iKarua ni Tui 14:1-29
14 Ena ikarua ni yabaki i Joasi+ na luvei Jioasi na tui Isireli, sa qai tui o Emasia na luvei Tui Joasi e Juta.
2 E tui ni sa yabaki 25, e veiliutaki e Jerusalemi me 29 na yabaki. Na yaca i tinana o Jioatani mai Jerusalemi.+
3 E vakayacora tiko ga na veika e donu ena mata i Jiova, e sega ga ni vakataki Tevita+ na tukana. E cakava o koya na ka kece a cakava o Joasi na tamana.+
4 Ia e sega ni kau tani na vanua cecere,+ era cabora tiko ga na lewenivanua na isoro kei na isoro kubou ena vanua cecere.+
5 Ni vakataudeitaki ga vua na matanitu me lewa, e mokuti ira sara na nona dauveiqaravi era mokuti tamana na tui.+
6 E sega ga ni vakamatea na luvedra na dau laba, me vaka na ivakaro i Jiova e volai ena ivola ni Lawa e vola o Mosese: “Mera kua ni vakamatei na tamanigone ena vuku i luvedra, mera kua ni vakamatei na gone ena vuku i tamadra, ia mera vakamatei ga ena nodra dui cala.”+
7 E mokuti ira na kai Itomi+ ena Buca ni Masima,+ era le 10,000 na tamata, e vakavuai Seila ena ivalu+ qai vakayacani me o Jokicieli me yacova mai na siga qo.
8 E qai tala eso na italai o Emasia vei Joasi na luvei Jioasi na luvei Jeu na tui Isireli, e kaya: “Lako mai me daru vakasota ena ivalu.”*+
9 E vakauta na itukutuku qo o Tui Joasi e Isireli vei Tui Emasia e Juta: “E talatala na cogadrogadro ni Lepanoni vua na sitari ni Lepanoni, ‘Solia mai na luvemu yalewa me wati luvequ tagane.’ Ia e lako mai e dua na manumanu kila ni Lepanoni qai butubutuka na cogadrogadro.
10 O mokuti Itomi+ dina o qai dokadokai iko kina. Mo marautaka na nomu lagilagi, ia mo tiko ga ena nomu vale.* Na cava o via vala kina mo druka, drau na druka vata kei Juta?”
11 A sega ni vakarorogo o Emasia.+
E mani lako cake o Tui Joasi e Isireli rau qai vakasota ena ivalu, o koya kei Tui Emasia e Juta mai Pecisemesi,+ na vanua vakaJuta.+
12 Era vakadrukai Juta na Isireli, era mani dui dro ina nodra vale.*
13 O Tui Joasi e Isireli e qai vesuki Tui Emasia e Juta na luvei Joasi na luvei Esaia e Pecisemesi. Erau lako sara i Jerusalemi qai botea na bai kei Jerusalemi mai na Matamata i Ifireimi+ me yacova yani na Matamata ni Ucunikoro,+ e 400 na kiupiti.*
14 E mani kauta kece na koula kei na siliva kei na iyaya kece e kune ena vale i Jiova kei na nona valeniyau na tui, vaka kina o ira na vesu tu. Sa qai lesu i Samaria.
15 Na vo ni itukutuku me baleti Joasi, na ka e cakava, na nona kaukaua kei na nona valuti Tui Emasia e Juta, e volai ena ivola ni itukutuku ni nodra gauna na tui Isireli.
16 E qai davo vata kei ira na tukana o Joasi, e bulu e Samaria+ kei ira na tui Isireli, e tui sara o Jerepoami*+ na luvena me sosomitaki koya.
17 E bula tale tiko me 15 na yabaki o Emasia+ na luvei Joasi na tui Juta, ni sa mate o Joasi na luvei Jioasi+ na tui Isireli.+
18 Na vo ni itukutuku me baleti Emasia, e volai ena ivola ni itukutuku ni nodra gauna na tui Juta.
19 E qai bukiveretaki o koya+ e Jerusalemi mani dro i Lakisi, ia e talai eso na tamata mera muri koya i Lakisi mera vakamatei koya e kea.
20 Era vakavodoki koya lesu mai ena ose me lai bulu i Jerusalemi kei ira na tukana ena Koro i Tevita.+
21 Era kauti Asaraia*+ na lewe i Juta kece ni se yabaki 16,+ era buli koya sara me tui me sosomitaki tamana o Emasia.+
22 E tarai Elaci tale+ qai vakasuka vei Juta ni sa davo oti na tui* kei ira na tukana.+
23 Ena ika15 ni yabaki i Emasia na luvei Joasi na tui Juta, sa qai tui mai Samaria o Jerepoami+ na luvei Tui Joasi e Isireli, e veiliutaki me 41 na yabaki.
24 E vakayacora tiko ga na ka ca ena mata i Jiova. E sega ni biuta na ivalavala ca kece i Jerepoami na luvei Nipati e vakavuna mera valavala ca kina na Isireli.+
25 E vakasuka o koya na iyalayala ni vanua nei Isireli e Lepo-emaci*+ me yacova yani na Wasa na Arapa,*+ me vaka ga na vosa i Jiova na Kalou ni Isireli a tukuna vua na nona dauveiqaravi o Jona+ na luvei Amitai, na parofita mai Kitaeferi.+
26 E raica o Jiova nira rarawa vakalevu na Isireli.+ E sega ni dua e vo me vukei Isireli, se o ira na vakaloloma se malumalumu.
27 Ia e yalataka o Jiova ni na sega ni bokoca na yacadra na Isireli e ruku i lomalagi.+ E vakabulai ira gona ena liga i Jerepoami na luvei Joasi.+
28 Na vo ni itukutuku me baleti Jerepoami, na ka kece a cakava, na nona kaukaua, na nona vala kei na nona vakasukai Tamasiko+ kei Emaci+ vei Juta e Isireli, e volai ena ivola ni itukutuku ni nodra gauna na tui Isireli.
29 E qai davo vata kei ira na tukana o Jerepoami, era tui Isireli, e tui sara o Sakaraia na luvena+ me sosomitaki koya.
iVakamacala e ra
^ Se “veiraimata.”
^ Se “valenitui.”
^ Ipe., “valelaca.”
^ Rauta ni 178 na mita (584 na fiti). Raica na iKuri B14.
^ Oya o Jerepoami na iKarua.
^ Kena ibalebale “Veivuke o Jiova.” E kacivi ena Usaia ena 2Tu 15:13, 2Ve 26:1-23, Ais 6:1, kei na Sak 14:5.
^ Oya na tamana o Emasia.
^ Oya na Wasa Tuitui, se na Waitui Mate.
^ Se “na icurucuru i Emaci.”
