iKarua ni Veigauna 33:1-25
33 E tui o Manasa+ ni sa yabaki 12, e veiliutaki e Jerusalemi me 55 na yabaki.+
2 E cakava o koya na ka ca ena mata i Jiova ni muria na nodra itovo vakasevaki na veimatanitu e cemuria o Jiova e matadra na lewe i Isireli.+
3 E tara tale o koya na vanua cecere e basuka o Esekaia na tamana,+ e vakaduria o koya na icabocabonisoro vei ira na Peali, e cakava eso na duru ni sokalou,* e cuva tale ga ina kalokalo kece ni lomalagi me qaravi ira.+
4 E tara tale ga eso na icabocabonisoro ena vale i Jiova,+ na vanua e tukuna o Jiova: “Ena tiko e Jerusalemi na yacaqu me tawamudu.”+
5 E tara eso na icabocabonisoro ina kalokalo kece ni lomalagi ena rara ruarua ni vale i Jiova.+
6 E cabora mada ga na luvena ena bukawaqa+ ena Buca ni Luvei Inomi,+ e daucakaiba,+ e daucakaisausau, e dauvakadraudrau, e lesi ira na dauvakacuru kei ira na daukilakila.+ E levu sara na ka ca e cakava ena mata i Jiova me vakacudrui koya kina.
7 E biuta na ivakatakarakara ceuti e cakava o koya ena vale ni Kalou dina,+ e tukuna na Kalou vei Tevita kei Solomoni na luvena: “Au na biuta na yacaqu me tawamudu ena vale qo kei Jerusalemi, au digitaka vei ira kece na yavusa e Isireli.+
8 Au na sega ni kauta tani na yavadra na Isireli mai na qele au solia vei ira na tukadra, kevaka ga era muria vinaka na ka kece au vakaroti ira kina, na Lawa taucoko, na ivakaro, kei na lewa e soli vei Mosese.”
9 E vakacalai ira tiko ga na Juta kei ira na lewe i Jerusalemi o Manasa, e vakavuna me ca sara na nodra ivalavala ni vakatauvatani kei ira na veimatanitu e vakawabokotaka o Jiova e matadra na Isireli.+
10 E vosa tiko ga o Jiova vei Manasa kei ira na nona tamata, ia era sega ni vakarorogo.+
11 E mani kauti ira na iliuliu ni mataivalu nei tui Asiria o Jiova me valuti ira, era tauri Manasa ena iqila, era vesuki koya sara ena rua na ivesu kopa mera kauti koya i Papiloni.
12 Ena nona rarawa, e vakamasuti Jiova na nona Kalou me lomani koya, e vakamalumalumutaki koya tiko ga vakalevu ena mata ni nodra Kalou na tukana.
13 E masuti koya tiko ga o Manasa mani vakatudaliga na Kalou ina nona vakamamasu me rogoca na nona kerekere me lomani, qai vakasukai koya i Jerusalemi ina nona veiliutaki.+ E qai kila o Manasa ni Kalou dina ga o Jiova.+
14 Oti qo e tara o koya e dua na bai ena taudaku ni Koro i Tevita+ ena ra kei Kioni+ ena buca* me yaco sara ina Matamata ni Ika,+ e tara wavoki me yaco i Ofeli,+ e cakava me cere sara. E lesi ira tale ga na turaganivalu mera tiko ena koro vakabai kece e Juta.
15 E kauta na kalou tani kei na ivakatakarakara mai na vale i Jiova+ kei na icabocabonisoro kece e tara ena ulunivanua ni vale i Jiova+ kei Jerusalemi qai biuta ena taudaku ni koro.
16 E vakavinakataka tale ga na icabocabonisoro i Jiova,+ e cabora sara kina na isoro ni veiyaloni+ kei na isoro ni vakavinavinaka+ qai kaya vei ira e Juta mera qaravi Jiova na Kalou ni Isireli.
17 Era vakacaboisoro tiko ga na lewenivanua ena vanua cecere, io vei Jiova na nodra Kalou.
18 Na vo ni itukutuku me baleti Manasa, na nona masu vua na nona Kalou kei na nodra vosa na dauraivotu era tukuna vua ena yaca i Jiova na Kalou ni Isireli, e volai ena nodra ivolatukutuku na tui Isireli.
19 Na nona masu tale ga,+ na rogoci ni nona vakamamasu, na nona ivalavala ca kece, na nona sega ni yalodina,+ na veiyasana e tara kina na vanua cecere me vakaduria kina na duru ni sokalou*+ kei na ivakatakarakara ceuti, ni bera ni vakamalumalumutaki koya, e volai vata kei na ka era tukuna na nona dauraivotu.
20 E qai davo kei ira na tukana o Manasa, era buluti koya ena nona vale, e tui sara o Emoni na luvena me sosomitaki koya.+
21 E tui o Emoni+ ni sa yabaki 22, e veiliutaki e Jerusalemi me rua na yabaki.+
22 E vakayacora tiko ga na ka ca ena mata i Jiova me vaka e cakava o Manasa na tamana,+ e vakacaboisoro o Emoni ina ivakatakarakara ceuti kece e cakava o Manasa na tamana,+ e qaravi ira tiko ga.
23 E sega ni vakamalumalumutaki koya ena mata i Jiova+ me vaka na nona vakamalumalumutaki koya o Manasa na tamana,+ e vakalevutaka ga o Emoni na nona cakacala.
24 Era qai bukiveretaki koya na nona dauveiqaravi,+ era vakamatei koya ga ena nona vale.
25 Ia o ira na lewenivanua era mokuti ira kece na bukiveretaki Tui Emoni,+ era buli Josaia sara na luvena+ me tui me sosomitaki koya.
