Esera 5:1-17
5 Erau parofisai na parofita o Akeai+ kei Sakaraia+ na makubui Ito+ vei ira na Jiu era tiko e Juta kei Jerusalemi ena yaca ni Kalou ni Isireli e tiko mai cake.
2 Erau tekivu tara tale na vale ni Kalou+ e Jerusalemi o Serupepeli+ na luvei Salacieli kei Jesua+ na luvei Jiosataki, e tiko vata kei rau o rau na parofita ni Kalou me rau tokoni rau.+
3 Ena gauna oya e qai lako vei ira o Tatinai na kovana ena yasayasa ni Tai ni Uciwai,* o Sicari-posinai kei ira na nodrau itokani, era tukuna vei ira: “O cei e vakaroti kemuni moni tara na vale qo moni vakaotia na kena bai?”*
4 Era tarogi ira tale: “O cei na yacadra na tamata era tara vale tiko qo?”
5 Ia na Kalou e vakaraici ira* tiko na nodra qase na Jiu,+ era sega ni tarovi ira me yacova ni vakau rawa na itukutuku vei Taraiasi, qai vakau lesu mai e dua na ivola me baleta na tikina qo.
6 Qo na ilavelave ni ivola e vakauta vei Tui Taraiasi o Tatinai na kovana ena yasayasa ni Tai ni Uciwai, o Sicari-posinai kei ira na nona itokani, o ira na ivukevuke ni kovana ena yasayasa ni Tai ni Uciwai,
7 era vakauitukutuku vua, qo na ka era vola:
“Vei Tui Taraiasi:
“Me nomuni na vakacegu!
8 Moni kila na tui ni keimami a lako ina yasana o Juta ina vale ni Kalou rogo, sa tara tu ena vatu lelevu, sa toka na kau ena kena lalaga. Era makututaka na lewenivanua na nodra cakacaka qai toso vinaka tiko ena nodra igu.
9 Keimami qai tarogi ira na nodra qase, keimami kaya: ‘O cei e vakaroti kemuni moni tara na vale qo moni vakaotia na kena bai?’*+
10 Keimami taroga tale ga na yacadra me tukuni vei kemuni, me rawa ni keimami vola na yacadra na tamata era liutaka tiko.
11 “Qo na ka era tukuna vei keimami: ‘O keimami qo na dauveiqaravi ni Kalou ni lomalagi kei na vuravura, keimami tara tale tiko qo na vale se tara ena vica vata na yabaki sa oti, a tara e dua na tui rogo e Isireli qai vakaotia.+
12 Ia nira vakacudruya na Kalou ni lomalagi+ na neimami qase, e soli ira kina e liga i Tui Nepukanesa+ e Papiloni, na Kalitia, e vakarusa na vale+ qo qai kauti ira vakavesu na lewenivanua i Papiloni.+
13 Ena imatai ni yabaki i Tui Sairusi e Papiloni, e qai vakarota o Tui Sairusi me tara tale na vale ni Kalou+ qo.
14 E kauta tale ga mai o Tui Sairusi ena valenisoro e Papiloni na iyaya koula kei na iyaya siliva ni vale ni Kalou a kauta o Nepukanesa mai na valenisoro e Jerusalemi qai kauta ina valenisoro e Papiloni.+ E soli sara vua e dua na turaga na yacana o Sesipasa*+ a lesia o Sairusi me kovana.+
15 E kaya vua o Sairusi: “Mo kauta na iyaya qo. Mo lai biuta ena valenisoro e Jerusalemi, me tara tale na vale ni Kalou ena vanua ga a tu kina.”+
16 Ni yaco mai o Sesipasa qo e vakadavora sara na yavu ni vale ni Kalou+ e Jerusalemi, e tara tiko mai na gauna oya me yacova qo ia se bera ni oti.’+
17 “Ia ke vinaka vua na tui, me vaqaqai mada ena valeniyau ni tui e tiko qori e Papiloni me kilai kina se a vakarota o Tui Sairusi me tara tale na vale ni Kalou e Jerusalemi+ se sega, me qai vakau mai vei keimami na vakatulewa ni tui me baleta na tikina qo.”
iVakamacala e ra
^ Se “Tai ni Uferetisi.
^ Se “kena icoka.”
^ Ipe., “na mata ni nodra Kalou e.”
^ Se “kena icoka.”
