iKarua ni Veigauna 29:1-36
29 E tui o Esekaia+ ni sa yabaki 25, e veiliutaki e Jerusalemi me 29 na yabaki. Na yaca i tinana o Apaija na luvei Sakaraia.+
2 E vakayacora tiko ga na ka e donu ena mata i Jiova+ me vaka e cakava o Tevita na tukana.+
3 Ena imatai ni yabaki ni nona veiliutaki ena imatai ni vula, e dolava na katuba ni vale i Jiova qai vakavinakataka.+
4 E kauti ira yani na bete kei ira na Livai, e soqoni ira ena vanua galala ena tokalau.
5 E kaya vei ira: “Moni rogoci au o kemuni na Livai. Moni vakasavasavataki kemuni,+ moni vakasavasavataka na vale i Jiova na Kalou i tukamuni, moni kauta tani na ka dukadukali mai na loqi tabu.+
6 Nira sega ni yalodina na tamada ra qai cakava na ka ca ena mata i Jiova na noda Kalou.+ Era biuti koya, era vagolea tani na matadra mai na valeniveitavaki i Jiova ra qai vakanadakui koya.+
7 Era sogota tale ga na katuba ni varada,+ era bokoca na cina.+ Era sega ni vakama na ka boivinaka+ se cabora na isoro kama+ ena loqi tabu vua na Kalou ni Isireli.
8 E cudruvi Juta kei Jerusalemi o Jiova+ mani vakatara mera domobulataki se kurabuitaki, mera kaluvi,* me vaka oni raica e matamuni.+
9 Era bale ena iseleiwau na tukada+ ra qai kau vakavesu na luveda tagane, na luveda yalewa, kei ira na watida ena ka qo.+
10 Ia qo e gagadre ni lomaqu meu veiyalayalati kei Jiova na Kalou ni Isireli,+ me gole tani kina vei keda na nona cudru waqawaqa.
11 Kemuni na luvequ, qo e sega ni gauna ni vakawelewele,* ni digitaki kemuni o Jiova moni tu e matana, moni qaravi koya,+ moni vakama na nona isoro.”+
12 Era tucake sara na Livai: o Meaci na luvei Emasai kei Joeli na luvei Asaraia vei ira na luvei Koaca,+ vei ira na luvei Mirari+ o Kisi na luvei Apiti kei Asaraia na luvei Jialieli, vei ira na luvei Kerisoni+ o Joa na luvei Sema kei Iteni na luvei Joa,
13 vei ira na luvei Elisafani o Simiri kei Jiueli, vei ira na luvei Esafa+ o Sakaraia kei Matanaia,
14 vei ira na luvei Imani+ o Jieli kei Semeai, vei ira na luvei Jitucuni+ o Semaia kei Usieli.
15 Era soqoni ira na tacidra, era vakasavasavataki ira ra qai lako yani mera vakasavasavataka na vale i Jiova ni vakarota na tui me vaka na vosa i Jiova.+
16 Era curu na bete ena loma ni vale i Jiova mera vakasavasavataka, era kauta mai tuba na ka dukadukali kece era raica ena valenisoro i Jiova ra qai kauta ina raranivale+ i Jiova. Era taura sara na Livai mera kauta ina Buca o Kitironi.+
17 Era vakasavasavataka sara ena imatai ni siga ena imatai ni vula, era yaco ena varada i Jiova ena ikawalu ni siga ni vula.+ Era vakasavasavataka na vale i Jiova me walu na siga ra qai vakaotia ena ika16 ni siga ena imatai ni vula.
18 Oti qori era lako yani vei Tui Esekaia, era kaya: “Keimami sa vakasavasavataka na vale taucoko i Jiova, na icabocabo ni isoro kama+ kei na kena iyaya kece,+ na teveli ni madrai yatuni*+ kei na kena iyaya kece.
19 Keimami sa vakarautaka, keimami vakasavasavataka+ na iyaya kece e kauta tani o Tui Easi ni veiliutaki tiko ena gauna e sega ni yalodina kina,+ era tu ena mata ni icabocabonisoro i Jiova.”
20 E sou vakamataka o Tui Esekaia me soqoni ira na turaganikoro, era lako cake ina vale i Jiova.
21 Era kauta e vitu na bulumakau tagane, e vitu na tamanisipi, e vitu na lami tagane, kei na vitu na me tagane me isoro ni ivalavala ca ni matanitu, ni valenisoro, ena vukudra tale ga na Juta.+ E mani kaya vei ira na bete era kawa nei Eroni mera cabora ena icabocabonisoro i Jiova.
22 Era qai vakamatea na bulumakau,+ era taura na bete na kena dra mera kureitaka ena icabocabonisoro,+ oti era vakamatea na tamanisipi era kureitaka na kena dra ena icabocabonisoro, era vakamatea na lami tagane ra qai kureitaka na kena dra ena icabocabonisoro.
23 Era kauta sara na me tagane me isoro ni ivalavala ca e matana na tui kei na ivavakoso, era tabaka e ligadra.
24 Era vakamatea qori na bete ra qai cabora me isoro ni ivalavala ca na kedra dra ena icabocabonisoro mera sorovaki kina na Isireli taucoko, ni vakarota na tui me cabori na isoro kama kei na isoro ni ivalavala ca ena vukudra na Isireli taucoko.
25 E lesi ira na Livai o koya mera tu ena vale i Jiova nira vakasibali, na ivakatagi vakawa, kei na api+ me vaka na ivakaro i Tevita,+ o Kata+ na dauraivotu ni tui, kei Necani+ na parofita, ni vakarota o Jiova ena gusudra na nona parofita.
26 Era mani tucake na Livai nira taura tu na ivakatagi nei Tevita, kei ira na bete nira taura na biukila.+
27 E qai vakarota o Esekaia me cabori na isoro kama ena icabocabonisoro.+ Ni tekivu cabori ga na isoro kama e tekivu sara na sere i Jiova kei na biukila ni salavata kei na iyaya ni qiriqiri i Tevita na tui Isireli.
28 E cuva na ivavakoso taucoko ni lagati tiko na sere, ni uvuci na biukila, e yaco tiko na ka kece qo me oti mada na isoro kama.
29 Nira vakacaboisoro oti, e cuva sara na tui kei ira kece era tomani koya tiko, era davo vakatoboicu.
30 E kaya o Tui Esekaia kei ira na turaga vei ira na Livai mera vakacaucautaki Jiova ena vosa i Tevita+ kei Esafa+ na dauraivotu. Era mani veivakacaucautaki ena marau levu, era cuva ra qai davo vakatoboicu.
31 E kaya sara o Esekaia: “Oni sa vakatabui kemuni qo moni qaravi Jiova, moni toro mai, moni kauta mai na isoro kei na isoro ni vakavinavinaka ina vale i Jiova.” E mani kauta yani na ivavakoso na isoro kei na isoro ni vakavinavinaka, era kauta tale ga yani na isoro kama o ira era lomasoli.+
32 Na levu ni isoro kama e kauta yani na ivavakoso e 70 na bulumakau, e 100 na tamanisipi, e 200 na lami tagane, qo kece na isoro kama vei Jiova,+
33 na isoro tabu e 600 na bulumakau kei na 3,000 na sipi.
34 Ia era lewe lailai ga na bete mera drudruga kece na isoro kama, e mani vukei ira na tacidra o ira na Livai+ me oti mada na cakacaka, mera vakasavasavataki ira tale ga na bete,+ nira kauaitaka vakalevu* na Livai mera vakasavasavataki ira ni vakatauvatani kei ira na bete.
35 E levu tale ga na isoro kama+ kei na uro ni isoro ni veiyaloni,+ kei na isoro livi e cabori vata kei na isoro kama.+ E tekivu* tale na veiqaravi ena vale i Jiova.
36 E marautaka vakalevu gona o Esekaia kei ira kece na lewenivanua na ka e vakayacora vei ira na Kalou dina,+ ni yaco vakasauri na ka qo.
iVakamacala e ra
^ Se “vakalialiai.”
^ Se “vakacegu.”
^ Oya na madrai dauraici.
^ Ipe., “nira yalododonu.”
^ Se “vakarau.”
