iKarua ni Veigauna 18:1-34
18 E levu na iyau nei Josafati qai dokai vakalevu,+ ia e bukia o koya na isema ni vakawati vei Eapi.+
2 Oti e vica na yabaki e lako sobu o koya vei Eapi e Samaria,+ e cabora vakalevu o Eapi na sipi kei na bulumakau me baleti koya kei ira era tomani koya. E uqeti* koya sara me lako cake me valuti Remoci-kiliati.+
3 E qai kaya o Tui Eapi e Isireli vei Tui Josafati e Juta: “O na lako vata kei au i Remoci-kiliati?” E kaya sara o koya: “Daru duavata ga o kedaru, era duavata na noqu tamata kei ira na nomu tamata, keimami na tokoni iko ena ivalu.”
4 Ia e kaya o Josafati vua na tui Isireli: “Yalovinaka, mo taroga e liu na vosa i Jiova.”+
5 E soqoni ira sara na parofita na tui Isireli, e 400 na tamata, e tukuna vei ira: “Meda valuti Remoci-kiliati se meu kua?” Era kaya: “Moni lako cake, ena solia na Kalou dina e ligamuni na tui.”
6 E kaya sara o Josafati: “E tiko eke e dua na parofita i Jiova?+ Me daru tarogi koya tale ga.”+
7 E kaya sara na tui Isireli vei Josafati: “E tiko tale e dua na tamata+ me daru tarogi Jiova vua, ia au sega ni taleitaki koya ni sega ni dau parofisaitaka na ka vinaka me baleti au, na ka ca ga.+ Na yacana o Maikaia na luvena tagane o Imila.” Ia e kaya o Josafati: “Me kua ni vosa va qori na tui.”
8 E kaciva sara na tui Isireli e dua na vakailesilesi, e kaya: “Kauti Maikaia mai vakatotolo na luvei Imila.”+
9 E dabe toka na tui Isireli kei Josafati na tui Juta ena nodrau idabedabe vakaturaga ena rara ni butu covuata ena icurucuru ni matamata e Samaria, erau vakaisulu ni tui, era parofisai tiko e matadrau na parofita kece.
10 E qai bulia o Setekaia na luvei Kinana eso na ileu kaukamea me nona, e kaya: “Qo na ka e tukuna o Jiova, ‘O na cumuti ira na kai Siria ena ka qo mo vakawabokotaki ira.’”
11 Era parofisaitaka tale ga qori na vo kece ni parofita, era kaya: “Moni lako cake i Remoci-kiliati moni qaqa,+ ena solia o Jiova e ligamuni na tui.”
12 E kaya vei Maikaia na italai e lai kacivi koya mai: “Raica! E duavata ga na ka era tukuna na parofita vua na tui, e rogo vinaka vua. Yalovinaka, na nomu vosa me tautauvata kei na nodra vosa,+ mo cavuta na ka vinaka.”+
13 Ia e kaya o Maikaia: “Me vaka ni bula dina tiko o Jiova, na ka ga e tukuna na noqu Kalou, au na cavuta.”+
14 E qai lako yani o koya vua na tui, e tarogi koya na tui: “Maikaia, me keimami lai valuti Remoci-kiliati, seu kua?” E tukuna sara o koya: “Moni lako cake moni qaqa, era na soli e ligamuni.”
15 E mani kaya na tui: “Au tukuna vakavica vei iko mo bubului mo kaya vei au na ka dina ena yaca i Jiova?”
16 E kaya o Maikaia: “Au raici ira kece na Isireli nira veiseyaki tu ena veiulunivanua me vaka na sipi e sega na kedra ivakatawa.+ E kaya o Jiova: ‘E sega na nodra turaga. Mera dui lesu ena vakacegu ina nodra vale.’”
17 E qai kaya na tui Isireli vei Josafati: “Au a sega ni tukuna vei iko, ‘Ena sega ni parofisaitaka o koya na ka vinaka me baleti au, na ka ca ga’?”+
18 E kaya sara o Maikaia: “Moni rogoca na vosa i Jiova: Au raici Jiova ni dabe tiko ena nona idabedabe vakaturaga,+ era duri kece tu na mataivalu ni lomalagi+ ena nona imatau kei na nona imawi.+
19 E qai kaya o Jiova, ‘O cei ena vakacalai Tui Eapi e Isireli me na lako cake qai bale e Remoci-kiliati?’ E dua e kaya e dua na ka, e dua tale e kaya e duatani na ka.
20 E toso i liu e dua na kabula vakayalo*+ me duri ena mata i Jiova, e kaya, ‘Au na vakacalai koya.’ E tarogi koya o Jiova, ‘O na cakava vakacava?’
21 E kaya o koya, ‘Au na lako yani, au na dua na yalo lasulasu e gusudra na nona parofita kece.’ E mani kaya o koya, ‘O na vakacalai koya, o na rawai koya tale ga. Mo lako yani mo cakava qori.’
22 E qai vakacuruma o Jiova e dua na yalo lasulasu ena gusudra na nomuni parofita qo,+ ia e tukuna o Jiova ni oni na leqa kina.”
23 E toso yani o Setekaia+ na luvei Kinana, e sabica na balu+ i Maikaia+ qai kaya: “Ena sala cava e biuti au kina na yalo i Jiova me vosa vei iko?”+
24 E kaya o Maikaia: “Raica! O na raica ena siga oya na sala ni o na curu ena rumu sara e loma mo vuni.”
25 E qai kaya na tui Isireli: “Dou kauti Maikaia dou soli koya vei Emoni na turaganikoro kei Joasi na luvenitui.
26 Dou kaya vei rau, ‘Qo na ka e tukuna na tui: “Drau biuta na tamata qo e valeniveivesu,+ drau vakalailaitaka na kena iwasewase ni madrai kei na mena wai meu lesu mada mai ena vakacegu.”’”
27 Ia e kaya o Maikaia: “Ke oni lesu mai ena vakacegu, e sega ni vosa vei au o Jiova.”+ E kaya tale: “Moni rogoca kece na lewe ni veivanua.”
28 E mani lako cake na tui Isireli kei Josafati na tui Juta i Remoci-kiliati.+
29 E tukuna sara na tui Isireli vei Josafati: “Au na vakalecaleca au na qai lako ina ivalu, ia o iko mo dara na nomu isulu vakatui.” E mani vakalecaleca na tui Isireli, erau lako sara ina ivalu.
30 Ia na tui Siria e vakaroti ira na turaga ni nona qiqinivalu: “Moni kua ni valuta e dua e lailai se levu, na tui Isireli ga.”
31 Nira raici Josafati ga na turaga ni qiqinivalu, era kaya lo: “Qo na tui Isireli.” Era mani vuki mera valuti koya, e kere veivuke sara o Josafati+ qai vukei koya o Jiova, e vagolei ira na Kalou mera kua ni lako vua.
32 Nira raica ga na turaga ni qiqinivalu ni sega ni tui Isireli oya, era suka sara mera kua ni muri koya.
33 Ia e vanataka wale* na nona dakaititi e dua na tamata mani lauta na tui Isireli ena isema ni nona isulunivalu. E mani kaya na tui vei koya e kauta tiko na qiqinivalu: “Mo vuki mo kauti au tani mai na ivalu* niu sa mavoa vakaca.”+
34 E katakata na ivalu ena siga taucoko oya, e vakaduri tiko ga na tui ena qiqinivalu ni vakanamata tu vei ira na kai Siria me yacova na yakavi, e qai mate ni sa dromu na matanisiga.+
