iKarua ni Tui 4:1-44
-
Vakalevutaka o Ilaisa nona waiwai na yada (1-7)
-
Nona veikauaitaki na marama ni Sunemi (8-16)
-
Vakalougatataki na marama qori me dua na luvena tagane, e qai mate (17-31)
-
Vakabula tale o Ilaisa na gonetagane sa mate (32-37)
-
Vakasaqara o Ilaisa na sitiu me laukana (38-41)
-
Vakalevutaka o Ilaisa na madrai (42-44)
4 E tagi yani vei Ilaisa e dua na yalewa, na watina e dua na luve ni parofita,+ e kaya: “Sa mate na watiqu na nomuni dauveiqaravi, oni kila vinaka ni dau dokai* Jiova+ na nomuni dauveiqaravi. E lako mai o koya e dau solia na dinau me kauti rau na luvequ me nona bobula.”
2 E kaya sara o Ilaisa vua na yalewa: “Na cava meu cakava vei iko? Mo tukuna mai na cava e tu mai vale?” E kaya na yalewa: “E sega sara ga ni dua na ka e tu ena vale ni nomuni dauveiqaravi, e dua ga na saqa* waiwai.”+
3 E qai kaya o Ilaisa: “Mo lako i tuba, mo kerea mai eso na saqa lala vei ira kece na tiko volekati iko. Mo kauta mai vakalevu.
4 Mo lako i lomanivale mo sogota na katuba e dakumu kei rau na luvemu tagane. Mo tawana kece na saqa qori, mo biuta vakatikitiki na kena e sinai.”
5 E lako sara yani na yalewa qori.
Ni sogota oti o koya na katuba e dakuna kei rau na luvena, erau kauta yani vua na saqa, e livilivi tiko o koya.+
6 Ni sa sinai ga na saqa e tukuna o koya vua e dua na luvena: “Kauta tale mai vei au e dua na saqa.”+ Ia e kaya vua na luvena: “Sa oti na saqa.” Sa maca tale ga kina na waiwai.+
7 E lako yani na yalewa e tukuna sara vua na tamata ni Kalou dina, e kaya mai: “Mo lako, volitaka na waiwai mo sauma na nomu dinau, mo qai bula o iko kei rau na luvemu ena ka e vo.”
8 Dua na siga e lako o Ilaisa i Sunemi,+ e tiko e kea e dua na marama rogo, e cikevi koya sara me kana.+ Na levu ga ni nona tavali e kea, e dau lako kina me kana.
9 E kaya sara na marama qo vei watina: “Au kila ni tamata yalosavasava ni Kalou na turaga e dau tavali tiko va qo.
10 Au kerea me daru cakava e dua na rumu lailai ena delanivale+ daru qai biuta kina e dua na nona idavodavo, e dua na teveli, e dua na idabedabe kei na dua na itutu ni cina. Ena gauna ga e lako mai kina vei kedaru me lai tiko kina.”+
11 Dua na siga ni lako i kea o koya, e lako sara ina rumu ena delanivale me lai davo toka kina.
12 E mani kaya vei Kiesai+ na nona dauveiqaravi: “Mo kaciva mai na marama ni Sunemi+ qo.” E kacivi koya sara me mai tu e matana.
13 E kaya o Ilaisa vei Kiesai: “Yalovinaka mo kaya vua, ‘O sa ogaoga dina vei keirau ena ka kece qo.+ Dua na ka o vinakata?+ Dua na ka me tukuni vua na tui+ se vua na iliuliu ni mataivalu me baleti iko?’” E kaya sara na marama: “Au tiko vata ga kei ira na kainoqu.”
14 E tukuna o Ilaisa: “Na cava me caka vua?” E kaya sara o Kiesai: “E sega na luvena,+ sa qase tale ga o watina.”
15 E kaya o Ilaisa: “Mo kacivi koya mai.” E kacivi koya sara mai, ia e duri tiko ga ena matanikatuba.
16 E qai tukuna o Ilaisa: “Ena gauna vata qo ena yabaki mai qo o na mokota kina e dua na luvemu tagane.”+ Ia e kaya na marama qo: “Sega noqu turaga, o kemuni na tamata ni Kalou dina! Moni kua ni lasutaka na nomuni dauveiqaravi.”
17 E qai bukete na marama qo e vakasucuma sara e dua na luvena tagane ena gauna vata qori ena yabaki e tarava, me vaka ga na ka e tukuna vua o Ilaisa.
18 E tubu tiko na gone qori, ia ena dua na siga e lako yani vei tamana ni tiko kei ira na dautatamusuki.
19 E tukuna tiko ga vei tamana: “Na uluqu, oilei na uluqu!” E qai kaya o tamana vua na nona dauveiqaravi: “Mo keveti koya vei tinana.”
20 E keveti koya sara vei tinana, e tene tiko ga vei tinana me sigalevu, e qai mate.+
21 E lako cake o tinana me vakadavori koya ena idavodavo ni tamata ni Kalou dina,+ e sogota na katuba mai dakuna qai lako yani.
22 E kacivi watina sara, e kaya: “Yalovinaka mo tala mai vei au e dua na dauveiqaravi kei na dua na asa, meu lako totolo vua na tamata ni Kalou dina au na qai lesu tale mai.”
23 Ia e tukuna o watina: “Na cava o lai raici koya kina nikua? E sega ni vula vou+ se siga ni vakacecegu.” E kaya sara o koya: “Mo kua ni leqataka.”
24 E vakarautaka sara na idabedabe ni asa qai tukuna vua na nona dauveiqaravi: “Mo totolo yani. Mo kua ni vakamalua vakavo keu tukuna vei iko.”
25 E lako na marama qo vua na tamata ni Kalou dina e Ulu i Kameli. Ni raici koya yani vakayawa na tamata ni Kalou dina, e kaya sara vei Kiesai na nona dauveiqaravi: “Raica! Sa tu oya na marama ni Sunemi.
26 Yalovinaka, mo cici yani mo tavaki koya, mo tarogi koya, ‘O bulabula tiko? E bulabula tiko o watimu? E bulabula tiko o luvemu?’” E kaya sara o koya: “Keitou bulabula kece.”
27 Ni yaco yani vua na tamata ni Kalou dina ena ulunivanua, e taura matua sara na yavana.+ E toro voleka yani o Kiesai me biligi koya, ia e kaya na tamata ni Kalou dina: “Mo kua ni tarovi koya ni vusolo na lomana, e vunia vei au o Jiova, e sega ni tukuna vei au.”
28 E qai kaya na marama qo: “Au a kerea vua na noqu turaga me dua na luvequ? Au a sega ni tukuna, ‘Moni kua ni tukuna vei au na ka meu vakanuinuikara kina’?”+
29 E kaya sara o Ilaisa vei Kiesai: “Mo vesuka e tolomu na nomu isulu,+ mo taura e ligamu na noqu ititoko, mo lako yani. Ke o sotava e dua mo kua sara ni kidavaki* koya, ke kidavaki iko e dua, mo kua ni vosa vua. Mo lai biuta na noqu ititoko e mata i gonetagane.”
30 E kaya na tinai gonetagane: “Me vaka ni bula dina tiko o Jiova, oni bula tale tiko ga, au na sega ni biuti kemuni.”+ E tucake sara o koya me rau lako vata.
31 E liu sara o Kiesai qai biuta na ititoko e mata i gonetagane, ia e sega ni vosa se yavala.+ E lesu o koya me tavaki Ilaisa, e tukuna vua: “E sega ni yadra na gonetagane.”
32 Ni curu i vale o Ilaisa, sa davo matemate tu na gonetagane ena nona idavodavo.+
33 E curu i loma o koya, e sogota na katuba mai dakudrau, e masu sara vei Jiova.+
34 Oti e lako cake i delaniloga, e davoca na gone me sota na gusudrau, na matadrau kei na qeteqeteniligadrau, e kala tiko ga yani vua, sa qai tekivu katakata mai na yagona na gone.+
35 E veilakoyaki o Ilaisa e lomanivale, oti e lako cake e delaniloga qai kala tale yani vua. E suru vakavitu na gone, oti e rai na matana.+
36 E qai kacivi Kiesai o Ilaisa, e kaya vua: “Mo kaciva mai na marama ni Sunemi.” E kacivi koya, e lako sara yani vua. E kaya o Ilaisa: “Mo keveta na luvemu.”+
37 E curu yani na marama qo e tekiduru e yava i Ilaisa, e cuva vua ina qele, oti e keveta na luvena qai curu i tuba.
38 Ni lesu o Ilaisa i Kilikali, e dausiga na vanua.+ Era dabe tiko e matana na luvedra na parofita,+ e tukuna sara vua na nona dauveiqaravi:+ “Mo tokara na kuro levu mo vakasaqara na sitiu me kedra na luvedra na parofita.”
39 E lako sara e dua ina iteitei me beti co mai, e mani kunea e dua na wa sala e tubu wale tu qai betia mai kina na vago ni veikau, e sinai sara ga na nona isulu. E lesu yani, e musumusuka sara ena loma ni kuro sitiu, ni sega mada ga ni kila na ka qori.
40 Oti era taloca mera kania na tagane, ia nira tovolea ga na sitiu era qolouvaka: “Oilei kemuni na tamata ni Kalou dina, e gaga na ka e tiko e loma ni kuro.” Era sega ni kania rawa.
41 E mani kaya o Ilaisa: “Ni kauta mai na falawa.” E biuta sara ina loma ni kuro qai kaya: “Taloca yani mera kana.” Sa oti na kena gaga ena loma ni kuro.+
42 E lako mai Pealisalisa e dua na turaga,+ e kauta tiko yani vua na tamata ni Kalou dina na isevu ni madrai, e 20 na ibuli varile+ kei na dua na taga covuata bulabula.+ E kaya sara o Ilaisa: “Solia vei ira na tamata mera kana.”
43 Ia e kaya na nona dauveiqaravi: “Meu solia vakacava qo vei ira na le 100?”+ E kaya sara o koya: “Mo solia vei ira mera kania, ni qo na ka e tukuna o Jiova, ‘Era na kana, ena vo tale.’”+
44 E biuta sara o koya e matadra, era kana qai vo tale+ me vaka ga na vosa i Jiova.
iVakamacala e ra
^ Ipe., “rerevaki.”
^ Se “saqa gusu balavu.”
^ Rairai okati kina na veikidavaki balavu, na regu, na veimokomoko kei na veitalanoa balavu.
