iKarua ni Veigauna 8:1-18
8 Oti e 20 na yabaki e tara tiko kina o Solomoni na vale i Jiova kei na nona vale,*+
2 e tara tale o Solomoni na koro e solia o Airami+ vei Solomoni, e vakatikori ira kina na Isireli.*
3 E lako tale ga o Solomoni i Emaci-sopa qai vakadruka.
4 E tarai* Tatimoa ena vanua talasiga kei na koro kece ni iyau+ e tara e Emaci.+
5 E tarai Pecioroni i Cake+ tale ga kei Pecioroni i Ra,+ e rua na koro taqomaki vinaka, e vakabai, e vakamatamata kei na ivakadei,
6 o Pealaci,+ kei na koro ni iyau kece nei Solomoni, na koro kece ni qiqinivalu,+ na nodra koro na dauvodo ose, kei na ka kece e via tara o Solomoni e Jerusalemi, e Lepanoni, kei na vanua kece e lewa.
7 Ia o ira kece na vo ni Itaiti, na Amoraiti, na Perisaiti, na Aivaiti kei na Jepusaiti+ era sega ni wili vata kei ira na Isireli,+
8 na nodra kawa era vo tu ena vanua era sega ni vakarusa na Isireli,+ e vakaroti ira o Solomoni mera cakacaka vakabobula me yacova mai na siga qo.+
9 Ia e sega ni vakabobulataka o Solomoni e dua na Isireli me cakava na nona cakacaka,+ nira nona dauvala, era iliuliu ni nona turaganivalu, era turaga ni nona qiqinivalu kei ira na nona dauvodo ose.+
10 Era le 250 na nodra turaga na vakailesilesi nei Tui Solomoni era vakatawai ira na tamata.+
11 E qai kauta o Solomoni na luvena yalewa o Fero+ mai na Koro i Tevita ina vale e tara vua,+ e kaya: “E watiqu o koya, ia me kua ni tiko ena vale nei Tui Tevita e Isireli, ni tabu na vanua e kau kina na Kato i Jiova.”+
12 E cabora sara o Solomoni na isoro kama+ vei Jiova ena icabocabonisoro+ i Jiova e tara o koya ena mata ni varada.+
13 E muria e veisiga, e vakacaboisoro me vaka ga e vakarota o Mosese ena Siga ni Vakacecegu,+ ena vula vou,+ kei na soqo lokuci vakatolu e veiyabaki,+ na Soqo ni Madrai Sega ni Vakaleveni,+ na Soqo ni Macawa,+ kei na Soqo ni Valetabanikau.*+
14 E qai lesi ira na bete ena nodra iwasewase+ mera veiqaravi me vaka e vakarota o Tevita na tamana, kei ira na Livai ena vanua era lesi kina mera vakacaucau+ mera veiqaravi e matadra na bete ena veisiga, o ira na ivakatawa ni matamata ena nodra iwasewase ena dui matamata,+ ni a vakarota qori o Tevita na tamata ni Kalou dina.
15 Era sega ni gole tani mai na ivakaro ni tui vei ira na bete kei ira na Livai ena vuku ni ka kece, kei na ka me baleta na valeniyau.
16 E vakarautaki vinaka* na cakacaka kece i Solomoni me tekivu ena siga e davo kina na yavu ni vale i Jiova+ me yacova ni tara oti. E mani vakaoti na vale i Jiova.+
17 E qai lako o Solomoni i Esioni-keperi+ kei Eloci+ ena matasawa ni vanua o Itomi.+
18 E talai ira na nona dauveiqaravi o Airami+ mera kauta vei Solomoni na waqa kei ira na daunisoko. Era lako i Oferi+ kei ira na dauveiqaravi i Solomoni mera kauta mai kea e 450 na taledi* koula+ ra qai kauta vei Tui Solomoni.+
iVakamacala e ra
^ Se “valenitui.”
^ Ipe., “na luvei Isireli.”
^ Se “tara tale.”
^ Se “Vale Sega ni Tudei.”
^ Se “tuvani vinaka, vakaoti.”
