Dauveilewai 12:1-15
12 Era kacivi vata na Ifireimi ra qai takoso i Safoni,* era kaya vei Jefica: “Na cava o sega ni kacivi keimami kina me keimami tomani iko ni o takoso mo valuti ira na Amoni?+ Keimami na vakamai iko kei na nomu vale.”
2 Ia e kaya vei ira o Jefica: “O yau kei ira na noqu tamata keimami veiba vakalevu kei ira na Amoni. Au a kere veivuke vei kemuni, ia oni sega ni vakabulai au mai ligadra.
3 Niu raica ni oni sega ni vakabulai au, au mani bolemate meu valuti ira na Amoni,+ e qai soli ira vei au o Jiova. Na cava oni lako mai kina nikua moni valuti au?”
4 E mani kumuni ira kece na kai Kiliati+ o Jefica mera valuti Ifireimi, era vakadrukai ira na Ifireimi o ira na kai Kiliati, nira kaya: “O kemuni ga qo oni dro mai Ifireimi, oni kai Kiliati oni tiko e Ifireimi kei Manasa.”
5 Era liu na Kiliati vei ira na Ifireimi mera yadrava na vanua mamatia ena Joritani.+ Nira via dro na Ifireimi era na kaya, “Meu takoso mada,” era na taroga na kai Kiliati vei ira yadua, “O dua na Ifireimi?” Ni tukuna, “Sega!”
6 era na kaya vua, “Cavuta mada Jiboleta.” Ia ena tukuna o koya: “Siboleta,” ni sega ni cavuta donu na vosa qori. Era na vesuki koya ra qai vakamatea ena vanua mamatia ena Joritani. Era bale e 42,000 na Ifireimi ena gauna oya.
7 E lewai ira na Isireli o Jefica me ono na yabaki, oti e qai mate o Jefica na turaga ni Kiliati, e bulu ga ena nona koro mai Kiliati.
8 E taravi koya o Ipisani mai Peceliema me lewai ira na Isireli.+
9 E 30 na luvena tagane e 30 na luvena yalewa. E talai ira na luvena yalewa mera vakawatitaki ira na tagane era sega ni lewe ni nona mataqali, e kauta tale ga mai e 30 na yalewa me watidra na luvena tagane. E lewai ira na Isireli me vitu na yabaki.
10 E qai mate o Ipisani e bulu ga e Peceliema.
11 E taravi koya o Eloni na Sepuloni me lewai ira na Isireli, e lewai ira na Isireli me tini na yabaki.
12 E qai mate o Eloni na Sepuloni, e bulu ga e Eijaloni na vanua nei Sepuloni.
13 E taravi koya o Apitoni na luvei Ileli na kai Piraconi me lewai ira na Isireli.
14 E 40 na luvena tagane e 30 na makubuna tagane era vodoka e 70 na asa. E lewai ira na Isireli me walu na yabaki.
15 E qai mate o Apitoni na luvei Ileli na kai Piraconi, e bulu ga e Piraconi ena nodra vanua na Ifireimi ena nodra ulunivanua na Amalekaiti.+
iVakamacala e ra
^ Se rawa ni, “takoso ina vualiku.”
