iKarua ni Veigauna 2:1-18
-
Vakavakarau ina tara valenisoro (1-18)
2 E vakarota sara o Solomoni me tara e dua na vale ena yaca i Jiova+ kei na dua na nona vale* ni matanitu.+
2 E digia o Solomoni e 70,000 na tamata cakacaka,* e 80,000 na dauta vatu ena ulunivanua,+ kei na 3,600 me nodra iliuliu.+
3 E talatala tale ga o Solomoni vei Airami+ na tui Taia: “Mo cakava vei au na ka o cakava vei Tevita na tamaqu ni o vakauta vua na kau sitari me tara kina e dua na vale* me tiko kina.+
4 Ia qo au sa tara e dua na vale ena yaca i Jiova na noqu Kalou meu vakatabuya me nona, meu vakama e matana na ka boivinaka sara,+ me tu tale ga kina na madrai yatuni,*+ me cabori kina na isoro kama ena mataka kei na yakavi,+ ena Siga ni Vakacecegu,+ ena vula vou,+ kei na gauna kece ni soqo+ vei Jiova na neimami Kalou. Qo na nodra ilesilesi na Isireli me tawamudu.
5 Na vale au tara ena uasivi, ni uasivi ira kece na vo ni kalou na neimami Kalou.
6 O cei ena tara rawa vua e dua na vale? Ni sega ni rauti koya mada ga na lomalagi kei na veilomalagi,+ o cei o yau meu tara vua e dua na vale, na vanua me vakamai kina na isoro?
7 Mo tala mai vei au e dua na matai e kenadau ena cakacaka ni koula, na siliva, na kopa,+ na kaukamea, na vutinisipi lokaloka, na wa damudamu kata, na wa karakarawa, kei na dua e kila na ceuceu. Ena cakacaka mai Juta kei Jerusalemi kei ira na noqu era kenadau ena cakacaka vakamatai, e digitaki ira o Tevita na tamaqu.+
8 Mo vakauta mai vei au na kau sitari, na junipa+ kei na yasi+ mai Lepanoni niu kila vinaka nira kenadau na nomu dauveiqaravi ena ta kau ni Lepanoni.+ Era na cakacaka vata na noqu dauveiqaravi kei ira na nomu dauveiqaravi+
9 mera vakarautaka vakalevu vei au na kau, ni vale au tara qo ena totoka vakaoti.
10 Raica! Au na vakarautaka na kedra kakana na nomu dauveiqaravi+ era dauta kau: e 20,000 na ko* witi, e 20,000 na ko varile, e 20,000 na paca* waini, kei na 20,000 na paca waiwai.”
11 E vola o Airami na tui Taia na itukutuku qo qai vakauta vei Solomoni: “Ni lomani ira na nona tamata o Jiova e digi iko kina mo nodra tui.”
12 E qai kaya o Airami: “Me vakacaucautaki ga o Jiova na Kalou ni Isireli e bulia na lomalagi kei na vuravura, ni solia vei Tui Tevita e dua na gone vuku,+ e yalomatua qai tu vua na kila,+ ena tara na vale i Jiova kei na dua na nona vale ni matanitu.
13 Ia au sa tala yani e dua na matai, e tu vua na kila, na Airamiapi,+
14 e luvena tagane e dua na yalewa ni Tani, ia na tamana e turaga ni Taia, e kenadau ena cakacaka ni koula, ena siliva, ena kopa, ena kaukamea, ena vatu, ena kau, ena vutinisipi lokaloka, ena wa karakarawa, ena isuludina, kei na wa damudamu kata.+ E kenadau ena veimataqali ceuceu, me ceuta na ibulibuli e soli vua.+ Ena cakacaka vata kei ira na nomu matai o koya, kei ira na matai ni noqu turaga o Tevita na tamamu.
15 Me solia mada na noqu turaga na witi, na varile, na waiwai, kei na waini e yalataka vei ira na nona dauveiqaravi.+
16 Keimami na taya na kau mai Lepanoni+ me vaka na kena levu o vinakata, keimami na vakauta yani vei iko e wasawasa me vaka na bilibili me yaco i Jopa,+ o na qai kauta cake i Jerusalemi.”+
17 Ia o Solomoni e mani wiliki ira kece na vulagi era tiko ena vanua o Isireli+ me vaka ga e cakava o Tevita na tamana,+ e laurai nira le 153,600.
18 E lesia sara e 70,000 mera tamata cakacaka,* e 80,000 mera dauta vatu+ ena veiulunivanua, kei na 3,600 na iliuliu me raici ira na cakacaka tiko.+
iVakamacala e ra
^ Se “valenitui.”
^ Se “na daucolacola.”
^ Se “valenitui.”
^ Oya na madrai dauraici.
^ Se “mera daucolacola.”
