iKarua ni Veigauna 9:1-31
9 E rogoca na ranadi ni Sipa+ na itukutuku me baleti Solomoni mani lako i Jerusalemi me vakatovolei Solomoni ena taro dredre.* E tomani koya e dua na matailakolako levu kei na kameli e kauta tiko na waiwai vakaisaluaki, e levu sara na koula+ kei na vatutalei. E lako yani o koya vei Solomoni, e tukuna vua na ka kece e tu e lomana.+
2 E sauma kece o Solomoni na nona taro. E sega ni dua na ka e dredre* vei Solomoni me vakamacalataka vua.
3 Ni raica na ranadi ni Sipa na vuku i Solomoni,+ na vale e tara,+
4 na kakana ena nona teveli,+ na nodra idabedabe na nona dauveiqaravi, na nodra cakacaka na nona dauveiqaravi ena teveli kei na nodra isulu, o ira na kauta na mena kei na nodra isulu, kei na nona isoro kama e cabora wasoma ena vale i Jiova,+ e druka sara ga.*
5 E mani tukuna o koya vua na tui: “E dina na ka au rogoca ena noqu vanua me baleta na ka oni rawata* kei na nomuni vuku.
6 Au sega ni vakabauta na itukutuku me yacova niu mai raica sara ga e mataqu.+ Raica! E vakatikina ga na ka e tukuni vei au me baleta na levu ni nomuni vuku.+ Oni uasivi mai na ka au rogoca.+
7 Era marau na nomuni tamata, era marau na nomuni dauveiqaravi era tu e matamuni ena veisiga mera rogoca na nomuni vuku!
8 Me vakavinavinakataki mada ga o Jiova na nomuni Kalou, o koya e taleitaki kemuni qai vakatikori kemuni ena nona idabedabe vakaturaga moni tui ena vuku i Jiova na nomuni Kalou. Ni lomani ira na Isireli na nomuni Kalou+ me vakataudeitaki ira me tawamudu, e lesi kemuni moni nodra tui, moni lewa vakadodonu, moni cakadodonu.”
9 E qai solia o koya vua na tui e 120 na taledi* koula,+ e levu sara na waiwai vakaisaluaki kei na vatutalei. E sega tale na waiwai vakaisaluaki me tautauvata kei na kena e solia na ranadi ni Sipa vei Tui Solomoni.+
10 O ira na dauveiqaravi nei Airami kei ira na dauveiqaravi nei Solomoni era kauta mai na koula mai Oferi,+ era kauta tale ga mai na kau yasi kei na vatutalei.+
11 E qai cakava na tui ena kau yasi na ikabakaba ni vale i Jiova+ kei na valenitui,+ vaka kina na api kei na nodra ivakatagi vakawa na daulagasere.+ E sega ni bau laurai na ka va qori ena vanua o Juta.
12 E solia tale ga o Tui Solomoni vua na ranadi ni Sipa na ka kece e taleitaka kei na ka e kerea, me sivia na ka e kauta yani vua na tui. E biubiu sara o koya me lesu ina nona vanua kei ira na nona dauveiqaravi.+
13 Na bibi ni koula e kau vei Solomoni ena dua na yabaki e 666 na taledi koula,+
14 e sega ni wili kina na ka era kauta yani na dauveivoli, o ira na dauvolivolitaki kei ira kece na tui Arapea kei ira na kovana ni vanua era kauta tiko yani na koula kei na siliva vei Solomoni.+
15 E cakava o Tui Solomoni e 200 na isasabai lelevu ena koula vakarautaki vinaka+ (e 600 na sikeli* koula vakarautaki vinaka ena dua na isasabai),+
16 kei na 300 na isasabai lalai* ena koula vakarautaki vinaka (e tolu na mina* koula ena dua na isasabai lailai). E qai biuta qori na tui ina Vale ni Veikau ni Lepanoni.+
17 E cakava tale ga na tui e dua na idabedabe vakatui levu ena tabua qai ubia ena koula dina.+
18 E ono na ikabakaba ina idabedabe vakatui kei na dua na itutuniyava koula e sema vata kei na idabedabe vakatui, e vakaitavatavaniliga na yasa ruarua ni idabedabe, erau duri volekata na itavatavaniliga e rua na laione.+
19 E duri tu ena ono na ikabakaba qori e 12 na laione,+ ena mua yadua ni ono na ikabakaba. E sega ni dua na matanitu e va qo na ka e cakava.
20 E koula kece na bilo ni gunu nei Tui Solomoni, e koula dina na iyaya kece ni Vale ni Veikau ni Lepanoni. E sega ni dua na ka e siliva, ni ka wale na siliva ena gauna i Solomoni.+
21 E dau soko i Tasisi+ na nona waqa na tui kei ira na dauveiqaravi nei Airami.+ E dau usana mai vakadua ena veiyatolu na yabaki na waqa ni Tasisi na koula kei na siliva, na tabua,+ na maqe, kei na pikoki.
22 E uasivi ira kece na tui e vuravura o Tui Solomoni ena iyau kei na vuku.+
23 Era via raici Solomoni na tui kece kei vuravura mera rogoca na nona vuku e biuta i lomana na Kalou.+
24 Era kauta yadua na nodra iloloma, na iyaya siliva, na iyaya koula, na isulu,+ na iyaragi, na waiwai vakaisaluaki, na ose, kei na meule, era cakava tiko qori e veiyabaki.
25 E nei Solomoni e 4,000 na valeniose kei na qiqinivalu, kei na 12,000 na ose,*+ e biuti ira tiko ga ena koro ni qiqinivalu, e voleka vua na tui e Jerusalemi.+
26 E lewa o koya na tui kece mai na Uciwai* ina nodra vanua na kai Filisitia me yacova na iyalayala kei Ijipita.+
27 E cakava vakalevu na tui na siliva e Jerusalemi me vaka na vatu kei na levu na kau sitari me vaka na vunilolo ena Sefila.+
28 Era dau kauta yani vei Solomoni na ose mai Ijipita+ kei na veivanua kece.
29 Na vo ni itukutuku me baleti Solomoni,+ na kena itekivu ina kena iotioti, e volai ena vosa i Necani+ na parofita, ena parofisai i Eaija+ na turaga ni Sailo, kei na itukutuku ni raivotu i Ito+ na dauraivotu me baleti Jerepoami+ na luvei Nipati.
30 E veiliutaki mai Jerusalemi o Solomoni me 40 na yabaki me lewai ira kece na Isireli.
31 E qai davo vata kei ira na tukana o Solomoni. Era mani buluti koya ena Koro i Tevita na tamana,+ e tui sara o Riopoami na luvena me sosomitaki koya.+
iVakamacala e ra
^ Se “ena vatavatairalago.”
^ Ipe., “sega ni dua na ka e vuni.”
^ Ipe., “e yali nona lomadei.”
^ Se “tukuna.”
^ Na isasabai lalai era dau taura na dauvanataka na dakaititi.
^ Dua na mina ena iVolatabu vakaIperiu e tautauvata kei na 570 na karamu (18.35 na onisi). Raica na iKuri B14.
^ Se “dauvodo ose.”
^ Oya na Uferetisi.