaco sara i Pieri-sepa+ e Nikepi+ ena vanua o Juta.
8 O koya gona, era lakova na veivanua taucoko ra qai yaco i Jerusalemi ni cava e ciwa na vula kei na 20 na siga.
9 E solia sara o Joapi vua na tui na kedra iwiliwili na lewenivanua era volai. Era le 800,000 na tamataivalu ni Isireli era vakaiseleiwau, era le 500,000 na lewe i Juta.+
10 E rarawa na loma* i Tevita+ ni wiliki ira oti na lewenivanua. E mani kaya vei Jiova o Tevita: “Au sa cala+ vakalevu niu cakava qo. Au kerea Jiova moni vosota mada na nona cala na nomuni dauveiqaravi+ niu cakacaka vakalialia sara.”+
11 Ni duri ena mataka o Tevita, e vosa sara o Jiova vei Kata+ na parofita, na dauraivotu nei Tevita, e kaya:
12 “Mo lai kaya vei Tevita, ‘Qo na ka e tukuna o Jiova: “Au solia vei iko e tolu na digidigi. Digia e dua meu vakayacora vei iko.”’”+
13 E lako sara vei Tevita o Kata me tukutuku vua: “Me vitu na yabaki ni dausiga ena nomu vanua?+ Se me tolu na vula mo drovaka kina na kemu meca nira cicimuri iko?+ Se me tolu na siga na matedewa ena nomu vanua?+ Moni vakasamataka vinaka na ka meu lai tukuna vei koya e talai au mai.”
14 E mani kaya vei Kata o Tevita: “Sa dua na ka na noqu rarawa. Yalovinaka, meda bale ga ena liga i Jiova,+ ni levu sara na nona yalololoma,+ meu kua ga ni bale ena liga ni tamata.”+
15 E qai vakayacora o Jiova na matedewa+ e Isireli mai na mataka me yacova na gauna lokuci, era mate+ kina e 70,000 na lewenivanua mai Tani me yaco i Pieri-sepa.+
16 Ni dodoka na ligana na agilosi vaka i Jerusalemi me vakarusa, e rarawataka o Jiova na ka ca qori,+ e mani tukuna vua na agilosi e vakarusai ira tiko na lewenivanua: “Sa rauta! Me cegu na ligamu.” E duri volekata tu na agilosi i Jiova na rara ni butu covuata nei Arauna+ na Jepusaiti.+
17 Ni raica o Tevita na agilosi e vakamatei ira tiko na lewenivanua, e qai tukuna vei Jiova: “O yau ga au valavala ca, au cala, ia na cava era cakava na sipi qo?+ Me cudruvi au mada ga kei na vuvale i tamaqu+ na ligamuni.”
18 E lako sara o Kata vei Tevita ena siga oya, e kaya vua: “Moni lako cake, moni vakarautaka e dua na icabocabonisoro vei Jiova ena rara ni butu covuata nei Arauna na Jepusaiti.”+
19 E lako cake sara o Tevita me vaka na vosa i Kata e vakarota o Jiova.
20 Ni rai sobu yani o Arauna, e raica na tui kei ira na nona dauveiqaravi nira lako tiko yani vua, e lako sara yani o Arauna me tekicuva vua na tui ni tara na matana na qele.
21 E taroga o Arauna: “Na cava e mai cakava na noqu turaga na tui vua na nona dauveiqaravi?” E kaya o Tevita: “Meu volia vei iko na rara ni butu covuata me tara kina e dua na icabocabonisoro vei Jiova, me mudu kina na mate levu vei ira na lewenivanua.”+
22 Ia e kaya vei Tevita o Arauna: “Me taura mada ga na noqu turaga na tui me cabora kina na ka e vinaka vua.* Qo na bulumakau me isoro kama, na papa e dau samu kina na witi, kei na iyaya ni siviyara ni bulumakau me buka.
23 Qo kece na ka e solia vei kemuni na tui o Arauna.” E qai kaya vua na tui o Arauna: “Me lomani kemuni mada ga o Jiova na nomuni Kalou.”
24 Ia e kaya na tui vei Arauna: “Sega, au na volia ga vei iko ena kena isau. Au na sega ni cabora vei Jiova na noqu Kalou na isoro kama e sega ni saumi.” E mani volia o Tevita na rara ni butu covuata kei na bulumakau ena 50 na sikeli* siliva.+
25 E tara e kea o Tevita e dua na icabocabonisoro+ vei Jiova qai cabora kina na isoro kama kei na isoro ni veiyaloni. E rogoca sara o Jiova na nodra vakamamasu ena vuku ni vanua,+ mani mudu kina na mate levu vei ira na Isireli.
