Aisea 7:1-25
7 Ena gauna i Easi+ na luvei Jocame, na luvei Usaia na tui Juta, e lako cake o Tui Risini e Siria kei Pika+ na luvei Rimalaia na tui Isireli me rau valuti Jerusalemi, ia e* sega ni valuta rawa.+
2 E lai tukuni ena vuvale i Tevita: “Sa tovata kei Ifireimi o Siria.”
E yavavala sara ga na loma i Easi kei na lomadra na nona tamata me vaka na yavavala ni kau ni veikau ni liwava na cagi.
3 E qai kaya o Jiova vei Aisea: “Yalovinaka, mo lai tavaki Easi, o iko kei na luvemu o Siari-yasupi*+ ena mua ni isalisaliniwai ena tobu wai e cake,+ volekata na gaunisala e gole ina nodra vanua na dausavaisulu.
4 Mo kaya vua, ‘Moni qarauni kemuni, ni lomavakacegu. Kua ni rere, kua ni yalolailai ena vukudrau na mua ni tolonikau sa kubou tu qo, ena cudru katakata nei Risini kei Siria, kei na luvei Rimalaia.+
5 Ni ratou nakicataki kemuni o Siria, o Ifireimi, kei na luvei Rimalaia, eratou kaya:
6 “Tou lako cake me datou valuti Juta, me datou basuraka,* me datou vakadruka* me nodatou, tou qai lesia na luvei Tapeli me kena tui.”+
7 “‘Qo na ka e tukuna na Turaga Cecere Duadua o Jiova:
“Ena sega ni rawaSe yaco.
8 Ni ulu i Siria o TamasikoE ulu i Tamasiko o Risini.
Ena loma ga ni 65 na yabakiEna vurumemeataki vakadua o Ifireimi me kua ni dua na matanitu.+
9 E ulu i Ifireimi o Samaria,+E ulu i Samaria na luvei Rimalaia.+
Ke sega ni dei na nomuni vakabautaOni na sega ni vakataudeitaki.”’”
10 E vosa tiko ga vei Easi o Jiova:
11 “Mo kerea e dua na ivakatakilakila vei Jiova na nomu Kalou,+ e rawa ni titobu me vaka na iBulubulu* se cecere me vaka na lomalagi.”
12 Ia e kaya o Easi: “Au na sega ni kerea, seu vakatovolei Jiova.”
13 E kaya sara o Aisea: “Yalovinaka moni vakarorogo na vuvale i Tevita. E sega ni dua na ka vei kemuni moni vakaoca na tamata? Moni vakaoca tale ga na Kalou?+
14 O koya gona, ena vakaraitaka sara ga vei kemuni o Jiova e dua na ivakatakilakila: Raica! Ena bukete e dua na goneyalewa, ena vakasucuma e dua na gonetagane,+ ena vakayacani koya me o Imanueli.*+
15 Ena kania o koya na bata kei na denioni ni sa kila me cata na ka ca me digia na ka vinaka.
16 Ni bera ni kila na gonetagane me cata na ka ca me digia na ka vinaka, ena lala vakadua na nodrau vanua na tui o rerevaka.+
17 Ena vakayacora vei kemuni o Jiova, vei ira na nomuni tamata, kei na vuvale nei tamamuni na gauna e sega ni bau yaco me tekivu ena siga e tawasei koya kina vei Juta o Ifireimi,+ ni na tala yani o koya na tui Asiria.+
18 “Ena siga oya o Jiova ena kaluvi ira na lago mai na basoga lalai ni Naile e Ijipita kei na oni ena vanua o Asiria,
19 era na lako kece mai mera ro ena barinivatu ena buca,* ena qaranivatu, ena wavakavotona kece, kei na vanua kece e to kina na wai.
20 “Ena siga oya, ena tasia o Jiova ena itoro e voli mai na yasayasa ni Uciwai,* oya na tui Asiria,+ na uluna kei na vuti ni yavana, ena tasia tale ga na kumina.
21 “Ena siga oya e dua na tamata ena vakabula e dua na luvenibulumakau yalewa ena qelenibulumakau kei na rua na sipi.
22 Ena levu ni sucu ena kana bata o koya, nira na kana bata kei na denioni o ira kece na vo tiko ena vanua.
23 “Ena siga oya, na vanua kece e dau tu kina e 1,000 na vaini e kena isau e 1,000 na tikinisiliva, ena tu ga kina na kau vakavotona kei na co ca.
24 O ira na lako kina era na tauri dakaititi kei na gasau ni sa tubua na vanua kece ena kau vakavotona kei na co ca.
25 Na veiulunivanua kece e dau kutaritaki o na sega ni volekata ni o rerevaka na kau vakavotona kei na co ca, sa vanua ga mera kana kina na bulumakau kei na vanua mera lako voli kina na sipi.”
iVakamacala e ra
^ Se rawa ni, “erau.”
^ Kena ibalebale “Era na Lesu na Kena Vo.”
^ Se rawa ni, “vakararawataka.”
^ Se “curubotea na bai.” Ipe., “basuka.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Kena ibalebale “Tokoni Keimami na Kalou.”
^ Se “waimaca.”
^ Oya na Uferetisi.
