iKarua ni Tui 11:1-21
11 E raica o Acalaia+ na tinai Esaia ni sa mate na luvena,+ e vakarau o koya me vakawabokotaki ira kece na kawa vakatui.*+
2 Ia o Jiosepa na luvei Tui Jorami, na ganei Esaia e kauti Joasi+ na luvei Esaia, e butakoci koya mai na kedra maliwa na luvenitui era vakarau vakamatei, e vunitaki koya tiko kei na marama dau mei koya ena rumunimoce e loma. Rau vunitaki koya me kua ni raici koya o Acalaia mani sega ni vakamatei.
3 Erau vuni tiko ga me ono na yabaki ena vale i Jiova, ni veiliutaki tiko ena vanua o Acalaia.
4 Ena ikavitu ni yabaki, e talatala sara o Jioiata mera lako yani na turaga ni vica vata na drau ena matayadra ni Karia kei na yadra*+ ni valenitui, era mani lako yani vua ena vale i Jiova. E veiyalayalati mera bubului ena vale i Jiova qai vakaraitaka vei ira na luvenitui.+
5 E vakaroti ira: “Qo na ka moni cakava: E dua na iwase vei kemuni moni yadra ena Siga ni Vakacecegu moni yadrava matua na valenitui,+
6 e dua tale na kena iwase mera tiko ena Matamata ni Yavu, e dua tale na kena iwase mera tiko ena matamata e dakudra na yadra. Oni na veisau yadra tiko moni yadrava na vale.
7 E rua na iwasewase e dodonu mera cegu ena Siga ni Vakacecegu mera yadrava matua na vale i Jiova mera taqomaka na tui.
8 Moni wavokita na tui, moni dui taura e ligamuni na nomuni iyaragi. Me vakamatei o koya e curu yani ena iyatu. Moni tiko vata ga kei na tui ena veivanua e lako kina.”*
9 Era vakayacora na turaga ni vica vata na drau+ na ka kece e vakarota o Jioiata na bete. Era dui kauta sara na nodra tamata era yadra ena Siga ni Vakacecegu kei ira na cegu ena Siga ni Vakacecegu, mera lako vei Jioiata na bete.+
10 E qai solia na bete vei ira na turaga ni vica vata na drau na moto kei na isasabai mokimokiti nei Tui Tevita e tu ena vale i Jiova.
11 Era duri tu na yadra+ ni valenitui, era dui taura tu e ligadra na nodra iyaragi, ena yasa imatau ni vale me yacova na yasa imawi ni vale volekata na icabocabonisoro,+ volekata tale ga na vale, era wavokita kece tu na tui.
12 E kauta sara mai na luvenitui o Jioiata+ qai biuta vua na isalanitui kei na iVakadinadina,*+ era buli koya me tui, era lumuti koya. Era tekivu vakasausau, era kaya: “Me bula balavu na tui!”+
13 Ni rogoca o Acalaia na nodra cici tiko na lewenivanua, e lako sara yani vei ira na lewenivanua ena vale i Jiova.+
14 Ni rai yani e raica na tui ni duri volekata tu na duru me vaka na kena ivalavala.+ Era tu volekata na tui o ira na turaga kei ira na dau uvu biukila,+ era marau tiko na lewenivanua kece, era uvuca tale tiko ga na biukila. E dresulaka na nona isulu o Acalaia, e tagicaka: “Na vere! Na vere!”
15 Ia o Jioiata na bete e vakaroti ira na turaga ni vica vata na drau,+ o ira na lesi ena mataivalu, e kaya vei ira: “Moni kauti koya tani ena loma ni iyatu, ke dua e muri koya me vakamatei ena iseleiwau!” Ni a kaya na bete: “Me kua ni vakamatei o koya ena vale i Jiova.”
16 Era mani vesuki koya, ni yaco yani ena vanua era dau curu kina na ose ina valenitui,+ era vakamatei koya e kea.
17 E mani cakava o Jioiata mera veiyalayalati kei Jiova na tui kei ira na lewenivanua+ mera tamata i Jiova tiko ga, e cakava tale ga e dua na nona veiyalayalati na tui kei ira na lewenivanua.+
18 Oti qori era lako kece na lewenivanua ina vale* i Peali mera basuka na nona icabocabonisoro,+ era vorovorolaka na kena ivakatakarakara,+ era vakamatei Matani tale ga na bete nei Peali+ ena mata ni icabocabonisoro.
E qai lesia na bete eso na iliuliu mera lewa na vale i Jiova.+
19 E kauti ira tale ga na turaga ni le vica vata na drau,+ na matayadra ni Karia, o ira na yadra ni valenitui,+ kei ira kece na lewenivanua mera kauta sobu na tui mai na vale i Jiova, era lako ina valenitui nira muria na nodra matamata na yadra ni valenitui. E dabe sara o koya ena nodra idabedabe na tui.+
20 Era marau tiko ga na lewenivanua kece, e sega ni tikoyavavala na koro, nira sa vakamatei Acalaia oti ena iseleiwau volekata na valenitui.
21 E tui o Joasi+ ni sa yabaki vitu.+
iVakamacala e ra
^ Ipe., “na kawa ni matanitu.”
^ Ipe., “daucici.”
^ Ipe., “ni lako yani se lako mai.”
^ Qo beka na ivolavivigi ni Lawa ni Kalou.
^ Se “burekalou.”
