iKarua ni Veigauna 30:1-27
-
Soqova o Esekaia na Lakosivia (1-27)
30 E talatala sara o Esekaia vei ira kece na Isireli+ kei Juta, e vola tale ga na ivola vei Ifireimi kei Manasa+ mera lako yani ena vale i Jiova e Jerusalemi mera vakananuma na Lakosivia vei Jiova na Kalou ni Isireli.+
2 Ia e lewa na tui, o ira na nona turaga vakaitutu, kei na ivavakoso taucoko e Jerusalemi mera vakananuma na Lakosivia ena ikarua ni vula,+
3 nira sega ni vakananuma rawa ena kena gauna+ baleta ni lewe lailai ga na bete era vakasavasavataki ira,+ era sega tale ga ni soqoni vata yani i Jerusalemi na tamata.
4 E donu na ituvatuva qo vua na tui kei na ivavakoso taucoko.
5 Era mani vakatulewataka me tukuni e Isireli taucoko, mai Pieri-sepa me yaco i Tani,+ mera lako yani na tamata mera vakananuma na Lakosivia vei Jiova na Kalou ni Isireli e Jerusalemi, nira sega ni vakananuma vakailawalawa me vaka e volai.+
6 Era qai lako na italai* e Isireli taucoko kei Juta nira kauta na ivola ni tui kei ira na nona turaga vakaitutu me vaka e vakarota na tui, e kaya: “Kemuni na Isireli, ni lesu vei Jiova na Kalou i Eparama, Aisake kei Isireli, me lesu yani o koya vei kemuni na kena vo oni bula mai na ligadra na tui Asiria.+
7 Moni kua sara ni vakataki ira na tukamuni kei ira na wekamuni era sega ni yalodina vei Jiova na Kalou i tukadra qai vakatara mera domobulataki, me vaka oni raica tiko.+
8 Qo moni kua ni vakadomoqataki kemuni me vakataki ira na tukamuni.+ Moni vakamalumalumu vei Jiova, moni lako ina nona vale tabu+ e vakasavasavataka me tawamudu moni qaravi Jiova na nomuni Kalou, me gole tani kina vei kemuni na nona cudru waqawaqa.+
9 Ni oni lesu vei Jiova, era na lomana na wekamuni kei ira na luvemuni o ira na vesuki ira tiko,+ mera sereki mera lesu ina vanua qo,+ ni yalovinaka qai yalololoma+ o Jiova na nomuni Kalou, ena sega ni gole tani na matana ke oni lesu vua.”+
10 Era lako na italai* ena dua na koro ina dua tale na koro ena vanua taucoko o Ifireimi kei Manasa+ me yaco sara i Sepuloni, ia era vakalialiai ira ra qai vakadiloi ira na lewenivanua.+
11 Eso ga vei ira na Aseri, Manasa kei Sepuloni era vakamalumalumutaki ira mera lako i Jerusalemi.+
12 E tiko tale ga e Juta na liga ni Kalou dina me vakaduavatataki ira* mera vakayacora na ivakaro ni tui kei ira na turaga me vaka na vosa i Jiova.
13 Era soqoni vata yani e levu na tamata e Jerusalemi mera vakananuma na Soqo ni Madrai Sega ni Vakaleveni+ ena ikarua ni vula,+ e dua na ivavakoso levu sara.
14 Era tucake mera kauta tani na icabocabonisoro e tiko e Jerusalemi,+ era kauta tani tale ga na icabocabo kece ni ka boivinaka+ ra qai biuta ina Buca o Kitironi.
15 Era vakamatea sara na isoro ni Lakosivia ena ika14 ni siga ena ikarua ni vula. Era madua na bete kei na Livai, era mani vakasavasavataki ira ra qai kauta na isoro kama ina vale i Jiova.
16 Era duri ena nodra tikina me vaka e tukuni ena Lawa e vola o Mosese na tamata ni Kalou dina, era kureitaka sara na bete na dra+ era taura mai na ligadra na Livai.
17 Levu ena ivavakoso era se sega ni vakasavasavataki ira, e nodra itavi na Livai mera vakamatea na isoro ni Lakosivia ena vukudra kece na tamata era sega ni savasava,+ mera vakasavasavataki ira vei Jiova.
18 Era lewe levu sara era sega ni vakasavasavataki ira, vakabibi o ira na Ifireimi, Manasa,+ Isakari, kei Sepuloni, ia era kania tiko ga na Lakosivia, e sega ni salavata kei na ka e volai. E qai masulaki ira o Esekaia, e kaya: “Me vakadonuya mada ga o Jiova, o koya e dau yalovinaka,+
19 na tamata yadua e vakarautaka na lomana me qara na Kalou dina,+ o Jiova na Kalou i tukana, ni se sega mada ga ni vakasavasavataki me vaka na ivakatagedegede ni savasava.”+
20 E rogoci Esekaia o Jiova qai vosoti* ira na tamata.
21 Era mani vakananuma na Isireli era tiko e Jerusalemi na Soqo ni Madrai Sega ni Vakaleveni+ ena marau levu+ me vitu na siga, era vakacaucautaki Jiova e veisiga na Livai kei ira na bete nira qiria me rogo levu na nodra iyaya ni qiriqiri vei Jiova.+
22 E vosa tale ga o Esekaia qai vakauqeti ira kece na Livai era qaravi Jiova ena yalomatua. Era kana tiko ena soqo oya me vitu na siga,+ era cabora na isoro ni veiyaloni+ ra qai vakavinavinaka vei Jiova na Kalou i tukadra.
23 E mani vakatulewataka na ivavakoso taucoko mera vakananuma na soqo me vitu tale na siga, era qai vakananuma me vitu tale na siga ena marau levu.+
24 E cautaka o Esekaia na tui Juta ina ivavakoso e 1,000 na bulumakau tagane kei na 7,000 na sipi, era cautaka ina ivavakoso na turaga e 1,000 na bulumakau tagane kei na 10,000 na sipi,+ e levu sara na bete era vakasavasavataki ira.+
25 E marau tiko ga na ivavakoso taucoko e Juta, o ira na bete, o ira na Livai, na ivavakoso taucoko e lako mai Isireli,+ kei ira na vulagi+ era lako mai na vanua o Isireli kei ira na tiko e Juta.
26 Era marau vakalevu e Jerusalemi ni sega ni dua na ka va qo e vakayacori e Jerusalemi mai na gauna i Solomoni na luvei Tevita na tui Isireli.+
27 Era qai tucake na bete era Livai mera vosa vakalougatataki ira na tamata,+ e mani rogoca na domodra na Kalou, na nodra masu e yaco sara ina nona itikotiko tabu, na lomalagi.
iVakamacala e ra
^ Ipe., “daucici.”
^ Ipe., “daucici.”
^ Ipe., “me vakalomavatataki ira.”
^ Ipe., “vakabulai.”
