iKarua ni Veigauna 6:1-42
6 E kaya o Solomoni ena gauna oya: “E tukuna o Jiova ni na tiko ena o vavaku.+
2 Au sa tara qo e dua na valececere me nomuni, e dua na itikotiko tudei moni tiko kina me tawamudu.”+
3 E qai vuki na tui me vosa vakalougatataka sara na ivavakoso taucoko ni Isireli ni tucake tu na ivavakoso taucoko ni Isireli.+
4 E kaya o koya: “Me vakacaucautaki o Jiova na Kalou ni Isireli, o koya e yalataka e gusuna vei Tevita na tamaqu, e vakayacora tale ga e ligana ni kaya,
5 ‘Mai na siga au kauti ira tani kina na noqu tamata mai na vanua o Ijipita, au sega ni digia e dua na koro ena yavusa kece e Isireli me tara e dua na vale me tiko ga kina na yacaqu,+ au sega tale ga ni digitaka e dua me liutaki ira na noqu tamata na Isireli.
6 Ia au digitaki Jerusalemi+ me tiko kina na yacaqu, au digitaki Tevita ga me lewai ira na noqu tamata na Isireli.’+
7 E vu dina mai loma i Tevita na tamaqu me tara e dua na vale ena yaca i Jiova na Kalou ni Isireli.+
8 E tukuna sara o Jiova vei Tevita na tamaqu, ‘E vu dina mai lomamu mo tara e dua na vale ena yacaqu, e vinaka ni o vinakata qo e lomamu.
9 Ia o na sega ni tara na vale qori, na luvemu tagane ga ena sucu mai vei iko* ena tara na vale ena yacaqu.’+
10 E vakayacora sara o Jiova na ka e yalataka niu sosomitaki Tevita na tamaqu meu dabe ena idabedabe vakatui e Isireli,+ me vaka ga e yalataka o Jiova.+ Au tara tale ga na vale ena yaca i Jiova na Kalou ni Isireli,
11 au biuta e kea na Kato e tiko kina na veiyalayalati+ i Jiova e cakava kei ira na lewe i Isireli.”
12 E qai tucake o koya ena mata ni icabocabonisoro i Jiova e matadra na ivavakoso taucoko ni Isireli, e dodoka sara na ligana ruarua.+
13 (E tara o Solomoni e dua na buturara kopa qai biuta ena lomadonu ni raranivale.*+ Na kena balavu e lima na kiupiti,* na kena raba e lima na kiupiti, na kena cere e tolu na kiupiti, e duri toka e delana.) E tekiduru sara o koya e matadra na ivavakoso taucoko ni Isireli, e dodoka i lomalagi na ligana ruarua,+
14 e kaya: “Kemuni Jiova na Kalou ni Isireli, e sega ni dua na Kalou me vakataki kemuni mai lomalagi se vuravura, oni dei tiko ga ena veiyalayalati, e dei tale ga na nomuni loloma vei ira na nomuni dauveiqaravi era lako voli e matamuni mai vu ni lomadra taucoko.+
15 Oni dei tiko ga ena ka oni yalataka vua na nomuni dauveiqaravi o Tevita na tamaqu.+ Oni yalataka e gusumuni oni qai vakayacora ena siga qo e ligamuni.+
16 Ia qo kemuni Jiova na Kalou ni Isireli, moni dei tiko ga ena ka oni yalataka vua na nomuni dauveiqaravi o Tevita na tamaqu, ni oni tukuna: ‘Ena tiko ga e mataqu e dua ena nomu iyatukawa me dabe ena idabedabe vakaturaga e Isireli, ke ra qarauna wale ga na luvemu na nodra ivalavala mera muria tiko ga na noqu lawa+ me vaka na nomu lako e mataqu.’+
17 Qo kemuni Jiova na Kalou ni Isireli, me dina mada ga na ka oni yalataka vua na nomuni dauveiqaravi o Tevita.
18 “Ia ena tiko dina na Kalou kei ira na tamata e vuravura?+ Raica! O lomalagi, io, na veilomalagi mada ga e sega ni rauti kemuni,+ sa qai lailai sara na vale au tara qo!+
19 Moni rogoca mada ga na nona masu kei na nona kerekere na nomuni dauveiqaravi me lomani, kemuni Jiova na noqu Kalou, moni vakatudaliga ena nona tagi ni kere veivuke kei na nona vakamamasu na nomuni dauveiqaravi e masuti kemuni tiko.
20 Me wanonova mada ga na matamuni na vale qo ena siga kei na bogi, na vanua oni tukuna oni na vakatikora kina na yacamuni,+ moni rogoca na masu ni nomuni dauveiqaravi e cabora tiko ena vanua qo.
21 Moni rogoca na nona vakamamasu ni kere veivuke na nomuni dauveiqaravi kei na nodra kerekere na nomuni tamata na Isireli ena gauna era masu kina ina vanua qo,+ moni rogoca ena vanua oni tiko kina mai lomalagi,+ io moni rogoca moni vosoti keimami.+
22 “Ke valavala ca e dua na tamata vua na wekana qai tukuni me bubului,* ena cudruvi ni sega ni vakayacora na nona bubului, mani lako yani o koya ena mata ni nomuni icabocabonisoro ena vale qo ena gauna ni nona bubului,+
23 moni qai rogoca mada ga mai lomalagi, moni vakayacora, moni vakatulewataki ira na nomuni dauveiqaravi ni oni totogitaki koya e cala moni sauma vua na ka e cakava,+ moni vakadonui koya e sega ni cala* ni oni vakaicovitaki koya me vaka na nona cakadodonu.+
24 “Ke ra vakadrukai ira na nomuni tamata na Isireli na meca nira valavala ca tiko ga vei kemuni,+ ra qai lesu mai mera vakalagilagia na yacamuni,+ mera masu,+ mera kerekere vei kemuni ena vale qo,+
25 moni qai rogoca mada ga mai lomalagi,+ moni vosota na nodra ivalavala ca na nomuni tamata na Isireli, moni vakalesui ira ina vanua oni solia vei ira kei na tukadra.+
26 “Ni tasogo na lomalagi me kua ni tau na uca+ nira valavala ca tiko ga vei kemuni,+ ra qai masu ina vanua qo mera vakalagilagia na yacamuni, era biuta na nodra ivalavala ca ni oni vakamalumalumutaki* ira,+
27 moni rogoca mada ga mai lomalagi, moni vosota na nodra ivalavala ca na nomuni dauveiqaravi, o ira na nomuni tamata na Isireli, oni na vakavulici ira ena sala vinaka mera lakova,+ moni vakatauca na uca+ ena nomuni vanua oni solia vei ira na nomuni tamata me nodra ivotavota.
28 “Ke dausiga na vanua,+ se dua na matedewa,+ e ca na iteitei, e malai na kau,+ e basika na yavusa vodre, se na vodre daukana,+ se viribaiti ira na kedra meca ena dua na koro ena nodra vanua,*+ se basika e dua tale na leqa, se mate,+
29 na masu kece,+ na vakamamasu kece+ ga e kerea e dua, se o ira kece na nomuni tamata na Isireli (ni kila na tamata yadua na nona rarawa kei na nona mosi)+ nira dodoka yani na ligadra ruarua ina vale qo,+
30 moni rogoca mada ga mai lomalagi, na nomuni itikotiko,+ moni vosoti ira,+ moni saumi ira yadua me vaka na nodra ivalavala kece, ni oni kila na lomadra (o kemuni ga oni kila na loma ni tamata),+
31 mera dokai kemuni nira muria na nomuni ivalavala ena gauna taucoko era bula tiko kina ena vanua oni solia vei ira na tukai keimami.
32 “Na vulagi tale ga e sega ni wili vata kei ira na nomuni tamata na Isireli, e lako sara mai vakayawa ni rogoca na yacamuni cecere,*+ na ligamuni kaukaua kei na ligamuni e dodo tu, e lako mai me masu ina vale qo,+
33 moni rogoca mada ga mai lomalagi ena nomuni itikotiko, moni vakayacora na ka taucoko e kerei kemuni kina na vulagi, mera kila na lewe ni veivanua e vuravura taucoko na yacamuni,+ mera dokai kemuni me vakataki ira na nomuni tamata na Isireli, mera kila kina ni vakayacani vei kemuni na vale au tara qo.
34 “Ke ra lai valuti ira na kedra meca na nomuni tamata ena sala oni talai ira+ kina, ra qai masuti+ kemuni nira qara ina koro qo oni digitaka kei na vale au tara ena yacamuni,+
35 moni qai rogoca mai lomalagi na nodra masu kei na nodra kerekere mera lomani, moni vakatulewa ena vukudra.+
36 “Ke ra valavala ca vei kemuni (nira valavala ca na tamata kece),+ oni cudruvi ira oni soli ira vua na meca qai kauti ira vakabobula o ira na vesuki ira ina dua na vanua yawa se voleka,+
37 era mani kilai yalodra mai na vanua era vakabobulataki tu kina, era qai lesu vei kemuni mera kerei kemuni mera lomani ena vanua era kau vakavesu kina, era kaya, ‘Keimami sa valavala ca, keimami cakacala, e ca na neimami itovo,’+
38 era lesu vei kemuni ena vu ni lomadra taucoko+ kei na nodra vinaka* taucoko ena vanua era kau vakabobula kina,+ ra lai vesu tu kina, ra qai masu nira qara ina nodra vanua oni solia vei ira na tukadra, na koro oni digitaka+ kei na vale au tara ena yacamuni,
39 moni qai rogoca mai lomalagi ena nomuni itikotiko na nodra masu kei na nodra vakamamasu mera lomani, moni vakatulewa ena vukudra,+ moni vosoti ira tale ga na nomuni tamata era valavala ca vei kemuni.
40 “Ia qo kemuni na noqu Kalou, yalovinaka me raica na matamuni, me rogoca na daligamuni na masu e cabori ena* vanua qo.+
41 Moni lako cake ina nomuni ivakavakacegu+ kemuni Jiova na Kalou, o kemuni kei na Kato ni nomuni kaukaua. Mera vakaisulu ena bula na nomuni bete, kemuni Jiova na Kalou, mera marautaka vakalevu na nomuni yalovinaka na nomuni tamata yalododonu.+
42 Kemuni Jiova na Kalou, ni kua ni biuta* na nomuni lumuti.+ Moni nanuma mada ga na dei ni nomuni loloma vei Tevita na nomuni dauveiqaravi.”+
iVakamacala e ra
^ Ipe., “na luvemu tagane e basika mai tolomu.”
^ Se “ni rara vakabai.”
^ Se “totogitaki koya.” Dusia na bubului e salavata kei na itotogi ke sega ni dina na bubului, se beci.
^ Ipe., “e cakadodonu.”
^ Se “vakararawataki.”
^ Ipe., “na vanua ni nona matamata.”
^ Se “na kemuni irogorogo.”
^ Ipe., “nomuni neʹphesh kece.” Raica na iVakamacala ni Vosa.
^ Se “ena vuku ni.”
^ Ipe., “vagolea tani na matana.”
