iKarua ni Veigauna 10:1-19
-
Ra talaidredre na Isireli vei Riopoami (1-19)
10 E lako i Sikemi+ o Riopoami, nira lako kece na Isireli i Sikemi mera buli koya me tui.+
2 Ni rogoca ga o Jerepoami+ na luvei Nipati (se tiko ga mai Ijipita ni a drovaki Tui Solomoni),+ e lesu sara mai Ijipita o Jerepoami.
3 Era qai talatala me lako yani, e lako sara o Jerepoami kei ira kece na Isireli vei Riopoami, era kaya:
4 “E vakadredretaka o tamamuni na neimami icolacola.+ Ia ke oni vakarawarawataka na itavi dredre e lavaka o tamamuni, moni vakamamadataka na icolacola bibi e vakataqara vei keimami, keimami na qai qaravi kemuni.”
5 E tukuna vei ira o koya: “Moni lesu mai vei au ni oti e tolu na siga.” Era lako sara na tamata.+
6 E qai taro ivakasala o Tui Riopoami vei ira na qase era dau qaravi Solomoni na tamana ena gauna se bula kina, e kaya: “Na ivakasala cava oni nanuma meu tukuna vei ira na tamata qo?”
7 Era kaya vua: “Ke o yalovinaka vei ira na tamata qo, mo vakayalovinakataki ira, mo vosa vakavinaka tale ga vei ira, era na nomuni tamata tiko ga.”
8 Ia e sega ni muria o koya na ivakasala era vakasalataki koya kina na qase, e taro ivakasala ga vei ira na cauravou era susu vata, era sa nona italai tiko.+
9 E tarogi ira: “Na cava na nomuni ivakasala meda tukuna vei ira na tamata qo era kaya vei au: ‘Moni vakamamadataka na icolacola bibi e vakataqara vei keimami o tamamuni’?”
10 Era tukuna vua na cauravou era susu vata kei koya: “Qo na ka mo kaya vei ira na tamata era tukuna vei iko, ‘E vakabibitaka o tamamu na neimami icolacola, ia o kemuni moni vakamamadataka mada vei keimami,’ qo na ka mo tukuna vei ira, ‘Na iqaqaloniligaqu lailai ena levu, ena lailai na dibi tamaqu.
11 E vakataqara vei kemuni o tamaqu na icolacola bibi, ia au na kuria na nomuni icolacola. E kuitataki kemuni o tamaqu ena dali, ia au na kuitataki kemuni ena kuita e buki.’”
12 E lako o Jerepoami kei ira kece na tamata vei Riopoami ena ikatolu ni siga me vaka e tukuna na tui: “Moni lesu mai vei au ena ikatolu ni siga.”+
13 Ia e vosa vakaukaua vei ira na tui. E mani sega ni muria o Tui Riopoami na ivakasala era vakasalataki koya kina na qase.
14 E vosa vei ira me vaka na nodra ivakasala na cauravou, e kaya: “Au na vakabibitaka na nomuni icolacola, au na kuria. E kuitataki kemuni o tamaqu ena dali, ia au na kuitataki kemuni ena kuita e buki.”
15 E mani sega ni vakarorogo na tui vei ira na tamata, ni vakavuna na Kalou dina na veisau qo+ me vakayacora kina o Jiova na ka e tukuna vei Eaija+ na turaga ni Sailo me tukuna vei Jerepoami na luvei Nipati.
16 Ia ni sega ni vakarorogo na tui vei ira kece na Isireli, era kaya vua na tui: “Na cava na neimami ivotavota vei Tevita? E sega na neimami ivotavota vua na luvei Jese. Moni lesu yadua vua na nomuni kalou, kemuni na Isireli! Mo lewa ga na nomu vale, Tevita!”+ Era lesu sara na Isireli ina nodra vale.*+
17 Ia o Riopoami e lewai ira tiko ga na Isireli era tiko ena koro kece e Juta.+
18 E qai talai Atorami+ yani o Tui Riopoami, o koya e liutaki ira tiko na vakaroti mera cakacaka vua na tui, era qai vakaviriki koya ena vatu na Isireli me mate. E mani vodoka rawa na nona qiqinivalu o Tui Riopoami me dro i Jerusalemi.+
19 Era vorata tiko na Isireli na vuvale i Tevita me yacova mai na siga qo.
iVakamacala e ra
^ Ipe., “valelaca.”
