iKarua ni Tui 9:1-37
9 E kaciva e dua na luve ni parofita o Ilaisa na parofita, e kaya vua: “Mo vesuka e tolomu na nomu isulu, mo vakatotolo mo taura na tavaya waiwai qo mo lako i Remoci-kiliati.+
2 Ni o yaco i kea, mo vaqarai Jeu+ na luvei Josafati na luvei Nimesai, mo curu yani mo kacivi koya mai vei ira na tacina, mo kauti koya ina rumu sara e loma.
3 Mo taura na tavaya waiwai mo livia e uluna, mo kaya, ‘Qo na ka e tukuna o Jiova: “Au sa lumuti iko mo tui Isireli.”’+ Mo qai dolava na katuba mo dro, kua tale ni wawa.”
4 E lako sara i Remoci-kiliati na dauveiqaravi ni parofita.
5 Ni curu yani, era dabe tu e kea na iliuliu ni mataivalu. E kaya o koya: “E dua na ka au via tukuna vei kemuni na iliuliu.” E taroga o Jeu: “O cei vei keimami?” E kaya o koya: “O kemuni na iliuliu.”
6 E tucake mai o Jeu me curu i lomanivale, e livia na dauveiqaravi na waiwai e uluna, e kaya vua, “Qo na ka e tukuna o Jiova na Kalou ni Isireli: ‘Au sa lumuti iko mo nodra tui na tamata i Jiova, mo nodra tui na Isireli.+
7 Mo mokuta na vuvale i Eapi na nomu turaga, au na sauma na nodra dra na noqu dauveiqaravi na parofita kei ira kece na dauveiqaravi i Jiova era mate ena liga i Jesepeli.+
8 Ena mate na vuvale taucoko i Eapi, au na muduka vei Eapi na tagane* kece, wili kina o ira na vakaloloma kei ira na malumalumu e Isireli.+
9 Au na cakava na vuvale i Eapi me tautauvata kei na vuvale i Jerepoami+ na luvei Nipati, me tautauvata kei na vuvale i Pasa+ na luvei Eaija.
10 Ena kani Jesepeli na koli ena tikiniqele e Jesirieli,+ ena sega ni dua me buluti koya.’” E dolava sara o koya na katuba qai dro yani.+
11 Ni lesu o Jeu vei ira na dauveiqaravi ni nona turaga, era tarogi koya: “E dua na leqa? Na cava e lako mai kina vei iko na tamata lialia qo?” E kaya vei ira: “Oni kila vinaka na turaga oya kei na ka e dau tukuna.”
12 Ia era kaya vua: “E sega ni dina qori! Yalovinaka mo tukuna mai.” E qai kaya: “Qo na ka e tukuna vei au, e tomana, ‘Qo na ka e tukuna o Jiova: “Au sa lumuti iko mo tui Isireli.”’”+
13 Era taura mai vakatotolo na nodra isulu ra qai biuta ena ikabakaba+ me butuka, era uvuca na davui,* era kaya: “Sa tui o Jeu!”+
14 E qai bukiveretaki Jorami o Jeu+ na luvei Josafati na luvei Nimesai.
E yadra tiko mai Remoci-kiliati+ o Jorami, o koya kei ira kece na Isireli ena vuku i Tui Eseli+ e Siria.
15 E lesu i Jesirieli o Tui Jorami+ me bula mai na nona mavoa era vakamavoataki koya kina na kai Siria ni valuti Tui Eseli e Siria.+
E kaya o Jeu: “Ke oni vakadonuya, me kua ni dua e dro mai na koro me lai tukuna qo i Jesirieli.”
16 E vodo o Jeu ena nona qiqinivalu me lako i Jesirieli ni davo tiko mai kea o Jorami ni mavoa tu, ia e lako sobu o Tui Esaia e Juta me lai raici Jorami.
17 Ni duri tiko na yadra ena valececere mai Jesirieli, e raica sara na ilala levu nei Jeu ni lako tiko yani. E kaya sara o koya: “E dua na ilala levu au raica.” E kaya o Jorami: “Tala e dua na dauvodo ose me tavaki ira, me tukuna, ‘Oni lako tiko mai ena vakacegu?’”
18 E lako sara na dauvodo ose me tavaki koya, e kaya: “Qo na ka e tukuna na tui, ‘Oni lako tiko mai ena vakacegu?’” Ia e kaya o Jeu: “Me icavai vei iko na ‘vakacegu’? Muri au mai!”
E lai tukutuku na yadra: “Sa yaco vei ira na italai, ia e sega ni lesu mai.”
19 E mani tala na ikarua ni dauvodo ose, e kaya ni yaco yani vei ira: “Qo na ka e tukuna na tui, ‘Oni lako tiko mai ena vakacegu?’” Ia e kaya o Jeu: “Me icavai vei iko na ‘vakacegu’? Muri au mai!”
20 E lai tukutuku na yadra: “Sa yaco vei ira na italai, e sega ga ni lesu mai, ia na vakau qiqinivalu e vaka na vakau qiqinivalu nei Jeu na makubui* Nimesai, ni vakau qiqinivalu vakalialia.”
21 E kaya o Jorami: “Vakarau!” E mani vakarautaki na nona qiqinivalu, erau lako sara yani o Tui Jorami e Isireli kei Tui Esaia+ e Juta ena nodrau dui qiqinivalu me rau tavaki Jeu. Erau sotavi koya ena tikiniqele nei Nepoci+ na kai Jesirieli.
22 Ni raici Jeu ga o Jorami, e kaya: “O lako tiko mai ena vakacegu Jeu?” Ia e kaya o koya: “Na cava mo vakacegu kina ni saqamua tiko na tinamu o Jesepeli+ qai levu na nona vakadraudrau?”+
23 E golea sara na nona qiqinivalu o Jorami me dro, e kaya vei Esaia: “Daru sa lawakitaki Esaia!”
24 E vakadretaka o Jeu na nona dakaititi qai vana na tadrua ni tabai Jorami, e laubasikata sara na utona na gasau mani cibati koya ga ena loma ni nona qiqinivalu.
25 E kaya sara vei Bitika na nona turaganivalu: “Mo laveti koya, mo biuti koya ena tikiniqele nei Nepoci na kai Jesirieli.+ Mo nanuma tiko, o kedaru ga daru a vodo tiko ena kareti e muri Eapi na tamana qai tukuna o Jiova na itukutuku bibi qo me baleti koya:+
26 ‘“Au raica dina enanoa na dra i Nepoci+ kei na dra i luvena,” e kaya o Jiova, “au na sauma+ vei iko ena tikiniqele qo,” e kaya o Jiova.’ Ia qo mo laveti koya, mo biuti koya ena tikiniqele me vaka na vosa i Jiova.”+
27 Ni raica qori o Tui Esaia+ e Juta, e dro ena gaunisala volekata na vale ni iteitei. (E qai cicimuri koya o Jeu, e kaya: “Moni mokuti koya tale ga!” Era mani mokuti koya ena nona qiqinivalu ni lako cake tiko i Kuri, volekati Ipiliami.+ E dro tiko ga i Mekito qai mate e kea.
28 Era kauti koya sara i Jerusalemi na nona dauveiqaravi ena qiqinivalu, era buluti koya ena nona ibulubulu vata kei ira na tukana ena Koro i Tevita.+
29 E qai tui Juta o Esaia+ ena ika11 ni yabaki ni veiliutaki i Jorami na luvei Eapi.)
30 E rogoca o Jesepeli+ ni lako yani i Jesirieli o Jeu.+ E boroya sara na matana ena iboro* loaloa, e ukutaka na uluna qai iro sobu ena katubaleka.
31 Ni curu yani ena matamata o Jeu, e kaya o Jesepeli: “Na cava e manati Simirai, a vakamatea na nona turaga?”+
32 E rai cake ena katubaleka o Jeu e kaya: “O cei e to vata kei au? O cei?”+ E iro sobu vua e rua se tolu na vakailesilesi ni valenitui.
33 E kaya o koya: “Dou kolotaki koya sobu!” Eratou mani kolotaki koya sobu, e tasika eso na nona dra ena lalaga kei na ose, e qai butubutuki koya o Jeu.
34 Oti qori e curu i loma o koya me kana me gunu. E kaya sara: “Yalovinaka, dou kauta na yalewa cudruvi qo me lai bulu. E luvenitui o koya.”+
35 Ia ni ratou lako yani me ratou buluti koya, sa tu ga na nona qavokavoka, na yavana kei na qeteqete ni ligana.+
36 Ni ratou lesu me ratou tukuna vua, e kaya o koya: “Me vakayacori kina na vosa i Jiova+ e tukuna vua na nona dauveiqaravi o Ilaija na turaga ni Tisipa, e kaya, ‘Ena kani Jesepeli na koli ena tikiniqele e Jesirieli.+
37 Ena vaka na maniwa na yago i Jesepeli ena dela ni vanua ena tikiniqele e Jesirieli, era na sega ni kaya rawa: “Qo o Jesepeli.”’”
iVakamacala e ra
^ Ipe., “dua e suasua e lalaga.” Na ivosavosa vakaIperiu ni veibeci me baleti ira na tagane.
^ Ipe., “ileu.”
^ Ipe., “luvena tagane o.”
^ Se “iboronimata.”
