Dauveilewai 7:1-25
7 E yadra sara vakamataka o Jerupeali, oya o Kitioni,+ kei ira kece na tamata era tokoni koya mera keba ena toevu o Eroti, ni tiko na nodra keba na Mitiani ena vualiku ni keba nei Kitioni ena delana o More ena vanua bucabuca.
2 E kaya o Jiova vei Kitioni: “Era sa rui lewe levu na tovata kei iko meu soli ira kina na Mitiani e ligadra.+ De tukutukuni koya o Isireli me kaya vei au: ‘E vakabulai au ga na ligaqu.’+
3 Yalovinaka mo kacivaka nira vakarorogo tu na tamata: ‘O koya e rere qai sautaninini, me lesu i vale.’”+ E vakatovolei ira o Kitioni. Era mani lesu i vale e 22,000 na tamata, e vo ga e 10,000.
4 E kaya tale vei Kitioni o Jiova: “Era se lewe levu tiko ga. Mera lako sobu mada i wai meu vakatovolei ira e kea mo kila. Niu tukuna vei iko, ‘O koya qo me lako vata kei iko,’ ena lako vata kei iko o koya, ia niu tukuna vei iko, ‘O koya qo ena sega ni lako vata kei iko,’ ena sega ni lako vata kei iko o koya.”
5 E mani kauti ira sobu na tamata i wai.
E qai kaya o Jiova vei Kitioni: “Mo wasei ira kece na dramica na wai e yamedra me vaka e dramica na koli, mai vei ira na tekiduru mera gunu.”
6 Era le 300 na tamata era dramica na wai nira biuta e gusudra na ligadra. Ia o ira na vo ni tamata era tekiduru mera gunu.
7 E kaya sara o Jiova vei Kitioni: “Au na vakabulai kemuni niu vakayagataki ira na le 300 na tamata era dramica na wai, au na soli Mitiani e ligamu.+ Ia mera lesu i vale na vo ni tamata.”
8 Nira taura oti ga na kedra kei na davui* mai vei ira na tamata, e talai ira kece na vo ni Isireli ina nodra vale, e tauri ira tiko ga na le 300 na tamata. E toka mai ra na nodra keba na Mitiani ena vanua lolovira.+
9 E tukuna vua o Jiova ena bogi oya: “Mo vakarau, mo ravuta na keba niu sa solia i ligamu.+
10 Ia ke o rere ni ravuta, mo lako sobu ina keba vata kei Fura na nomu dauveiqaravi.
11 Mo rogoca na ka era tukuna, o na qai yaloqaqa* mo ravuta na keba.” Oti e lako sobu o koya kei Fura na nona dauveiqaravi ina nodra iyalayala na mataivalu era keba tiko.
12 Era robota na vanua bucabuca na Mitiani, na Amaleki, kei ira kece mai na Tokalau+ me vaka na yavusa vodre. E sega ni wiliki rawa na nodra kameli,+ ni levu me vaka na iwiliwili ni mataninuku ni matasawa.
13 E lako yani o Kitioni, e raica sara e dua na tamata ni talanoataka tiko na nona tadra vua na nona itokani, e kaya: “Qo na ka au tadra. E vakatoqiqi yani e dua na ibuli madrai varile mokimokiti ena nodra keba na kai Mitiani. E yaco sara ina dua na valelaca, e coqa vakaukaua mani bale.+ Io e vakatoboicutaka na valelaca, e bale sara na valelaca.”
14 E sauma na nona itokani: “Qori ga na iseleiwau i Kitioni+ na luvei Joasi na turaga ni Isireli. Na Kalou ga e soli ira na kai Mitiani kei na keba taucoko e ligana.”+
15 Ni rogoca ga o Kitioni ni vakamacalataka tiko na tamata oya na tadra kei na kena ibalebale,+ e cuva sara me sokalou. Oti e lesu ina nodra keba na Isireli, e kaya: “Moni vakarau, ni sa solia o Jiova na nodra keba na Mitiani i ligamuni.”
16 E qai wasei ira na 300 na tamata me tolu na iwasewase, e solia vei ira kece na davui+ kei na saqa lala lelevu e tawa tiko kina na cina caucaudre.
17 E kaya vei ira o koya: “Moni raici au mai, moni cakava tale ga na ka au cakava. Niu lako yani ina iyalayala ni keba, moni cakava tale ga na ka au cakava.
18 Niu uvuca na davui, o yau kei ira na tiko vata kei au, moni uvuca tale ga na davui wavokita na keba taucoko, moni qai kailavaka, ‘Na ivalu i Jiova kei Kitioni!’”
19 E lako yani o Kitioni kei na le 100 na tamata era tomani koya ina iyalayala ni keba ni tekivu na yadra* ena lomaloma ni bogi, oya nira se qai lesi oti ga na yadra. Era uvuca na davui,+ era vorovorolaka tale ga na saqa lelevu ni wai era taura tu.+
20 Era uvuca sara na davui na tolu na iwasewase, era vorolaka na saqa lelevu. Era taura e ligadra imawi na cina caucaudre, era uvuca na davui ena ligadra imatau, era qai kailavaka: “Na iseleiwau i Jiova kei Kitioni!”
21 Era duri tu ga ena nodra tikina na tamata yadua nira wavokita tu na keba taucoko, era dro na mataivalu kece, era kaikaila nira dro tiko.+
22 Era uvuca tiko ga na davui na le 300, qai uqeta o Jiova na tamata yadua mera veivakamatei ga vakataki ira ena iseleiwau ena keba taucoko.+ Era dro na mataivalu me yaco i Pecisita, dewa i Sirera, me yaco sara ina ibili kei Epeli-meola,+ volekati Tapaci.
23 Era qai kacivi ira na Isireli o ira na Nafitalai, na Aseri, kei ira kece na Manasa+ mera cicimuri ira na Mitiani.
24 E tala eso na italai o Kitioni ina veiulunivanua kece e Ifireimi mera tukuna: “Moni lako sobu moni ravuti ira na Mitiani, moni yadrava na itatakoso ina wai me yaco sara i Pecipara kei na Joritani.” Era mani lako vata mai na Ifireimi kece mera yadrava na wai me yaco sara i Pecipara kei na Joritani.
25 Era vesuka tale ga e rua na nodra turaga na Mitiani, o Orepi kei Siepi. Era vakamatei Orepi ena vatu nei Orepi,+ era vakamatei Siepi ena ikeliniwaini nei Siepi. Era cicimuri ira tiko ga na Mitiani+ ra qai kauta yani na ulu i Orepi kei Siepi vei Kitioni ena yasayasa na Joritani.
iVakamacala e ra
^ Ipe., “ileu.”
^ Ipe., “kaukaua mai na ligamu.”
^ Rauta na tini na kaloko ena bogi ina rauta na rua ena mataka.
