iKarua ni Veigauna 13:1-22
13 Ena ika18 ni yabaki i Tui Jerepoami, e buli me tui Juta o Apaija.+
2 E veiliutaki e Jerusalemi me tolu na yabaki. Na yaca i tinana o Maikaia+ na luvei Urieli mai Kipea.+ Erau veivaluvaluti o Apaija kei Jerepoami.+
3 E mani lako ena ivalu o Apaija kei na mataivalu e le 400,000 na tamataivalu qaqa era vakavulici.*+ E tuva ivalu tale ga o Jerepoami me valuti koya, era le 800,000 na tamataivalu qaqa era vakavulici.*
4 E duri o Apaija ena Ulu i Semaraimi, e tiko ena veiulunivanua e Ifireimi, e kaya: “Mo rogoci au Jerepoami kei kemuni kece na Isireli.
5 Vakaevei, oni kila ni o Jiova na Kalou ni Isireli e solia vei Tevita e dua na matanitu me lewai Isireli me tawamudu,+ vei koya kei ira na luvena tagane+ ena veiyalayalati ni masima?*+
6 Ia e vuki o Jerepoami+ na luvei Nipati, na dauveiqaravi nei Solomoni na luvei Tevita me vorata na nona turaga.+
7 Era soqoni tiko ga yani vua o ira na tamata vucesa, era macawa. Era mani kaukaua vei Riopoami na luvei Solomoni, ni se gone o Riopoami qai rerere, e sega ni vorati ira rawa.
8 “Ia qo oni nanuma moni valuta na matanitu i Jiova e tu ena ligadra na luvei Tevita, ni oni le levu qai tiko vei kemuni na luvenibulumakau koula e bulia o Jerepoami me nomuni kalou.+
9 Oni sega ni vakatalai ira na bete i Jiova,+ o ira na kawa nei Eroni, kei ira na Livai, oni qai lesia na nomuni bete me vakataki ira na lewe ni veivanua?+ O koya ga e lako mai ni kauta mai e dua na luvenibulumakau tagane kei na vitu na tamanisipi, ena rawa ni bete ni ka e sega ni kalou.
10 O keimami e neimami Kalou ga o Jiova,+ keimami sega ni biuti koya, o ira na neimami bete era kawa nei Eroni era veiqaravi tiko vei Jiova, o ira na Livai era tokoni ira ena cakacaka.
11 Era vakama na isoro kama vei Jiova ena veimataka kei na veiyakavi,+ vaka kina na ka boivinaka sara,+ e toka na madrai yatuni*+ ena dela ni teveli koula dina, era waqara na itutu ni cina koula+ kei na kena cina ena veiyakavi,+ ni keimami qarava tiko na neimami itavi vei Jiova na neimami Kalou, ia oni sa biuti koya.
12 Raica! e tokoni keimami na Kalou dina, e liutaki keimami, kei ira na nona bete era vakabiukila mera vakarogoya na ivalu moni valuti kina. Kemuni na lewe i Isireli, ni kua ni valuti Jiova na Kalou i tukamuni ni oni na sega ni qaqa.”+
13 Ia e talai ira na toka vuni o Jerepoami mera lako mai dakudra, mera toka e matadra na Juta ra qai toka mai dakudra o ira na toka vuni.
14 Nira vuki na Juta, era raica ni dodonu mera ravu ena ivalu e matadra vaka kina e dakudra. Era tagici Jiova+ sara nira uvuca tiko na bete na biukila me rogolevu.
15 Era kailavaka na Juta na ibolenivalu, nira kailavaka oti ga na Juta na ibolenivalu, e qai vakadrukai Jerepoami na Kalou dina kei ira kece na Isireli e mata i Apaija kei ira na Juta.
16 Era mani dro na Isireli e matadra na Juta qai soli ira e ligadra na Kalou.
17 E ravuti ira o Apaija kei ira na nona tamata ena veivakamatei levu, era balemate tiko ga na Isireli, e 500,000 na tamata vakavulici.*
18 Era mani druka ena gauna oya na Isireli, ia era qaqa na Juta nira vakararavi* vei Jiova na Kalou i tukadra.+
19 E cicimuri Jerepoami tiko ga o Apaija qai rawata mai vua eso na koro, o Peceli+ kei na kena tauni lalai,* o Jisana kei na kena tauni lalai, kei Ifironi+ kei na kena tauni lalai.
20 E sega ni qaqa tale o Jerepoami ena gauna i Apaija, e mokuti koya o Jiova mani mate.+
21 E kaukaua tiko ga o Apaija. E 14 na watina,+ e 22 na luvena tagane, e 16 na luvena yalewa.
22 Na vo ni itukutuku me baleti Apaija, na nona ivalavala kei na ka e tukuna, e volai ena itukutuku ni parofita o Ito.+
iVakamacala e ra
^ Ipe., “digitaki.”
^ Ipe., “digitaki.”
^ Oya na veiyalayalati tudei qai sega ni veisau.
^ Oya na madrai dauraici.
^ Ipe., “digitaki.”
^ Ipe., “ravi.”
^ Se “wavokita.”