Akeai 1:1-15
1 Ena ikarua ni yabaki nei Tui Taraiasi, ena ikaono ni vula, ena imatai ni siga ni vula, e vosa o Jiova vei Akeai*+ na parofita me tukuna vei Serupepeli+ na luvei Salacieli na kovana e Juta, kei Josua na luvei Jiosataki na bete levu, e kaya:
2 “Qo na ka e tukuna o Jiova ni lewe vuqa,* ‘Era kaya na tamata qo, “Se bera ni kena gauna me tara* kina na vale* i Jiova.”’”+
3 E vosa tale o Jiova vei Akeai+ na parofita, e kaya:
4 “Qo na gauna moni tiko voli ga ena nomuni vale e ukutaki ena kau totoka, ni rusa tu na vale qo?+
5 Qo na ka e tukuna o Jiova ni lewe vuqa, ‘Moni tugana e lomamuni* na nomuni ivalavala.
6 Oni kaburaka vakalevu na sorenikau, ia e lailai oni tamusuka.+ Oni kana ia oni sega ni mamau. Oni gunu ia oni sega ni vakacegu. Oni vakaisulu ia oni sega ni katakata. O koya e saumi me cakacaka, e biuta na kena isau ena taga qaraqara.’”
7 “Qo na ka e tukuna o Jiova ni lewe vuqa, ‘Moni tugana e lomamuni* na nomuni ivalavala.’
8 “‘Moni lako cake ina ulunivanua moni kauta mai na kau.+ Ni tara na vale+ meu marautaka, meu vakalagilagi kina,’+ e kaya o Jiova.”
9 “‘Oni namaka e levu na ka ia e lailai oni rawata, ni oni kauta mai vale au uvuca tani.+ Ena vuku ni cava?’ e kaya o Jiova ni lewe vuqa. ‘Ni sa rusa tu na noqu vale, oni veiciciyaki ga moni kauaitaka na nomuni dui vale.+
10 O koya gona, e sega ni solia na kena tegu na lomalagi e cake, o vuravura e sega ni solia na vuana.
11 Au kaya tiko ga me lauqa na vuravura, na veiulunivanua, na covuata, na waini vou, na waiwai, na ka e tubu mai na qele, na tamata kei na manumanu, kei na cakacaka kece ni ligamuni.’”
12 E rogoca o Serupepeli+ na luvei Salacieli+ kei Josua na luvei Jiosataki+ na bete levu, kei ira kece na vo ni lewenivanua na vosa i Jiova na nodra Kalou kei na vosa i Akeai na parofita, ni talai koya o Jiova na nodra Kalou, era mani vakaraitaka na lewenivanua nira dokai* Jiova.
13 E qai kaya na itukutuku qo o Akeai na italai i Jiova vei ira na lewenivanua, me vaka na ka e lesi koya kina o Jiova, e kaya: “‘Au sa tiko vata kei kemuni,’+ e tukuna o Jiova.”
14 E mani uqeta o Jiova na yalo+ i Serupepeli na luvei Salacieli na kovana e Juta,+ na yalo i Josua+ na luvei Jiosataki na bete levu, kei na yalodra na vo ni lewenivanua, era lako sara yani mera cakacaka ena vale i Jiova ni lewe vuqa, na nodra Kalou.+
15 E yaco qo ena ika24 ni siga, ena ikaono ni vula, ena ikarua ni yabaki nei Tui Taraiasi.+
iVakamacala e ra
^ Kena ibalebale “Sucu ena Dua na Soqo.”
^ Qo na mataivalu vakalomalagi.
^ Se “tara tale.”
^ Se “valenisoro.”
^ Se “Moni vakasamataka vinaka.”
^ Se “Moni vakasamataka vinaka.”
^ Ipe., “rerevaki.”
