Dauveilewai 20:1-48
-
Ra valuti na Penijamini (1-48)
20 Era mani biubiu kece na Isireli mai Tani+ me yaco i Pieri-sepa kei na vanua o Kiliati,+ era soqoni vata ena duavata na isoqosoqo taucoko ena mata i Jiova e Misipa.+
2 Era mai tu kei na ivavakoso ni tamata ni Kalou na nodra turaga na tamata kei na yavusa kece e Isireli, era le 400,000 na sotia era taubale era vakaiseleiwau.+
3 Era rogoca na Penijamini nira lako cake i Misipa na Isireli.
Era kaya sara na Isireli: “Moni tukuna mai vei keimami se yaco vakacava na ka vakadomobula qo?”+
4 E mani sauma na Livai,+ na watina na yalewa a vakamatei: “Au a lako mai Kipea+ e nodra na Penijamini kei na watiqu lailai me keirau moce kina ena bogi.
5 Era via vakacacani au na lewe* i Kipea ra qai wavokita na vale ena bogi. E nodra inaki mera vakamatei au, ia era kucuva na watiqu lailai mani mate.+
6 Au taura sara na watiqu lailai, au musumusuki koya au qai vakauta e yadua na tikina ina vanua kece e votai vei Isireli+ nira vakayacora na ivalavala vakamadua qai beci e Isireli.
7 Ia qo moni tukuna mai na Isireli taucoko na nomuni nanuma kei na nomuni lewa.”+
8 Era tu kece ena duavata na tamata, era kaya: “Ena sega ni dua vei keimami ena lako ina nona valelaca se lesu ina nona vale.
9 Qo na ka eda na cakava vei Kipea: Eda na lako cake meda valuta nida vakawirimadigi.+
10 Eda na digia e 10 na tamata vei ira na 100 mai na yavusa kece e Isireli, e 100 vei ira na le 1,000, e 1,000 vei ira na le 10,000, mera kau kakana me kedra na mataivalu mera valuti Kipea e nei Penijamini, ena ivalavala veibeci era cakava e Isireli.”
11 Era kumuni vata gona na Isireli taucoko mera duavata ni valuta na koro.
12 Era tala eso na tagane na yavusa e Isireli vei ira kece na lewe ni yavusa na Penijamini, era kaya: “Na ka vakadomobula cava oni vakayacora ena kemuni maliwa?
13 Moni soli ira mai na tagane macawa era tiko qori e Kipea+ me keimami vakamatei ira, me keimami vakaotia kina na ka ca e Isireli.”+ Ia era sega ni muria na Penijamini na ka era tukuna na wekadra na Isireli.
14 Era kumuni sara e Kipea na Penijamini mai na koro kece mera lai valuti ira na Isireli.
15 Era mani digitaka ena siga oya na Penijamini e 26,000 na tamata era vakaiseleiwau mai na nodra koro kece, e 700 ga e digitaki vei ira na lewe i Kipea.
16 Era lewe ni mataivalu qo e 700 na tamata digitaki era liga imawi. E rawa nira rabotaka kece na vatu me sega ni cala, ke lekaleka mada ga.*
17 Era digitaka na Isireli e 400,000 na tamata vakaiseleiwau,+ era sega ni wili kina na Penijamini. Era dauvala kece.
18 Era tucake mera lako cake i Peceli mera taroga na Kalou.+ Era qai kaya na Isireli: “O cei vei keimami me liutaka na nodra valuti na Penijamini?” E kaya o Jiova: “Me liutaka o Juta.”
19 Oti oya era lako cake na Isireli ena mataka mera keba e Kipea.
20 Era lako yani na Isireli mera valuti ira na Penijamini, era tuva vakaivalu mera valuti ira e Kipea.
21 Era biuti Kipea mai na Penijamini, era vakamatea sara e 22,000 na Isireli ena siga oya.
22 Ia era yaloqaqa mai na Isireli, era lako tale mera tuva vakaivalu ena vanua vata ga me vaka ena imatai ni siga.
23 Era mani lako cake na Isireli ra qai tagi ena mata i Jiova me yacova na yakavi, era tarogi Jiova: “Me keimami lako tale me keimami valuti ira na wekai keimami na Penijamini?”+ E kaya sara o Jiova: “Moni lako cake, moni valuti ira.”
24 Era mani toro volekati ira yani na Penijamini na Isireli ena ikarua ni siga.
25 Era biuti Kipea mai na Penijamini mera vakasota ena ikarua ni siga, era vakamatea tale e 18,000 na Isireli+ era vakaiseleiwau taucoko.
26 Oti era lako cake taucoko na Isireli i Peceli. Era tagi, era dabe ena mata i Jiova+ mera lolo+ ena siga oya me yacova na yakavi, era cabora tale ga na isoro kama+ kei na isoro ni veiyaloni+ ena mata i Jiova.
27 Oti oya era tarogi Jiova+ na Isireli ni a tiko e kea ena gauna oya na kato ni veiyalayalati ni Kalou dina.
28 Ena gauna oya e veiqaravi* tiko ena mata ni kato o Finiasi+ na luvei Eliesa, na luvei Eroni. Era taroga: “Me keimami lako tale me keimami valuti ira na wekai keimami na Penijamini se me kua?”+ E kaya o Jiova: “Lako cake, au na soli ira e ligamuni nimataka.”
29 Era qai lesia na Isireli eso na tagane mera toka vuni+ e Kipea taucoko.
30 Era lako cake sara na Isireli mera valuti ira na Penijamini ena ikatolu ni siga, era tuva vakaivalu mera valuti Kipea me vaka ga e liu.+
31 Nira lako yani na Penijamini mera vakasota kei ira na mataivalu, era vagolei tani mai na koro.+ Me vaka ga e liu era tekivu ravuravu ra qai vakamatea eso e gaunisala, e dua e lako cake i Peceli, e dua tale i Kipea, e rauta ni 30 na Isireli era mate ena lomanivanua.+
32 Era kaya sara na Penijamini: “Era sa druka e matada me vaka ga e liu.”+ Ia era kaya na Isireli: “Meda suka, meda vagolei ira tani mai na koro me yaco i gaunisala.”
33 Era duri kece na Isireli mai na nodra tikina mera lai tuva vakaivalu e Pealitamari, ia o ira na Isireli era toka vuni era biuta mai na nodra tikina ena yasayasa o Kipea.
34 Era lako gona yani donui Kipea e 10,000 na tamata digitaki mai vei ira kece na Isireli, e kaukaua sara na nodra veiraravui. Ia era sega ni kila na Penijamini na leqa sa vakarau yaco.
35 E qai vakadrukai ira na Penijamini+ o Jiova e matadra na Isireli, era mani vakamatea na Isireli ena siga oya e 25,100 na Penijamini era vakaiseleiwau taucoko.+
36 Era nanuma na Penijamini nira sa druka na Isireli nira vakasuka mai vei ira na Penijamini,+ ia era vakasuka nira nuitaki ira na toka vuni mai Kipea.+
37 Era yavala totolo sara na toka vuni mera cici yani i Kipea. Era tawase sara na toka vuni mera ravuta na koro taucoko ena iseleiwau.
38 Era sa lalawataka oti na Isireli mera vakuvuya na kubou ena koro o ira na toka vuni mai kea.
39 Nira suka ena ivalu na Isireli, era tekivu ravuravu na Penijamini era vakamatea e 30 na Isireli,+ era kaya: “Era sa druka tale e matada me vaka ga ena ivalu e liu.”+
40 Ia e tekivu kuvu cake na kubou mai na koro me vaka e dua na duru kubou. Nira vuki na Penijamini mera rai yani, era raica ni sa yameyame tu i lomalagi na koro taucoko.
41 Era qai vuki yani na Isireli, dua na ka nodra lomaleqa na Penijamini nira raica na leqa sa yacovi ira.
42 Era mani drovaki ira na Isireli nira gole ina vanua talasiga, ia e muri ira na ivalu, nira mai veitokoni na tagane era biuta mai na koro mera vakamatei ira.
43 Era wavokiti ira na Penijamini ra qai cicimuri ira tiko ga. Era buturaki ira donui Kipea ena tokalau.
44 Era mani bale e 18,000 na Penijamini, era tamata qaqa kece.+
45 Era vuki na Penijamini mera dro ina vanua talasiga ena vatu o Rimoni,+ era mani vakamatea* na Isireli e 5,000 e gaunisala, era cicimuri ira tiko ga me yaco sara i Kitomi ra qai vakamatea tale e 2,000 na tamata.
46 Era bale ena siga oya e 25,000 taucoko na Penijamini era vakaiseleiwau,+ era tamata qaqa kece.
47 Ia e 600 era dro ina vanua talasiga ena vatu o Rimoni, era tiko ga ena vatu o Rimoni me va na vula.
48 Era lesu tale na Isireli vei ira na Penijamini ra qai ravuti ira na lewenikoro ena iseleiwau, o ira na lewenivanua, na manumanu, na ka kece e vo. Era vakama tale ga na koro kece era donuya.
iVakamacala e ra
^ Se rawa ni, “itaukeiniqele.”
^ Ipe., “me vaka na balavu ni drauniulu.”
^ Ipe., “duri.”
^ Ipe., “tomika.”
