Dauveilewai 1:1-36
1 Ena gauna e mate kina o Josua+ era tarogi Jiova sara na Isireli:*+ “O cei vei keimami ena liu cake me valuti ira na kai Kenani?”
2 E kaya o Jiova: “Ena lako cake o Juta.+ Raica! Au sa solia e ligana na vanua.”
3 E qai kaya o Juta vei Simioni na tuakana: “Me daru lako cake vata ina vanua e votai me noqu+ me daru valuti ira na kai Kenani. Au na qai lako vata kei iko ina vanua e votai me nomu.” E tomani koya sara o Simioni.
4 Nira lako cake na Juta e qai soli ira na kai Kenani kei ira na Perisaiti e ligadra o Jiova,+ era mani vakadruka e 10,000 na tamata e Peseki.
5 Era raici Etonipeseki e Peseki era valuti koya e kea, era vakadrukai ira tale ga na kai Kenani+ kei ira na Perisaiti.+
6 Ni dro o Etonipeseki era cicimuria mera toboki koya, era qai musuka na nona idovidovinikakana kei na iqaqalo levu ni yavana.
7 E kaya sara o Etonipeseki: “Era vakatotomi kakana tiko ena ruku ni noqu teveli e 70 na tui au a musuka na nodra idovidovinikakana kei na iqaqalo levu ni yavadra. E sauma ga vei au na Kalou na ivakarau au dau cakava.” Oti qori era kauti koya i Jerusalemi+ qai mate e kea.
8 Era valuti Jerusalemi tale ga na lewe i Juta,+ era vakadruka, era ravuta ena iseleiwau ra qai vakama na koro.
9 Oti era lako sobu na lewe i Juta mera valuti ira na kai Kenani era tiko ena veiulunivanua, ena Nikepi kei na Sefila.+
10 Era mani lako yani na Juta mera valuti ira na kai Kenani era tiko e Epironi (e dau yaca i Epironi tu o Kiriaciaripa), era ravuti Sesei tale ga, o Eimani, kei Talimei.+
11 Era biubiu mai kea mera valuti ira na lewe i Tipiri.+ (E dau yaca i Tipiri tu o Kiriaciseferi.)+
12 E qai kaya o Kelepi:+ “Na tagane e ravuti Kiriaciseferi me vakadruka, au na soli Akesa na luvequ yalewa me watina.”+
13 E vakadruka na vanua oya o Ocinieli+ na luvei Kinasi+ na taci Kelepi. E soli Akesa sara na luvena yalewa me watina.
14 Ni lako tiko i vale o Akesa e uqeti Ocinieli me kerea vei tamana e dua na tikiniqele. E sobu sara mai na nona asa* o Akesa. E tarogi koya o Kelepi: “Na cava o vinakata?”
15 E kaya vua o Akesa: “Yalovinaka mo solia mada vei au na ka meu kalougata kina, ni o sa solia oti vei au na tikiniqele ena ceva,* mo soli Kulocimeimi* tale ga vei au.” E mani soli Kuloci i Cake kei Kuloci i Ra o Kelepi vua.
16 Era biuta mai na koro ni vuniniuniu+ na kawa nei Kenaiti+ na vugoi Mosese+ kei ira na lewe i Juta mera lako cake ina vanua talasiga e Juta ena ceva kei Arati.+ Era lako i kea ra qai tiko vata kei ira na lewenivanua.+
17 Ia o Juta e lako vata kei Simioni na tuakana, era valuti ira na kai Kenani era tiko e Sifaci, era vakarusa.+ Era mani vakayacana na koro oya me o Orima.*+
18 Oti oya e ravuti Kesa+ kei na kena vanua o Juta, o Asikiloni+ kei na kena vanua, kei Ekironi+ kei na kena vanua.
19 E tokoni Juta tiko o Jiova, era mani taukena kina na veiulunivanua, ia era sega ni cemuri ira rawa na tiko ena vanua bucabuca ni vakaisele takelo na nodra qiqinivalu.*+
20 Era soli Epironi vei Kelepi me vaka e yalataka o Mosese+ qai cemuri ratou tani mai kea na tolu na luvei Anaki.+
21 Ia era sega ni cemuri ira na Jepusaiti era tiko e Jerusalemi o ira na Penijamini, era mani tiko ga kei ira na Penijamini e Jerusalemi o ira na Jepusaiti me yacova na siga qo.+
22 Era mani lako cake na vuvale i Josefa+ mera valuti Peceli, e tokoni ira o Jiova.+
23 Era lai yamata i Peceli na vuvale i Josefa (ia e dau yaca tu ni koro qo o Lusa),+
24 era raica sara na yamata e dua na tagane ni biuta mai na koro. Era mani kaya vua: “Yalovinaka, vakaraitaka mada vei keimami na sala ina koro, keimami na yalovinaka vei iko.”*
25 E vakaraitaka sara vei ira na sala ina koro, era qai ravuta na koro ena iseleiwau, ia era vakabula ga na tagane oya kei ira kece na nona vuvale.+
26 E lako sara na tagane qori ina nodra vanua na Itaiti, e tara kina e dua na koro qai vakayacana me o Lusa, qori na yacana me yacova na siga qo.
27 O Manasa e sega ni taukeni Pecisiani kei na kena tauni lalai,* o Tenaki+ kei na kena tauni lalai, o ira na lewe i Doa kei na kena tauni lalai, o ira na lewe i Ipiliami kei na kena tauni lalai, kei ira na lewe i Mekito kei na kena tauni lalai.+ Era sega ni via biuta na vanua qo na kai Kenani.
28 Ena gauna era kaukaua mai kina na Isireli era qai vakavorakitaki ira na kai Kenani mera cakacaka wale,+ ia era sega ni cemuri ira vakadua.+
29 Era sega ni cemuri ira na kai Kenani era tiko e Keseri na Ifireimi. Era tiko vata ga kei ira na kai Kenani e Keseri.+
30 Era sega ni cemuri ira na lewe i Kiteroni kei ira na lewe i Neloli o ira na Sepuloni.+ Era tiko vata ga kei ira na kai Kenani ra qai vakavorakitaki ira mera cakacaka wale.+
31 O Aseri e sega ni cemuri ira na lewe i Ako kei ira na lewe i Saitoni,+ o Alapi, o Ekisipi,+ o Elipa, o Efiki,+ kei Riopi.+
32 Era tiko ga na Aseri kei ira na kai Kenani era tiko ena vanua, nira sega ni cemuri ira.
33 O ira na Nafitalai era sega ni cemuri ira na lewe i Pecisemesi kei ira na lewe i Pecianaci,+ ia era tiko ga kei ira na kai Kenani era tiko ena vanua.+ Era qai vakavorakitaki mera cakacaka wale vei ira o ira na lewe i Pecisemesi kei ira na lewe i Pecianaci.
34 Era yalana na Amoraiti mera tiko ga ena veiulunivanua na Tani, era sega ni vinakata mera lako sobu ina vanua bucabuca.+
35 Era via tiko ga na Amoraiti e Ulu i Iresi, Eijaloni+ kei Selipimi.+ Ia ni kaukaua mai na vuvale i Josefa, era qai vakavorakitaki ira mera cakacaka wale.
36 Na nodra vanua na Amoraiti e tekivu ena icabecabe e Akirapimi,+ mai Seila me lako cake.
iVakamacala e ra
^ Ipe., “luvei Isireli.”
^ Se rawa ni, “vakasausau o koya ni vodo tiko ena asa.”
^ Se “na Nikepi.”
^ Kena ibalebale “Beseni Wai.”
^ Kena ibalebale “Vakarusai.”
^ Ipe., “qiqinivalu kaukamea.”
^ Ipe., “vakaraitaka vei iko na dei ni loloma.”
^ Se “wavokita.”
