iKarua ni Veigauna 35:1-27
35 E vakarautaka o Josaia na Lakosivia+ vei Jiova e Jerusalemi, ra qai vakamatea na isoro ni Lakosivia+ ena ika14 ni siga ni imatai ni vula.+
2 E lesi ira na bete ina nodra itavi, e uqeti ira mera qarava na nodra itavi ena vale i Jiova.+
3 E qai tukuna vei ira na Livai era dau vakavulici ira kece na Isireli,+ era savasava vei Jiova: “Moni biuta na Kato tabu ena vale e tara o Solomoni na luvei Tevita na tui Isireli,+ oni na sega tale ni colata e tabamuni.+ Moni qaravi Jiova sara na nomuni Kalou kei ira na nona tamata na Isireli.
4 Moni vakavakarau vakaiwasewase ena mataqali i tukamuni, me vaka e vola o Tui Tevita+ e Isireli, e vola tale ga o Solomoni na luvena.+
5 Moni duri ena vanua tabu me vaka na nodra iwasewase na mataqali nei tacimuni, o ira na vo ni lewenivanua,* kei ira na nodra iwasewase na mataqali i tamadra na Livai.
6 Moni vakamatea na isoro ni Lakosivia,+ moni vakasavasavataki kemuni, moni qai vakarautaki ira na tacimuni mera vakayacora na vosa i Jiova e tukuna vei Mosese.”
7 E qai solia o Josaia na qelenimanumanu vei ira na lewenivanua, na lami tagane kei na luvenime me isoro ni Lakosivia me nodra o ira kece era tiko e kea, na kena iwiliwili e 30,000 taucoko, vaka kina e 3,000 na bulumakau. E kau mai na nona iyau na tui.+
8 Era cau tale ga na nona turaga vakaitutu me nodra isolisoli vei ira na tamata, vei ira na bete kei ira na Livai. E solia o Ilikaia,+ o Sakaraia kei Jieli, o ratou na iliuliu ni vale ni Kalou dina e 2,600 na isoro ni Lakosivia kei na 300 na bulumakau vei ira na bete.
9 O Kononaia, o rau na tacina o Semaia kei Nicaneli, vaka kina o Esapaia, o Jaeli kei Josapati na nodra turaga na Livai, eratou cautaka e 5,000 na isoro ni Lakosivia kei na 500 na bulumakau vei ira na Livai.
10 E vakarautaki na cakacaka ra qai duri na bete ena nodra itutu, o ira na Livai ena nodra iwasewase+ me vaka na ivakaro ni tui.
11 Era vakamatea na isoro ni Lakosivia,+ era kureitaka na bete na dra e soli vei ira+ nira drudruga tiko na Livai na manumanu.+
12 Era vakarautaka sara na isoro kama me soli vei ira na vo ni lewenivanua era wasei vakamataqali, me cabori vei Jiova me vaka na ka e volai ena ivola e soli vei Mosese, era cakava tale ga qori ena bulumakau.
13 Era saqara* na isoro ni Lakosivia ena bukawaqa me vaka na kena ivakarau,+ era saqara na isoro tabu ena kuro, ena kuro mokimokiti lelevu, kei na itavuteke, oti era kauta totolo vei ira kece na vo ni lewenivanua.
14 Era vakarautaka sara na kedra kei na kedra na bete, nira cabora na bete era kawa nei Eroni na isoro kama kei na tikina urouro me yacova na bogi, era mani vakarautaka na Livai na kedra kei na kedra na bete era kawa nei Eroni.
15 O ira na daulagasere era luvei Esafa+ era tu ena nodra itutu me vaka na ivakaro i Tevita,+ i Esafa,+ i Imani, kei Jitucuni+ na dauraivotu ni tui, era tiko na ivakatawa ni matamata ena duidui matamata.+ E sega ni vinakati mera biuta na nodra itavi nira vakarautaka na kedra o ira na tacidra era Livai.
16 E mani tuvanaki na veiqaravi kece vei Jiova ena siga oya me vakayacori kina na Lakosivia,+ me cabori tale ga na isoro kama ena icabocabonisoro i Jiova, me vaka na ivakaro nei Tui Josaia.+
17 O ira na Isireli era tiko ena gauna oya era soqova na Lakosivia kei na Soqo ni Madrai Sega ni Vakaleveni me vitu na siga.+
18 E sega ni bau dua na Lakosivia me va qo e Isireli me tekivu mai na gauna i Samuela na parofita, se dua na tui Isireli me cakava na Lakosivia e cakava o Josaia,+ o ira na bete, o ira na Livai, o ira kece na Juta kei na Isireli era tiko e kea, kei ira na lewe i Jerusalemi.
19 E vakayacori na Lakosivia qo ena ika18 ni yabaki ni veiliutaki nei Josaia.
20 Oti kece qo, ni vakarautaka oti o Josaia na valenisoro,* e lako cake mai o Tui Niko+ e Ijipita me vala e Kakimisi volekata na Uferetisi. E lako sara yani o Josaia me valuti koya.+
21 E mani tala vua o Niko eso na italai, e kaya: “Na cava o mai valuti au kina o iko na tui Juta? Au sega ni mai valuti iko nikua, au mai valuta e dua tani na mataqali, e tukuna na Kalou meu vakatotolo. Mo suka mo kua ni vorata na Kalou ni tokoni au o koya, de vakarusai iko.”
22 E sega ni suka o Josaia, e vakalecaleca+ me lai valuti koya, e sega ni rogoca na vosa i Niko e cavuta na gusu ni Kalou. E lako sara me lai vala ena Vanua Bucabuca o Mekito.+
23 Era vanai Tui Josaia o ira na dauvana, e tukuna na tui vei ira na nona dauveiqaravi: “Ni kauti au tani eke niu sa mavoa vakaca.”
24 Era kauti koya sara na nona dauveiqaravi mai na nona qiqinivalu, era vakavodoki koya ena ikarua ni nona qiqinivalu ra qai kauti koya i Jerusalemi. E mate o koya, e bulu ena nodra ibulubulu na tukana,+ era tagicaki Josaia o ira kece e Juta kei Jerusalemi.
25 E lelevaki Josaia o Jeremaia,+ era seretaki Josaia tiko ga ena nodra sere ni lolosi o ira kece na tagane kei na yalewa daulagasere+ me yacova mai na siga qo, mani vakatulewataki me dau lagati e Isireli na sere qori qai volai ena sere ni lolosi.
26 Na vo ni itukutuku me baleti Josaia, na ka e cakava ena dei ni nona loloma me vaka e volai ena Lawa i Jiova,
27 kei na ka e cakava, na kena itekivu ina kena iotioti, e volai ena nodra iVola na Tui Isireli kei Juta.+
