Esiteri 1:1-22
1 Ena gauna i Esuerosi,* qo o Esuerosi a lewa e 127 na yasana+ mai Idia me yaco sara i Iciopea,*
2 ena gauna oya ni tiko o Tui Esuerosi ena nona idabedabe vakaturaga mai Susani*+ na vanua viribaiti,*
3 ena ikatolu ni yabaki ni nona veiliutaki a vakarautaka e dua na kanavata mera tiko kece kina na nona tamata turaga kei ira na nona dauveiqaravi. Era mai tu e matana na mataivalu ni Perisia+ kei Mitia,+ o ira na turaga lelevu kei ira na turaga ni veiyasana,
4 e vakaraitaka vei ira na iyau ni nona matanitu lagilagi, na veika totoka, kei na veika talei e dau divi kina me vicasagavulu na siga, e 180 na siga.
5 Ni cava na gauna oya, e vakarautaka na tui e dua na kanavata me vitu na siga vei ira kece na tiko mai Susani* na vanua viribaiti,* o ira na vetaicake kei ira na vetaira, ena lomanibai ni banisenikau ni valenitui.
6 E buki na isulu lineni, na isuludina, kei na isulu karakarawa ena dali lineni matailalai, na vutinisipi lokaloka ena mama siliva, na duru mapolo, na idavodavo koula kei na siliva ena buturara e caka ena vatu damudamu, ena mapolo, ena mataniciva, kei na mapolo loaloa.
7 E veisoliyaki na waini ena bilo koula, e duidui na bilo yadua, e levu sara na waini vakaturaga me vaka ga na ka e rawata na tui.
8 E sega ni dua e vakasaurarataki me gunu me vaka na ivakaro, ni veivosakitaka na tui kei ira na vakailesilesi ni valenitui mera dui cakava ga na ka era vinakata.
9 E vakarautaka tale ga o Ranadi Vasitai+ e dua na nodra kanavata na yalewa ena vale vakaturaga i Tui Esuerosi.
10 Ena ikavitu ni siga, ni marau sara tu ga na tui ena waini e tukuna vei Meumani, Piseca, Apona,+ Pikica, Epakica, Seca, kei Kakasi, o ratou na vitu na vakailesilesi eratou qaravi Tui Esuerosi tiko,
11 me ratou kauti Ranadi Vasitai yani e matana na tui ni vakaiubiniulu* ni ranadi, me vakaraitaka na nona matavinaka vei ira na lewe ni veivanua kei ira na turaga, ni marama totoka.
12 Ia e bese tiko ga ni lako yani o Ranadi Vasitai ena ivakaro ni tui eratou lai vakasavuya na vakailesilesi. E cudru vakalevu na tui ni rogoca qori, dua na ka na katakata ni lomana.
13 E qai kaya na tui vei ira na turaga vuku era kila na ka e dau caka* (ni ka e via kila na tui ena tarogi ira kece era kila vinaka na lawa kei na veika vakalawa,
14 eratou volekati koya sara o Kasena, o Sica, o Etimaca, o Tasisi, o Meresi, o Masena, kei Memukani, e vitu na turaga+ ni Perisia kei Mitia eratou dau lako wasoma vua na tui, eratou vakaitutu levu ena matanitu).
15 E taroga na tui: “Na cava e tukuni ena lawa me caka vei Ranadi Vasitai ni sega ni muria na ivakaro nei Tui Esuerosi eratou vakasavuya na vakailesilesi?”
16 E tukuna o Memukani vua na tui kei ira na turaga: “E sega wale ga ni cala vua na tui o Ranadi Vasitai,+ e cala tale ga vei ira kece na turaga kei ira kece na lewe ni veivanua era tiko ena yasana kece e lewa o Tui Esuerosi.
17 Nira na kila na yalewa vakawati kece na ka e cakava na ranadi, era na beci watidra nira kaya, ‘E kaya o Tui Esuerosi me kau yani vua o Ranadi Vasitai qai bese ni lako.’
18 Ena siga qo nira rogoca na watidra na turaga e Perisia kei Mitia na ka e cakava na ranadi, era na tukuna vei ira kece na nona tamata turaga na tui, ena levu kina na veibeci kei na veicudruvi.
19 Ke donu vei kemuni na tui, me dua na nomuni ivakaro vakatui me volai ena lawa ni Perisia kei Mitia me kua sara ni boko,+ me kua tale ni lako yani o Vasitai vei Tui Esuerosi, me solia na nona itutu vakaranadi vua e dua tale na marama e vinaka sara vua.
20 Ni rogoci na lawa e vakatura na tui ena nona matanitu taucoko, era na doka na watidra o ira kece na yalewa vakawati, o ira na vetaicake kei ira na vetaira.”
21 E taleitaka na vakatutu qori na tui kei ira na turaga, e cakava sara na tui na ka e tukuna o Memukani.
22 E mani vakauta o koya na ivola ina dui yasana,*+ ina yasana yadua ena kena ivolavolai, vei ira na lewe ni veivanua ena nodra dui vosa, mera lewa* na nodra dui vuvale na tagane vakawati kece, mera vosa tiko ga ena nodra dui vosa.
iVakamacala e ra
^ Nanumi ni o Kisekise na iMatai, na luvei Taraiasi na Ka Levu (Taraiasi Isitasepisi).
^ Se “Kusi,”
^ Se “Susa.”
^ Se “valenitui, koronivalu.”
^ Se “valenitui, koronivalu.”
^ Se “Susa.”
^ Se “ivauniulu.”
^ Se “ituvatuva.” Ipe., “veigauna sa oti.”
^ Ipe., “veiyasana e lewa na tui.”
^ Se “turaga.”
