Aisea 36:1-22
36 Ena ika14 ni yabaki i Tui Esekaia, e lako cake o Senakaripi na tui Asiria+ me valuta kece na nodra koro vakabai na Juta qai vakadruka.+
2 E tala na Rapisake*+ kei na dua na mataivalu levu na Tui Asiria mai Lakisi+ vei Tui Esekaia e Jerusalemi. Era lai tu volekata na isalisaliniwai ni tobu e cake+ ena gaunisala levu e gole ina nodra vanua na dausavaisulu.+
3 E qai lako yani vua o Eliakimi+ na luvei Ilikaia, e lewa tiko na vale,* o Sepina+ na vunivola, kei Joa na luvei Esafa e dauvola na ka ni matanitu.
4 E mani kaya vua na Rapisake: “Yalovinaka mo dou tukuna vei Esekaia, ‘Qo na ka e tukuna na tui levu, na tui Asiria: “Na cava o vakanuinui tiko kina?+
5 O kaya tiko, ‘E tu vei au na vuku kei na kaukaua meu vala kina,’ ia qori e vosa wale ga. O cei o nuitaka mo beci au kina?+
6 Raica! O nuitaka na ititoko gasau dasila qo o Ijipita, ke dua e ravita ena lauta qai suaka na qeteqeteniligana. Qori na ivalavala i Fero na tui Ijipita vei ira kece era nuitaki koya.+
7 Ke o tukuna vei au, ‘Keimami nuitaki Jiova na neimami Kalou,’ ia sega ni o koya ga e taukena na vanua cecere kei na icabocabonisoro e kauta tani o Esekaia+ qai tukuna vei Juta kei Jerusalemi, ‘Moni cuva ena mata ni icabocabonisoro qo’?”’+
8 Ia qo mo bolea mada na noqu turaga na tui Asiria:+ Au na solia vei iko e 2,000 na ose ke o kunea rawa na tamata mera vodoka.
9 O na vakadruka vakacava e dua na kovana e dauveiqaravi lailai duadua ni noqu turaga, ni o vakanuinui vei Ijipita me solia vei iko na qiqinivalu kei ira na dauvodo ose?
10 Ia qo e sega ni vakadonuya o Jiova meu lako cake mai meu valuta na vanua qo meu vakarusa? O Jiova ga e tukuna vei au, ‘Mo lako cake mo valuta na vanua qo, mo vakarusa.’”
11 Eratou kaya sara vua na Rapisake+ o Eliakimi kei Sepina+ kei Joa: “Yalovinaka, moni vosa vei keitou na nomuni dauveiqaravi ena vosa vakaArame*+ ni keitou kila, moni kua ni vosa vei keitou ena vosa vakaJiu nira na rogoca o ira na tu ena bai.”+
12 Ia e kaya na Rapisake: “Vakacava, e talai au mai na noqu turaga meu tukuna ga na vosa qo vei kemudou kei na nomudou turaga? E sega ni talai au tale ga vei ira na dabe tiko ena bai, mera kania na nodra benu ra qai gunuva na nodra suasua vata kei kemudou?”
13 E duri sara na Rapisake qai kacivaka ena domolevu ena nodra vosa na Jiu,+ e kaya: “Moni rogoca na vosa ni tui levu, na tui Asiria.+
14 Qo na ka e tukuna na tui, ‘Me kua ni lawakitaki kemuni o Esekaia, ni na sega ni vakabulai kemuni rawa.+
15 Me kua ni rawai kemuni o Esekaia moni nuitaki Jiova+ ni kaya: “Ena vakabulai keda dina o Jiova, ena sega ni soli na koro qo e liga i tui Asiria.”
16 Moni kua ni vakarorogo vei Esekaia, ni qo na ka e tukuna na tui Asiria: “Meda veiyaloni, moni soro vei au, moni soli kemuni mai,* me kania na tamata yadua na nona vuanivaini kei na nona vuanilolo, me gunuva tale ga na wai ena nona mataniwai,
17 meu lako mada yani meu kauti kemuni ina dua na vanua e vaka ga na nomuni vanua,+ na vanua ni covuata kei na waini vou, na vanua ni madrai kei na loganivaini.
18 Me kua ni vakacalai kemuni o Esekaia ni kaya, ‘O Jiova ena vakabulai keda.’ Era bau vakabula na kalou ni veivanua na nodra vanua mai na liga i tui Asiria?+
19 I vei na kalou ni Emaci kei Apati?+ I vei na kalou ni Sefavemi?+ Sa ra bau vakabulai Samaria mai ligaqu?+
20 O cei mada vei ira kece na kalou ni veivanua qori sa vakabula na nodra vanua mai ligaqu, me vakabulai Jerusalemi kina o Jiova mai ligaqu?”’”+
21 Ia era galu tiko ga, era sega ni sauma na nona vosa ni vakarota na tui, “Moni kua ni sauma na nona vosa.”+
22 Eratou lako sara yani vei Esekaia o Eliakimi na luvei Ilikaia e lewa tiko na vale,* o Sepina+ na vunivola, kei Joa na luvei Esafa e dauvola na ka ni matanitu, ni dresulaki tu na nodratou isulu, eratou tukuna sara vua na ka e kaya na Rapisake.
iVakamacala e ra
^ Se “na nodra iliuliu na kauta na mena.”
^ Se “valenitui.”
^ Se “vakaSiria.”
^ Ipe., “Moni vosavakayalovinaka vei au, moni lako mai vei au.”
^ Se “valenitui.”
