iKarua ni Veigauna 7:1-22
7 Ni masu oti ga o Solomoni,+ e lutu sobu mai lomalagi na yameyame,+ e yameca na isoro kama kei na isoro qai robota na vale na lagilagi i Jiova.+
2 Era sega ni curu rawa na bete ena vale i Jiova ni robota tu na vale i Jiova na lagilagi i Jiova.+
3 Era raica na Isireli taucoko na lutu ni yameyame kei na kena robota tu na vale na lagilagi i Jiova, era tekicuva sara ina qele ena raravatu, era davo vakatoboicu ra qai vakavinavinakataki Jiova, “ni yalovinaka o koya, ni dei tu ga me tawamudu na nona loloma.”
4 E vakacaboisoro tiko na tui kei ira kece na lewenivanua ena mata i Jiova.+
5 E cabora o Tui Solomoni na isoro e 22,000 na bulumakau kei na 120,000 na sipi. E mani vakatabuya na tui kei ira kece na lewenivanua na vale ni Kalou dina.+
6 Era duri tu na bete ena vanua era veiqaravi kina, vaka kina o ira na Livai kei na nodra iyaya ni lagasere vei Jiova.+ (E cakava o Tui Tevita na iyaya qori mera vakavinavinakataki Jiova kina, “ni dei tu ga me tawamudu na nona loloma” ena gauna e dau vakacaucau vata kina kei ira* o Tevita.) Era uvuca sara i cake na bete na biukila+ e matadra nira tucake kece tu na Isireli.
7 E qai vakatabuya o Solomoni na lomadonu ni raranivale ena mata ni vale i Jiova, ni cabora e kea na isoro kama+ kei na tikina uro ni isoro ni veiyaloni, ni sa rui lailai na icabocabonisoro kopa+ e cakava o Solomoni me rauta na isoro kama, na isoro kakana,+ kei na tikina uro.+
8 Ena gauna qori e cakava o Solomoni e dua na soqo me vitu na siga+ kei ira kece na Isireli, e dua na ivavakoso levu sara era lako mai Lepo-emaci* me yaco ina Waimaca* o Ijipita.+
9 Ia ena ikawalu ni siga* era cakava e dua na soqo bibi,+ ni vitu na siga na nodra vakatabuya na icabocabonisoro, e vitu na siga na siga ni soqo.
10 Ena ika23 ni siga ni ikavitu ni vula, e talai ira na lewenivanua ina nodra vale nira reki+ qai marau na lomadra ena ka vinaka e vakayacora o Jiova vei Tevita, vei Solomoni kei ira na Isireli na nona tamata.+
11 O koya gona, e vakaotia o Solomoni na vale i Jiova kei na valenitui,+ kei na ka kece e vu mai loma i Solomoni me cakava ena vale i Jiova kei na nona vale, e cakava sara vakavinaka.+
12 E rairai sara vei Solomoni o Jiova+ ena bogi, e kaya vua: “Au sa rogoca na nomu masu, au sa digia na vanua qo me noqu me vale ni vakacaboisoro.+
13 Niu sogota na lomalagi me kua ni tau na uca, niu vakarota na vodre me kania na vanua, keu tala tale ga na matedewa vei ira na noqu tamata,
14 ke ra vakamalumalumutaki ira na noqu tamata+ era vakayacani ena yacaqu,+ era masu, era qara na mataqu, era biuta tale ga na nodra sala ca,+ au na qai rogoci ira mai lomalagi meu vosota na nodra ivalavala ca, au na vakabula na nodra vanua.+
15 Ia qo ena rai tiko na mataqu, ena rogo tu na daligaqu ena masu e cabori ena vanua qo.+
16 Au sa digia, au vakatabuya na vale qo me tiko kina na yacaqu me tawamudu,+ ena tiko kina na mataqu kei na lomaqu ena veigauna kece.+
17 “Ia o iko, ke o lako voli e mataqu me vakataki Tevita na tamamu ni o vakayacora na ka kece au vakaroti iko kina, o muria na noqu lawa kei na noqu lewa,+
18 au na vakadeitaka na idabedabe vakaturaga ni nomu veiliutaki vakatui,+ me vaka ga au yalataka vei Tevita na tamamu,+ niu kaya, ‘Ena sega ni mudu na tamata ena nomu iyatukawa me liutaki Isireli.’+
19 Ia ke oni vakanadakui au moni biuta na noqu lawa kei na noqu ivakaro au solia vei kemuni, moni lai qarava eso tale na kalou moni cuva kina,+
20 au na cavuraki Isireli mai na noqu vanua au solia vei ira,+ au na biuta tani mai mataqu na vale au vakatabuya ena yacaqu, au na cakava me dau vosabeci,* era na vakalialia tale ga na lewe ni veivanua kece.+
21 Ena vuki na vale qo me ibinibini vatu. O ira kece na lakosivita era na kurabui nira raica,+ era na kaya, ‘Na cava e cakava kina qori o Jiova ina vanua qo kei na vale qo?’+
22 Era na kaya, ‘Nira biuti Jiova+ na Kalou i tukadra, o koya e kauti ira tani mai na vanua o Ijipita,+ mera muria eso tale na kalou, mera cuva kina mera qarava.+ Qori na vuna e vakayacora kina vei ira na ca kece qo.’”+
iVakamacala e ra
^ Rairai dusi ira na Livai.
^ Se “na icurucuru i Emaci.”
^ Raica na iVakamacala ni Vosa.
^ Na siga ni oti na soqo, se na ika15 ni siga.
^ Ipe., “vosa vakaibalebale.”
