Esera 9:1-15
9 Oti ga na ka kece qo era lako mai vei au na iliuliu, era kaya: “O ira na lewe i Isireli, o ira na bete kei ira na Livai era se sega ga ni tawasei ira mai vei ira na lewe ni veivanua kei na nodra ivalavala sevaki,+ o ira na kai Kenani, o ira na Itaiti, o ira na Perisaiti, o ira na Jepusaiti, o ira na luvei Amoni, o ira na kai Moapi, o ira na kai Ijipita,+ kei ira na Amoraiti.+
2 Era kauta eso na luvedra yalewa me watidra, me watidra tale ga na luvedra tagane.+ Qo sa mai duavata kina na kawa tabu+ kei ira na lewe ni veivanua.+ Era liutaka sara ga na talaidredre qo o ira na turaga kei ira na ivukevuke ni turaga.”
3 Ia niu rogoca ga oya, au dresulaka na noqu isulu kei na noqu isulu balavu tabaleka, au vutia eso na drauniuluqu kei na kumiqu, au dabe ena sokonu.
4 Era qai soqoni mai vei au o ira kece era doka na ka e tukuna na Kalou ni Isireli ena vuku ni nodra talaidredre o ira a kau vakavesu, ia au dabe sokonu tiko ga me yacova ni vakacabori na isoro kakana ena yakavi.+
5 Ni sa cabori na isoro kakana+ ena yakavi, au duri mai ena noqu madua, sa dresulaki tu na noqu isulu kei na noqu isulu balavu tabaleka, au tekiduru au qai dodoka na ligaqu vei Jiova na noqu Kalou.
6 Au kaya: “Kemuni na noqu Kalou, sa dua na ka na noqu madua kei na noqu velavela meu tacake vei kemuni na noqu Kalou, ni sa rui levu na neimami cala e sivia na ulu i keimami, e tubu na neimami talaidredre me yala i lomalagi.+
7 Me tekivu ena nodra gauna na tukai keimami me yacova mai na siga qo, sa rui levu na neimami talaidredre,+ ena vuku ni neimami cakacala, e soli kina na neimami tui, kei ira na neimami bete e ligadra na tui ni veivanua ina iseleiwau,+ mera kau vakavesu,+ mera vakacacani,+ mera vakamaduataki me vaka ga nikua.+
8 Ia ena dua na gauna lekaleka qo e lomani keimami o Jiova na neimami Kalou ni vakavuna mera dro bula eso qai solia vei keimami e dua na vanua dei* ena nona yasana tabu+ me taliva kina na mata i keimami, kemuni na neimami Kalou, me vakaukauataki keimami vakalailai ni keimami tu vakabobula.
9 Ni keimami bobula+ ga, e sega ni biuti keimami na neimami Kalou ni keimami tu vakabobula, ia e dei na nona lomani keimami e matadra na tui Perisia,+ me vakaukauataki keimami tale me keimami vakaduria na vale ni neimami Kalou,+ me keimami tara tale na kena irusarusa qai solia vei keimami na baivatu* e Juta kei Jerusalemi.
10 “Ia qo na cava me keimami tukuna, kemuni na neimami Kalou? Ni keimami sa biuta na nomuni ivakaro
11 oni solia vei keimami ena vukudra na nomuni tamata na parofita, era kaya: ‘Na vanua oni lako tiko kina qori moni taukena e vanua tawasavasava nira sega ni savasava na lewe ni veivanua, nira vakasinaita kina na nodra ivalavala vakasevaki mai na dua na iyalayala ina dua tale na iyalayala ena nodra dukadukali.+
12 Moni kua gona ni soli ira na luvemuni yalewa vei ira na luvedra tagane, se moni kauta mai na luvedra yalewa me nodra na luvemuni tagane,+ moni kua sara ni qara na ka mera vakacegui kina kei na ka mera tikovinaka+ kina, moni kaukaua kina moni kania na ka vinaka ena vanua, moni taukena tale ga na vanua me nodra na luvemuni me tawamudu.’
13 Ena vuku ni ka kece sa yacovi keimami ena neimami cakacala kei na levu ni neimami talaidredre, o kemuni ga na neimami Kalou oni sega ni totogitaki keimami me vaka na neimami cala,+ oni qai vakatara me keimami dro bula na tiko qo,+
14 vakaevei, me keimami beca tale na nomuni ivakaro ni keimami bukia na isema ni vakawati vei* ira na lewe ni veivanua era dau vakayacora na ka vakasevaki+ qo? Oni na sega ni cudruvi keimami vakalevu moni vakarusai keimami vakadua me kua ni dua e vo se bula?
15 Kemuni Jiova na Kalou ni Isireli, oni sa yalododonu,+ ni keimami bula na kena vo me yacova mai na siga qo. Keimami sa tu qo e matamuni ena neimami cakacala, ni keimami sega ni tu rawa e matamuni ena vuku ni ka qo.”+
iVakamacala e ra
^ Ipe., “peki.”
^ Se “na bai ni veitaqomaki.”
^ Se “keimami vakawati veicurumaki kei.”
