Esera 3:1-13
3 Ni sa ikavitu ni vula+ nira tiko na Isireli* ena nodra koro, era soqoni ena duavata e Jerusalemi.
2 Sa qai tucake o Jesua+ na luvei Jiosataki kei ira na nona itokani bete, o Serupepeli+ na luvei Salacieli+ kei ira na tacina mera tara na icabocabonisoro ni Kalou ni Isireli, mera cabora kina na isoro kama me vaka e volai ena Lawa e vola o Mosese,+ na tamata ni Kalou dina.
3 Era mani vakaduria na icabocabonisoro ena vanua a tu kina e liu, nira rerevaki ira na lewe ni veivanua era tu voleka,+ era cabora sara kina na isoro kama vei Jiova, na isoro kama ena mataka kei na yakavi.+
4 Era qai marautaka na Soqo ni Valetabanikau* me vaka na ka e volai,+ nira cabora na isoro kama ena veisiga me vakatau ena iwiliwili e lavaki ena siga yadua.+
5 Oti oya era cabora na isoro kama e cabori wasoma,+ na isoro ni vula vou,+ kei na isoro me baleta na soqo tabu kece+ vei Jiova, kei na ka kece era via cabora vei Jiova me isolisoli e vu mai lomadra.+
6 Tekivu mai na imatai ni siga ni ikavitu ni vula+ era tekivu cabora na isoro kama vei Jiova, ni se bera mada ga ni davo na yavu ni valenisoro i Jiova.
7 Era solia na ilavo vei ira na dauta vatu+ kei ira na matai,+ vaka kina na kakana kei na medra, kei na waiwai vei ira na kai Saitoni kei ira na kai Taia nira kauta e wasawasa na kau sitari mai Lepanoni i Jopa,+ me vaka na lewa nei Tui Sairusi e Perisia.+
8 Ena ikarua ni yabaki nira lako ina vale ni Kalou dina e Jerusalemi, ena ikarua ni vula, e tekivutaka na cakacaka o Serupepeli na luvei Salacieli, o Jesua na luvei Jiosataki kei ira na vo ni tacidrau o ira na bete kei ira na Livai, kei ira kece era suka i Jerusalemi nira a kau vakavesu.+ Era lesi ira na Livai era yabaki 20 lako cake mera liutaka na cakacaka ena vale i Jiova.
9 E qai duavata o Jesua, o ira na luvena kei ira na tacina, o Katimieli kei ira na luvena, o ira na luvei Juta mera liutaki ira na cakacaka tiko ena vale ni Kalou dina, vaka kina o ira na luvei Enatati,+ o ira na luvena kei ira na tacina era Livai.
10 Nira vakadavora oti na matai na yavu ni valenisoro i Jiova,+ era duri na bete nira dara nodra isulu vakabete ra qai vakabiukila,+ kei ira na Livai era luvei Esafa nira vakasibali mera vakacaucautaki Jiova me vaka na veidusimaki nei Tui Tevita e Isireli.+
11 Era mani lagasere lesu+ mera vakacaucau mera vakavinavinakataki Jiova “ni yalovinaka, e sega ni mudu na dei ni nona loloma vei ira na Isireli.”+ Era qai kaila kece na lewenivanua, era kaila ena domodra kece nira vakacaucautaki Jiova ni sa vakadavori na yavu ni vale i Jiova.
12 E levu na bete, o ira na Livai, kei ira na iliuliu ni vuvale i tamadra, o ira na qase era raica na vale e liu,+ era tagi ena domolevu nira raica ni sa davo na yavu ni vale, ia e levu tale era kaila ena domolevu nira marau.+
13 Era mani sega ni vakaduiduitaka rawa na lewenivanua na domo ni nodra kaila ni marau kei na domo ni nodra tagi, nira kaila tiko vakadomoilevu na lewenivanua qai rogo yawa sara na kena rorogo.
