iKarua ni Veigauna 19:1-11
19 E mani lesu vakavinaka* o Tui Josafati mai Juta+ ina nona vale* i Jerusalemi.
2 E lako yani vua na dauraivotu o Jeu+ na luvei Ananai+ me tavaki koya, e kaya vei Tui Josafati: “Vakaevei, e dodonu moni vukei ira na dau caka ca,+ moni lomani ira na cati Jiova?+ Ena vuku ni ka qo ena cudruvi kemuni o Jiova.
3 Ia e laurai vei kemuni eso na ka vinaka,+ ni oni kauta tani na duru ni sokalou* mai na vanua, oni vakarautaka tale ga na lomamuni* moni qara na Kalou dina.”+
4 E tiko ga e Jerusalemi o Josafati, e lako tale vei ira na lewenivanua mai Pieri-sepa me yaco ina veiulunivanua e Ifireimi,+ me vakalesui ira vei Jiova na Kalou i tukadra.+
5 E lesi ira tale ga na turaganilewa ena vanua taucoko ena koro vakabai kece e Juta, ena koro yadua.+
6 E qai tukuna vei ira na turaganilewa: “Qarauna vinaka na ka oni cakava tiko, ni oni sega ni lewa ena vuku ni tamata, ena vuku i Jiova ga, e tokoni kemuni ena ka oni vakatulewataka.+
7 Ia moni rerevaki Jiova.+ Ni qarauna na ka oni cakava, ni o Jiova na noda Kalou e sega ni dau lewa ca,+ e sega ni veivakaduiduitaki,+ e sega ni dau vaqumi.”+
8 E lesia tale ga o Josafati e Jerusalemi eso na Livai, na bete, kei na so na turaga ni mataqali i tamadra na Isireli mera turaganilewa ena vuku i Jiova, mera rogoca na nodra kisi na lewenivanua e Jerusalemi.+
9 E vakaroti ira o koya: “Qo na ka moni cakava ni oni rerevaki Jiova ena yalodina kei na lomamuni taucoko:
10 Nira kauta yani vei kemuni na tacimuni era tiko ena nodra koro e dua na kisi ni vakadavedra,+ se na taro me baleta na lawa, na ivakaro, na ivunau, se na lewa, moni vakasalataki ira mera kua ni cala ena mata i Jiova de cudruvi kemuni kei ira na tacimuni. Qo na ka moni cakava moni kua ni cala kina.
11 Ia qo me lewa vei kemuni na ka kece me baleti Jiova o Amaraia na iliuliu ni bete.+ O Sepataia na luvei Isimeli na iliuliu ni vuvale i Juta ena lewa na ka kece me baleta na tui. Era na lewai kemuni na Livai. Moni kaukaua moni cakava sara, me tokoni ira na caka vinaka o Jiova.”+
iVakamacala e ra
^ Se “ena vakacegu.”
^ Se “valenitui.”
^ Raica na iVakamacala ni Vosa.
^ Se “nakita e lomamuni.”
