iKarua ni Veigauna 25:1-28
25 E tui o Emasia ni sa yabaki 25, e veiliutaki e Jerusalemi me 29 na yabaki. Na yaca i tinana o Jiotani mai Jerusalemi.+
2 E vakayacora tiko ga na veika e donu ena mata i Jiova, ia e sega ni vu mai lomana.
3 Ni vakataudeitaki ga vua na matanitu, e vakamatei ira na nona dauveiqaravi era vakamatei tamana na tui.+
4 Ia e sega ni vakamatea na luvedra me vaka na ka e volai ena Lawa, ena ivola i Mosese, e vakarota kina o Jiova: “Mera kua ni mate na tamanigone ena vukudra na luvedra, mera kua ni mate na gone ena vukudra na tamadra, ia mera dui mate ga ena nodra dui ivalavala ca.”+
5 E kumuni ira vata na Juta o Emasia, e tuvai ira me vaka na mataqali i tukadra, na turaga ni vica vata na udolu kei na turaga ni vica vata na drau e Juta kei Penijamini taucoko.+ E wiliki ira mai na yabaki 20 lako cake,+ e raica nira le 300,000 na tamataivalu vakavulici* mera lewe ni mataivalu, era vakayagataka rawa na moto kei na isasabai lelevu.
6 E sauma tale ga e 100,000 na tamataivalu qaqa mai Isireli ena 100 na taledi* siliva.
7 Ia e lako yani vua e dua na tamata ni Kalou dina, e kaya: “Kemuni na tui, me kua ni lako vata kei kemuni na mataivalu ni Isireli+ ni sega ni tokoni Isireli o Jiova, se dua na Ifireimi.
8 Ia moni lako duadua, moni yavala, moni yaloqaqa ena ivalu. De vakavuna na Kalou dina moni bale e matana na meca, ni tu vua na Kalou na kaukaua me veivuke+ se veivakabalei.”
9 E kaya sara o Emasia vua na tamata ni Kalou dina: “Vakacava ga na 100 na taledi au solia vei ira na sotia ni Isireli?” E kaya na tamata ni Kalou dina: “E rawa ni levu tale e solia vei kemuni o Jiova mai na kena qo.”+
10 E mani vakasukai ira na sotia era lako yani vua mai Ifireimi o Emasia, mera lesu ina nodra vanua. Ia dua na ka na nodra cudruvi Juta, era lesu sara ina nodra dui vanua ena cudru katakata.
11 E yaloqaqa mai o Emasia, e liutaki ira na nona sotia ina Buca ni Masima+ qai mokuta e 10,000 na lewe i Sia.+
12 E 10,000 tale era kauta vakavesu na Juta. Era kauti ira ina barinivatu ra qai kolotaki ira mai na barinivatu, era dadasilasila kece.
13 Ia o ira na sotia a vakatalai ira lesu o Emasia mera kua ni tomani koya ina ivalu,+ era sikabotea na koro e Juta, mai Samaria+ me yaco sara i Pecioroni,+ era mokuta e 3,000 na lewenivanua ra qai yauta e levu sara na iyau.
14 Ni lesu mai o Emasia na mokuti ira na kai Itomi, e kauta mai na nodra kalou na lewe i Sia qai vakaduria me nona kalou,+ e tekivu cuva e matadra, e cabora vei ira na isoro kubou.
15 E qai waqa na cudru i Jiova vei Emasia, e mani tala e dua na parofita me tukuna vua: “Na cava o muria kina na nodra kalou na lewenivanua nira sega ni vakabulai ira na nodra tamata mai ligamu?”+
16 Ni se vosa tiko ga vua, e kaya na tui: “Keitou lesi iko mo daunivakasala ni tui?+ Sa rauta!+ Na cava mera mokuti iko kina?” E mani vakasuka na parofita ia e kaya: “Au kila ni sa lewa na Kalou me vakamatei kemuni ni oni cakava na ka qo, oni sega ni rogoca na noqu ivakasala.”+
17 Ni taro ivakasala oti o Tui Emasia e Juta vei ira na nona daunivakasala, e talatala sara vei Joasi na luvei Jioasi na luvei Jeu na tui Isireli, e kaya: “Lako mai me daru vakasota ena ivalu.”*+
18 E vakauta na itukutuku qo o Tui Joasi e Isireli vei Tui Emasia e Juta: “E talatala na cogadrogadro mai Lepanoni vua na sitari ni Lepanoni, ‘Mo solia na luvemu yalewa me wati luvequ tagane.’ Ia e lako mai e dua na manumanu kila ni Lepanoni qai butubutuka na cogadrogadro.
19 O tukuna, ‘Raica! Au sa mokuti Itomi.’+ E mani dokadoka na lomamu, o vinakata mo vakalagilagi. Ia qo mo tiko ga ena nomu vale.* Na cava o via veivala kina mo bale, mo drau bale vata kei Juta?”
20 E sega ga ni vakarorogo o Emasia+ ni vu mai vua na Kalou dina me soli ira e ligana na meca,+ nira muria na nodra kalou na Itomi.+
21 E mani lako cake o Tui Joasi e Isireli rau qai vakasota ena ivalu kei Tui Emasia e Juta mai Pecisemesi,+ ena vanua vakaJuta.
22 E vakadrukai Juta o Isireli, era mani dui dro ina nodra vale.*
23 O Tui Joasi mai Isireli e qai vesuki Tui Emasia e Juta na luvei Joasi na luvei Jioasi* e Pecisemesi. E kauti koya sara i Jerusalemi, e botea na bai kei Jerusalemi mai na Matamata i Ifireimi+ me yacova yani na Matamata ni Ucunikoro,+ e 400 na kiupiti.*
24 E kauta kece o koya na koula, na siliva, na iyaya kece e kune ena vale ni Kalou dina kei* Opeti-itomi, na iyau ena valenitui+ kei ira na vesu tu. E qai lesu i Samaria.
25 E bula tiko me 15 na yabaki o Emasia+ na luvei Joasi na tui Juta, ni sa mate o Joasi+ na luvei Jioasi na tui Isireli.+
26 Na vo ni itukutuku me baleti Emasia, na kena itekivu kei na kena iotioti, raica! e volai ena nodra iVola na Tui Juta kei Isireli.
27 Ena gauna e gole tani kina o Emasia me kua ni muri Jiova, era qai bukia na kena vere+ e Jerusalemi, e dro sara i Lakisi, ia era tala eso mera muri koya i Lakisi ra qai vakamatei koya e kea.
28 Era kauti koya lesu ena ose, era buluti koya kei ira na tukana ena koro e Juta.
iVakamacala e ra
^ Ipe., “digitaki.”
^ Se “daru veiraimata.”
^ Se “valenitui.”
^ Ipe., “valelaca.”
^ E vakatokai tale ga me o Esaia.
^ Se “e qarava o.”