iKarua ni Samuela 9:1-13
-
Dei nona lomani Mefiposeci o Tevita (1-13)
9 E kaya sara o Tevita: “Se vo tiko e dua ena vuvale nei Saula meu vakaraitaka vua na dei ni noqu loloma ena vuku i Jonacani?”+
2 E tiko e dua na dauveiqaravi ena vuvale i Saula na yacana o Sipa.+ Era kacivi koya sara me lako vei Tevita, e qai tarogi koya na tui: “O iko o Sipa?” E kaya o koya: “O yau na nomuni dauveiqaravi.”
3 E kaya tale na tui: “Se vo tiko e dua ena vuvale nei Saula meu vakaraitaka vua na dei ni loloma ni Kalou?” E kaya o Sipa vua na tui: “E tiko e dua na luvei Jonacani, e lokiloki na yavana ruarua.”+
4 E tarogi koya na tui: “I vei o koya?” E kaya o Sipa vua na tui: “E tiko o koya ena vale i Mekiri+ na luvei Amieli mai Lotipari.”
5 E talatala sara vua o Tui Tevita, qai kauti koya mai na vale i Mekiri na luvei Amieli mai Lotipari.
6 Ni lako yani vei Tevita o Mefiposeci na luvei Jonacani na luvei Saula, e tekicuva sara qai davo vakatoboicu. E mani kaya o Tevita: “Mefiposeci!” e kaya o koya: “O yau qo na nomuni dauveiqaravi.”
7 E kaya vua o Tevita: “Kua ni rere, niu na vakaraitaka sara ga vei iko na dei ni noqu loloma+ ena vuku i tamamu o Jonacani, au na vakasuka vei iko na vanua kece i Saula na tukamu, o na kana* tiko ga ena noqu teveli.”+
8 E tekicuva sara o koya, e kaya: “Na cava na nomuni dauveiqaravi moni kauaitaka kina na koli mate+ me vakataki au?”
9 E talatala sara na tui me kacivi mai o Sipa, na tamata nei Saula, e kaya vua: “Na ka kece e nei Saula kei na nona vuvale au sa solia vua na makubui nomu turaga.+
10 O na teivaka vua na qele, o iko, o ira na luvemu, kei ira na nomu dauveiqaravi, o na kumuna na ka e rawa mai kina, ena kedra kakana na vuvale nei makubui nomu turaga mera kana kina. Ia o Mefiposeci na makubui nomu turaga, ena kana tiko ga ena noqu teveli.”+
E 15 na luvena tagane o Sipa, e 20 na nona dauveiqaravi.+
11 E kaya o Sipa vua na tui: “Ena vakayacora na nomuni tamata na ka kece e vakarota na noqu turaga na tui vua na nona tamata me cakava.” E kana o Mefiposeci ena teveli i Tevita* me vaka e dua na luvenitui.
12 E dua tale ga na luvena tagane gone o Mefiposeci na yacana o Mika,+ ia o ira kece na tiko ena vale i Sipa era qai dauveiqaravi nei Mefiposeci.
13 E vakaitikotiko o Mefiposeci e Jerusalemi ni kana tiko ga ena teveli ni tui,+ e lokiloki na yavana ruarua.+
