iKarua ni Samuela 8:1-18
8 Oti qori e vakadrukai ira na kai Filisitia+ o Tevita, e vakamalumalumutaki ira+ qai tauri Mecekiama o Tevita mai ligadra na kai Filisitia.
2 E vakadrukai ira na kai Moapi,+ e vakadavori ira ena qele qai vakarautaki ira ena wa ni ivakarau. E vakarautaka e rua na wa ni ivakarau mera vakamatei, ia e dua na ivakarau taucoko mera vakabulai.+ Era qai dauveiqaravi nei Tevita na kai Moapi mera solia vua na ivakacavacava.+
3 E vakadrukai Etateseri na luvei Riopi na tui Sopa+ o Tevita, ni lako tiko me lewa tale na Uciwai na Uferetisi.+
4 E vesuka o Tevita e 1,700 na nona dauvodo ose kei na 20,000 na sotia era taubale. E qai taya o Tevita na ua ni sagadra na ose kece ni qiqinivalu, ia e maroroya e 100 na ose ni qiqinivalu.+
5 Nira lako yani na kai Siria e Tamasiko+ mera vukei Tui Etateseri e Sopa qai mokuta o Tevita e 22,000 na kai Siria.+
6 E lesia sara o Tevita na matasotia mera lai tiko e Siria e Tamasiko, era qai dauveiqaravi nei Tevita na kai Siria mera solia vua na ivakacavacava. E vakavuna o Jiova me qaqa* o Tevita ena vanua kece e lakova.+
7 E taura tale ga o Tevita na isasabai mokimokiti koula e tiko vei ira na tamata nei Etateseri qai kauta i Jerusalemi.+
8 E kauta vakalevu o Tui Tevita na kopa mai Pera kei Perocae na koro nei Etateseri.
9 Ia e rogoca o Tui Tou mai Emaci+ ni vakadrukai ira kece na mataivalu nei Etateseri+ o Tevita.
10 E talai Jorami sara na luvena o Tou vei Tui Tevita me taroga se vakacava tiko, me vakavinavinakataki koya ni valuti Etateseri qai vakadruka, (ni dau valuti Tou o Etateseri), mani kauta o koya na iyaya siliva, koula, kei na kopa.
11 E vakatabuya qori o Tui Tevita me nei Jiova, kei na siliva kei na koula e kauta mai na veimatanitu a vakamalumalumutaka:+
12 mai Siria kei Moapi,+ vei ira na Amoni, vei ira na kai Filisitia,+ vei ira na Amalekaiti,+ kei na itokinivalu nei Etateseri+ na luvei Riopi na tui Sopa.
13 E rogo tale ga na yaca i Tevita ni lesu mai na mokuti ira na le 18,000 na kai Itomi ena Buca ni Masima.+
14 E lesia na matasotia mera tiko e Itomi. E lesi ira na matasotia e Itomi taucoko, ra qai mai dauveiqaravi nei Tevita+ na kai Itomi kece. E vakavuna o Jiova me qaqa o Tevita ena vanua kece e lakova.+
15 E lewai ira tiko ga na Isireli taucoko o Tevita,+ e lewadodonu qai cakadodonu+ vei ira kece na nona tamata.+
16 E liutaka na mataivalu o Joapi+ na luvei Seruaia, ia o Josafati+ na luvei Ailute e dauvola na ka ni matanitu.
17 O Setoki+ na luvei Etupi kei Eimeleki na luvei Epaiaca erau bete, o Siraia e vunivola.
18 O Penaia+ na luvei Jioiata e liutaki ira na kai Kireci kei ira na kai Pileci,+ ia o ira na tagane na luvei Tevita era dauveiqaravi turaga.*