iKarua ni Veigauna 26:1-23
26 Era kauti Usaia+ na lewe i Juta kece ni sa yabaki 16 mera buli koya me tui me sosomitaki tamana o Emasia.+
2 E tarai Eloci+ tale o koya qai vakasuka vei Juta ni sa davo oti na tui* kei ira na tukana.+
3 E tui o Usaia+ ni sa yabaki 16, e veiliutaki e Jerusalemi me 52 na yabaki. Na yaca i tinana o Jikolaia mai Jerusalemi.+
4 E vakayacora tiko ga na ka e donu ena mata i Jiova me vaka ga na ka e cakava o Emasia na tamana.+
5 E vakasaqara tiko ga na Kalou ena gauna i Sakaraia, o koya e vakavulici Usaia me doka* na Kalou dina. Ena gauna e vakasaqarai Jiova tiko kina, e tokoni koya na Kalou dina me rawa na nona sasaga.+
6 E lako yani me valuti ira na kai Filisitia,+ e basuka na bai e Kaca,+ na bai e Japine,+ kei na bai e Asoto.+ E qai tara eso na koro ena vanua o Asoto kei na kedra maliwa na kai Filisitia.
7 E vukei koya tiko ga na Kalou dina me valuti ira na kai Filisitia, me valuti ira na kai Arapea+ era tiko e Kuripeali, me valuti ira tale ga na Meunimi.
8 Era solia sara na Amoni+ na ivakacavacava vei Usaia. E rogo sara o koya i Ijipita ni rui levu na nona kaukaua.
9 E tara tale ga o Usaia eso na valececere+ e Jerusalemi volekata na Matamata ni Ucunikoro,+ na Matamata ni Buca,+ kei na Duru qai baitaka.
10 E tara tale ga eso na valececere+ ena vanua talasiga, e kelia* e levu na mataniwai (ni levu sara na nona manumanu), e cakava tale ga qori ena Sefila kei na vanua bucabuca.* Era tiko na nona dauteitei kei ira na dausamaki vaini ena veiulunivanua, vaka kina e Kameli ni taleitaka o koya na teitei.
11 E vakarau tale ga ina ivalu na mataivalu nei Usaia. Era dau lako vakaiwasewase ena ivalu. E wiliki+ ira o Jaeli na vunivola+ kei Mesea na vakailesilesi qai volai ira, ena ivakaro nei Enanaia, e dua na nona turaga vakaitutu na tui.
12 Na kedra iwiliwili kece na turaga ni mataqali i tamadra era lewai ira na tamata qaqa qo era le 2,600.
13 Era le 307,500 na lewe ni mataivalu era vakarorogo vei ira qori, na mataivalu qaqa me tokona na tui me valuta na meca.+
14 E vakarautaka o Usaia vei ira na mataivalu taucoko na isasabai, na moto,+ na isala, na isulunivalu,+ na dakaititi, kei na vatu ni irabo.+
15 E cakava tale ga e Jerusalemi na iyaragi ni ivalu era bulia na kenadau; e biu ena dela ni valececere+ kei na tutu ni bai me rawa ni vanataka na gasau kei na vatu lelevu. E mani kuruvaki vakayawa na kena irogorogo ni a vukei vakalevu o koya me kaukaua kina.
16 Ia ni kaukaua ga o koya, e qaciqacia mai na lomana me leqa kina, e sega ni yalodina vei Jiova na nona Kalou ni curu ena valenisoro i Jiova me vakama na ka boivinaka ena icabocabo ni ka boivinaka.+
17 E muri koya sara yani o Asaraia na bete kei na 80 tale na bete yaloqaqa i Jiova.
18 Era saqati Tui Usaia, era kaya vua: “E sega ni nomuni itavi Usaia moni vakama na ka boivinaka vei Jiova!+ E nodra itavi ga na bete nira kawa i Eroni,+ era vakatabui. Moni biuta na valenisoro ni oni sa tawayalodina, ena sega ni dokai kemuni na Kalou o Jiova ena ka qo.”
19 Ia e cudru vakalevu o Usaia ni se taura tu ga na itawatawa ni ka boivinaka me vakamai kina na ka boivinaka,+ ni se cudruvi ira tiko ga na bete sa tubura mai na yadrena na vukavuka+ e matadra na bete ena yasa ni icabocabo ni ka boivinaka ena vale i Jiova.
20 Ni rai yani vua o Asaraia na iliuliu ni bete kei ira kece na bete, era raica ni sa robota na yadrena na vukavuka! Era mani kauti koya tani vakatotolo mai kea, e vakusakusa tale ga i tuba ni sa totogitaki koya o Jiova.
21 E vukavuka tiko ga o Tui Usaia me yacova na siga e mate kina, e tiko ga ena dua na vale baleta ni vukavuka,+ e vakatabui me curu ena vale i Jiova. E lewa tiko na valenitui o Jocame na luvena me lewai ira na lewenivanua.+
22 Na vo ni itukutuku me baleti Usaia, na kena itekivu ina kena iotioti e vola o Aisea na parofita,+ na luvei Emosi.
23 E qai davo kei ira na tukana o Usaia, era buluti koya vata kei ira na tukana ena vanua ni nodra ibulubulu na tui, nira kaya: “E vukavuka o koya.” E tui sara o Jocame na luvena+ me sosomitaki koya.
iVakamacala e ra
^ Oya na tamana, o Emasia.
^ Ipe., “rerevaka.”
^ Se “taya,” kena irairai mai na vatu.
^ Se “na delana raraba.”
