Nodra Cakacaka na Yapositolo 17:1-34
17 Erau takosovi Amifipoli kei Apolonia, rau yaco sara i Cesalonaika,+ e tiko kina e dua na nodra valenilotu na Jiu.
2 E curu i loma o Paula me vaka ga na nona ivakarau,+ qai veivosakitaka kei ira na iVolatabu ena tolu na siga ni vakacecegu.+
3 E vakamacalataka qai vakadinadinataka mai na ka e volai kina ni na vakararawataki mada na Karisito,+ me na vakaturi tale ga mai na mate,+ e kaya: “Qo sara ga na Karisito, o Jisu au vunautaka tiko vei kemuni.”
4 Era mani vakabauta eso, ra mai maliwai rau sara o Paula kei Sailasa,+ era vakayacora tale ga qo e levu na kai Kirisi era dau qarava na Kalou, wili tale ga kina e levu na marama kilai.
5 Ia ena nodra vuvu na Jiu,+ era sa qai soqoni ira vata mai eso na daucaka ca era wavoki wale tu ga ena makete mera vakatubuca ena koro. Era curuma vakaukaua na vale nei Jesoni nira via kauti rau vakasaurara o Paula kei Sailasa vei ira na sa maue voli ena koro.
6 Nira sega ni kunei rau, era qai yarataki Jesoni yani kei na so tale na veitacini vei ira na iliuliu ni koro, era kacivaka: “O rau na vakaleqa tiko na vuravura taucoko erau sa tiko tale ga qo vei keda,+
7 ia e qai maroroi rau o Jesoni me nona vulagi. O ira kece na tagane qo era saqata na lawa i Sisa,* era kaya ni dua tale tiko ga na tui o Jisu.”+
8 Na vosa ya era cudru sara ga kina na lewenivanua kei ira na iliuliu ni koro.
9 Era mani vakaukauataki Jesoni kei ira na kena vo mera solia e dua na umailavo me kedra isere, oti era sa qai sereki.
10 Ni sa buto na vanua, era talatala na veitacini vei rau o Paula kei Sailasa me rau gole i Peria. Ni rau yaco yani, erau lako sara ina nodra valenilotu na Jiu.
11 Era yalorawarawa vakalevu na Jiu mai Peria ni vakatauvatani kei ira mai Cesalonaika, ni gauna era rogoca kina na vosa, e gu na lomadra mera dikeva vinaka na iVolatabu e veisiga mera vakadeitaka kina se dina na ka era rogoca se sega.
12 Era mani vakabauta e levu, wili tale ga kina eso na turaga kei na marama rogo ni Kirisi.
13 Nira rogoca na Jiu mai Cesalonaika ni sa lai vunautaka tale ga o Paula na vosa ni Kalou i Peria, era mani lako tale ga i kea mera lai vakaucaca vei ira na lewenivanua mera cudru kina.+
14 Era vukitotolo sara na veitacini mera talai Paula me muri sobu i baravi,+ ia erau tiko laivi mai o Sailasa kei Timoci.
15 Ia o ira na kauti Paula era kauti koya sara i Aceni. Nira sa lesu, sa qai vakaroti ira o Paula mera lai tukuna vei Sailasa kei Timoci+ me rau lako totolo yani vua.
16 Ni waraki rau tiko o Paula mai Aceni, e votivoti sara ga vua ni raica na sinai ni koro ena matakau.
17 Mani veivosaki kei ira na Jiu ena nodra valenilotu kei na so tale era dau qarava na Kalou. E veivosaki tale ga e veisiga ena makete vei ira na dau tu kina.
18 Ia era qai veiba vata kei koya eso na Epikuro* kei na Sitoike.* Era kaya eso: “Na cava e via kaya tiko na karakivosa qo?” Eso tale era kaya: “O ka qo e vaka e nodra mata tiko mai na kalou tani.” Baleta ni vunautaka tiko na itukutuku vinaka kei Jisu kei na veivakaturi.+
19 Era tauri koya ra qai kauti koya ina Areopakasi,* era kaya: “Vakamacalataka mada vei keimami na ivakavuvuli vou o tukuna tiko.
20 Ni o kauta tiko mai eso na ivakamacala e duatani e daliga i keimami. Keimami via kila tale ga na ibalebale ni veika qo.”
21 E dau nodra ivakarau na kai Aceni kei ira na vulagi era tiko* e kea mera vakamacalataka se rogoca eso na ka vou.
22 Mani tucake o Paula ena lomadonu ni Areopakasi+ qai kaya:
“Kemuni na kai Aceni, au raica ni oni gumatuataka na sokalou ni vakatauvatani kei ira tale eso.+
23 Kena ivakaraitaki, niu lako voli meu vakaraica na ka oni dau soro kina, au raica sara e dua na icabocabonisoro e volai kina ‘Vua na Kalou e Tawakilai.’ O koya sara ga na kalou tawakilai oni qarava tiko qori, au mai vunautaka qo vei kemuni.
24 Na Kalou e buli vuravura kei na ka kece e tu kina, o koya qo na Turaga ni lomalagi kei na vuravura,+ e sega gona ni vakaitikotiko ena valenisoro e caka ena liga,+
25 e sega tale ga ni qaravi ena liga ni tamata,+ ni o koya ga e solia vei keda kece na bula, na icegu,+ kei na ka kece ga.
26 E bulia na matatamata kece mai na dua ga na tamata,+ mera tawana na yasa i vuravura kece.+ E lesia tale ga na Kalou na nodra gauna kei na iyalayala ni vanua mera tiko kina,+
27 mera vakasaqara na Kalou, de dua era na vakayayamo ra qai kunei koya sara,+ ni sega ni yawa o koya vei keda yadua.
28 Ni o koya ga e buli keda, e vakavuna tale ga noda bula tiko kei na noda yavala me vaka ga era kaya eso na nomuni dauniserekali, ‘Eda luvena* tale ga o keda.’
29 “O koya gona nida luve* ni Kalou,+ meda kua ni nanuma ni Kalou e vaka na koula se siliva se vatu, se ka e bulia na tamata ena nona maqosa kei na nona vakasama ga.+
30 Dina ni vakalaiva voli mai na Kalou na gauna ni lecaika oya,+ ia qo sa tukuna o koya vei ira kece ena veivanua mera veivutuni.
31 Ni sa lokuca o koya e dua na siga me lewai+ vuravura kina ena yalododonu ena liga i koya e lesia, e vakarautaka tale ga e dua na ivakadei vei ira kece ni sa vakaturi koya mai na mate.”+
32 Nira rogoca na veivakaturi mai na mate, eso era veivakalialiai.+ Eso tale era kaya: “Keimami na rogoci iko tale ena ka qo.”
33 Mani biuti ira o Paula,
34 ia eso na tagane era mai tomani koya ena nodra sa vakabauta, wili kina o Taionisio, na turaganilewa ni Areopakasi, e dua tale ga na marama na yacana o Tamarisi, kei na so tale.
iVakamacala e ra
^ Se “na Empara.”
^ Dua na ilala era nona imuri na daunifilosofi o Epikuro, era tukuna ni dodonu meda guta na marau.
^ Dua na ilala era nona imuri na daunifilosofi o Zeno, era tukuna ni dodonu meda lewa ga noda bula, meda kua ni kauaitaka na rarawa kei na marau.
^ “Areopakasi,” e dua na delana e Aceni makawa, na itikotiko ni mataveilewai cecere.
^ Se “era gade.”
^ Se “kawa.”
^ Se “kawa.”
