iKarua ni Veigauna 23:1-21
23 Ena ikavitu ni yabaki, e yaloqaqa mai o Jioiata qai veiyalayalati kei ratou na turaga ni vica vata na drau,+ oya o Asaraia na luvei Jiroame, o Isimeli na luvei Jionanai, o Asaraia na luvei Opeti, o Mesea na luvei Ataia, kei Ilisafati na luvei Sikiri.
2 Eratou qai lako yani e Juta taucoko me ratou kumuni ira vata na Livai+ mai na koro kece e Juta kei ira na turaga ni mataqali e Isireli. Nira yaco i Jerusalemi,
3 era veiyalayalati+ kei na tui na ivavakoso taucoko ena vale ni Kalou dina, e qai kaya vei ira o koya:
“Raica! Ena veiliutaki na luvenitui me vaka e yalataka o Jiova vei ira na luvei Tevita.+
4 Qo na ka moni cakava: E dua na kena iwase vei kemuni na bete kei na Livai oni veiqaravi+ ena Siga ni Vakacecegu moni ivakatawa ni katuba,+
5 e dua tale na kena iwase oni na tiko ena valenitui,+ e dua tale na kena iwase oni na tiko ena Matamata ni Yavu, era na tiko na lewenivanua kece ena raranivale i Jiova.+
6 Me kua ni dua e curu ena vale i Jiova, o ira ga na bete kei ira na Livai era veiqaravi tiko.+ O ira ga qo era na curu nira savasava, o ira kece na lewenivanua era na qarava tiko ga na nodra itavi vei Jiova.
7 Mera wavokita na tui na Livai, mera taura yadua e ligadra na nodra iyaragi. Me vakamatei o koya e curu yani e vale. Moni tiko vata kei na tui ena vanua ga e lako kina.”*
8 Era vakayacora na Livai kei ira kece na Juta na ka e vakarota o Jioiata na bete. Era dui kauta sara na nodra tamata era veiqaravi ena Siga ni Vakacecegu kei ira na sega ni veiqaravi ena Siga ni Vakacecegu,+ ni sega ni vakasuka na iwasewase qori+ o Jioiata na bete mai na nodra itavi.
9 E qai solia o Jioiata na bete vei ratou na turaga ni vica vata na drau+ na moto, na isasabai lalai,* kei na isasabai mokimokiti nei Tui Tevita+ era tu ena vale ni Kalou dina.+
10 E qai lesi ira kece na lewenivanua o koya mera dui taura na nodra iyaragi, mai na yasa imatau ni vale ina yasa imawi ni vale volekata na icabocabonisoro, volekata na vale, mera wavokita tu na tui.
11 Era qai kauta mai na luvenitui,+ era biuta vua na isalanitui kei na iVakadinadina,*+ era buli koya sara me tui, eratou lumuti koya o Jioiata kei ratou na luvena. Eratou kaya: “Me bula balavu na tui!”+
12 Ni rogoca o Acalaia na nodra cici tiko na lewenivanua mera vakacaucautaka na tui, e lako sara yani vei ira na lewenivanua ena vale i Jiova.+
13 E raica o koya ni duri volekata tu na tui na nona duru ena icurucuru. Era tu volekata na tui na turaga+ kei ira na uvu biukila, era marau tiko na lewenivanua kece,+ era uvuca tiko na biukila, era liutaka tiko na veivakacaucautaki o ira na daulagasere era vakaiyaya ni qiriqiri. E dresulaka sara na nona isulu o Acalaia, e kailavaka: “Na vere! Na vere!”
14 Ia o Jioiata na bete e kauti ratou mai na turaga ni vica vata na drau, o ratou na lesi me ratou lewa na mataivalu, e kaya vei ratou: “Mo dou kauti koya tani ena loma ni iyatu, ke dua e muri koya dou vakamatei koya ena iseleiwau!” Ni a kaya na bete: “Me kua ni vakamatei o koya ena vale i Jiova.”
15 Era mani vesuki koya, ni yaco yani o koya ena icurucuru ni ose ena valenitui, era vakamatei koya sara e kea.
16 E qai cakava o Jioiata e dua na veiyalayalati ena vukuna, o ira na lewenivanua kece, kei na tui mera tamata i Jiova tiko ga.+
17 Oti qori era lako kece na lewenivanua ina vale* i Peali mera basuka,+ mera vorovorolaka na nona icabocabonisoro kei na kena ivakatakarakara,+ era qai vakamatei Matani na bete i Peali+ ena mata ni icabocabonisoro.
18 E mani lesi ira na bete kei ira na Livai o Jioiata mera lewa na vale i Jiova, o ira e lesia vakaiwasewase o Tevita mera lewa na vale i Jiova mera cabora na isoro kama i Jiova+ me vaka e volai ena Lawa e vola o Mosese+ nira marau tiko ra qai lagasere me vaka e vakarota o Tevita.
19 E biuti ira tale ga na ivakatawa ni matamata+ volekata na matamata ni vale i Jiova, me kua ni curu kina e dua e sega ni savasava ena dua na ka.
20 E kauti ratou na turaga ni vica vata na drau,+ o ira na turaga, o ira na iliuliu ni lewenivanua, kei ira kece na lewenivanua mera kauta sobu na tui mai na vale i Jiova. Era curu ena matamata e cake mera lako ina valenitui ra qai vakadabera na tui ena idabedabe vakaturaga+ ni matanitu.+
21 Era marau vakalevu na lewenivanua kece, e sega ni tikoyavavala na koro nira sa vakamatei Acalaia oti ena iseleiwau.
iVakamacala e ra
^ Ipe., “ni lako yani se lako mai.”
^ Na isasabai lalai era dau taura na dauvanataka na dakaititi.
^ Qo beka na ivolavivigi ni Lawa ni Kalou.
^ Se “ina burekalou.”
