iKarua ni Veigauna 34:1-33
34 E tui o Josaia+ ni sa yabaki walu, e veiliutaki e Jerusalemi+ me 31 na yabaki.
2 E cakava na ka e donu ena mata i Jiova, e muria na ivalavala i Tevita na tukana, e sega ni gole tani ina imatau se ina imawi.
3 Ena ika8 ni yabaki ni nona veiliutaki ena gauna se gone kina, e tekivu qara na Kalou i Tevita na tukana,+ ena ika12 ni yabaki e tekivu vakasavasavataki Juta kei Jerusalemi+ ni kauta tani na veivanua cecere,+ na duru ni sokalou,* na ivakatakarakara ceuti+ kei na matakau kaukamea.
4 Era qai basuka na nodra icabocabonisoro na Peali e matana, e musuka o koya na itutu ni ka boivinaka e toka e cake e deladra. E vorovorolaka na duru ni sokalou,* na ivakatakarakara ceuti, kei na matakau kaukamea, e cakava me pauta qai kureitaka ena dela ni nodra ibulubulu na dau vakacaboisoro kina.+
5 E vakama na nodra sui na bete ena dela ni nodra icabocabonisoro.+ E vakasavasavataki Juta kei Jerusalemi kina.
6 Ena nodra koro na Manasa, na Ifireimi,+ na Simioni me yaco sara i Nafitalai, na veivanua volekata sa rusa tu,
7 e basuka na icabocabonisoro, e vurumemeataka na duru ni sokalou* kei na ivakatakarakara ceuti+ me pauta, e musuka na itutu ni ka boivinaka taucoko ena vanua kece o Isireli+ qai lesu i Jerusalemi.
8 Ena ika18 ni yabaki ni nona veiliutaki, ni sa vakasavasavataka na vanua kei na valenisoro,* e talai Safani+ sara na luvei Asalaia, o Mesea na iliuliu ni koro, kei Joa na luvei Joase e dauvola na ka ni matanitu me ratou vakavinakataka na vale i Jiova na nona Kalou.+
9 Eratou lako vei Ilikaia na bete levu, eratou solia vua na ilavo e kau yani ina vale ni Kalou, era kumuna na Livai era ivakatawa ni katuba mai vei ira na Manasa, vei ira na Ifireimi, vei ira kece na vo ni Isireli,+ vaka kina vei ira na Juta, vei ira na Penijamini kei ira na lewe i Jerusalemi.
10 Eratou qai solia vei ira na lesi mera raica na cakacaka ena vale i Jiova. Era vakayagataka qori o ira na cakacaka tiko ena vale i Jiova mera vakavinakataka na vale.
11 Eratou solia vei ira na dauceuceu kei ira na matai me voli kina na vatu sa ta oti, na kau me isa, mera tara kina na icoka ni vale era biuta tu na tui Juta me vuca.+
12 Era yalodina ena cakacaka na tamata.+ Erau lesi na Livai o Jeaci kei Opetaia vei ira na luvei Mirari,+ kei rau o Sakaraia kei Mesulame vei ira na luvei Koaca+ me ratou liutaki ira. O ira na Livai era daunivakatagi kece,+
13 era liutaki ira na tamata cakacaka,* era vakaraici ira na qarava na veimataqali cakacaka, era lesi eso na Livai mera vunivola, mera vakailesilesi, mera ivakatawa ni matamata.+
14 Nira kauta tiko mai tuba na ilavo e kau yani ina vale i Jiova,+ e kunea sara o Ilikaia na bete na ivola ni Lawa i Jiova+ e soli vei* Mosese.+
15 E mani kaya o Ilikaia vei Safani na vunivola: “Au sa kunea na ivola ni Lawa ena vale i Jiova.” E solia sara na ivola o Ilikaia vei Safani.
16 E qai kauta na ivola o Safani vua na tui, e kaya vua: “Era cakava tiko na nomuni dauveiqaravi na ka kece e lesi vei ira.
17 Era sova na ilavo e kune ena vale i Jiova ra qai solia vei ira na tagane era lesi kei ira na cakacaka tiko.”
18 E tukuna tale ga vua na tui o Safani na vunivola: “E solia vei au e dua na ivola o Ilikaia na bete.”+ E wilika sara qori o Safani vua na tui.+
19 Ni rogoca ga na tui na ka e tukuni ena Lawa, e dresulaka na nona isulu.+
20 Qo na ka e qai vakarota na tui vei Ilikaia, vei Eikami+ na luvei Safani, vei Apitoni na luvei Maika, vei Safani na vunivola, kei Asaia na dauveiqaravi ni tui:
21 “Mo dou lai tarogi Jiova ena vukuqu, ena vukudra tale ga na vo e Isireli kei Juta me baleta na ka e tukuni ena ivola e kune, ni sa cudruvi keda vakalevu o Jiova nira sega ni muria na tukada na vosa i Jiova mera cakava na ka kece e volai tu ena ivola qo.”+
22 E lako sara o Ilikaia kei ratou e tala na tui me ratou lako vei Ulita na parofita yalewa.+ E wati Salumi na luvei Tikiva na luvei Ariasi e dau maroroya na isulu, e vakaitikotiko o Ulita mai Jerusalemi ena iKarua ni Yasana, eratou vosa vua e kea.+
23 E tukuna vei ratou o Ulita: “Qo na ka e tukuna o Jiova na Kalou ni Isireli, ‘Dou tukuna vua na tamata e talai kemudou mai vei au:
24 “Qo na ka e tukuna o Jiova, ‘Au na kauta mai na ca ena vanua qo kei ira na lewena,+ na itotogi kece e volai tu ena ivola+ era wilika vua na tui Juta.
25 Nira biuti au+ mera vakama na isoro vei ira na kalou tale eso mera vakacudrui au+ ena cakacaka kece ni ligadra, ena tau na noqu cudru levu ena vanua qo ena sega ni boko rawa.’”+
26 Ia na tui Juta e talai kemudou mai mo dou tarogi Jiova, qo na ka mo dou tukuna vua, “Qo na ka e kaya o Jiova na Kalou ni Isireli: ‘Ena vuku ni vosa o sa rogoca,+
27 ni talairawarawa* na lomamu mo vakamalumalumutaki iko ena mata ni Kalou ni o rogoca na ka e tukuna me baleta na vanua qo kei ira na lewena, o vakamalumalumutaki iko e mataqu, o dresulaka na nomu isulu o qai tagi e mataqu, au sa rogoci iko tale ga,+ e kaya o Jiova.
28 Oya na vuna au na kauti iko kina vei ira na nomu qase,* o na vakadavori ena vakacegu ina nomu ibulubulu, ena sega ni raica na matamu na ka ca kece au na kauta mai ina vanua qo kei ira na lewena.’”’”+
Eratou lai tukutuku sara vua na tui.
29 E qai talatala na tui mera kacivi yani na qase kece e Juta kei Jerusalemi.+
30 Oti qori e lako cake na tui ena vale i Jiova kei ira na tagane kece ni Juta, o ira na lewe i Jerusalemi, o ira na bete, o ira na Livai, na lewenivanua kece, na qase kei na gone. E wilika sara o koya mera rogoca na vosa kece ena ivola ni veiyalayalati e kune ena vale i Jiova.+
31 E tucake na tui ena nona itutu qai veiyalayalati*+ ena mata i Jiova me muri Jiova, me talairawarawa ena nona ivakaro, ina nona veivakadreti kei na nona lawa ena lomana taucoko kei na nona vinaka* taucoko+ me vakayacora na vosa ni veiyalayalati e volai tu ena ivola qo.+
32 E uqeti ira tale ga na lewenivanua kece era tiko e Jerusalemi kei Penijamini mera tokona. Era muria na lewe i Jerusalemi na veiyalayalati ni Kalou, na Kalou i tukadra.+
33 E qai kauta tani o Josaia na ka vakasevaki* kece ena nodra vanua taucoko na Isireli,+ e uqeti ira kece na tiko e Isireli mera qaravi Jiova na nodra Kalou. Era sega ni vakanadakui Jiova na Kalou i tukadra ena nona bula kece.
iVakamacala e ra
^ Raica na iVakamacala ni Vosa.
^ Raica na iVakamacala ni Vosa.
^ Raica na iVakamacala ni Vosa.
^ Ipe., “vale.”
^ Se “daucolacola.”
^ Ipe., “e liga i.”
^ Ipe., “malumalumu.”
^ Qo na ka e dau tukuni ni dua e mate.
^ Se “veiyalayalati tale.”
^ Ipe., “nona neʹphesh kece.” Raica na iVakamacala ni Vosa.
^ Se “matakau.”
