Esiteri 2:1-23
2 Oti na ka kece qo, ni sa ruru na cudru nei Tui Esuerosi+ sa qai nanumi Vasitai kei na ka e cakava,+ vaka kina na ka sa vakatulewataki me baleti koya.+
2 Era qai tukuna na dauveiqaravi ni tui: “Mera vaqarai na goneyalewa* totoka me nona na tui.
3 Me lesia na tui eso na italai ena yasana kece ni nona matanitu+ mera soqoni ira vata yani na goneyalewa totoka kece i Susani* na vanua viribaiti,* ina nodra vale na yalewa e lewa tiko o Ikai+ na vakailesilesi liu* ni tui, e dau vakatawai ira na yalewa, mera sauni tale ga.
4 Na goneyalewa e taleitaka vakalevu na tui ena ranadi me sosomitaki Vasitai.”+ E taleitaka na tui na vakatutu qori mani vakayacora.
5 E tiko mai Susani* na vanua viribaiti* e dua na turaga, e Jiu,+ na yacana o Motekai+ na luvei Jairi na luvei Semeai na luvei Kisi na Penijamini,+
6 a kau vakavesu mai Jerusalemi kei ira na lewenivanua era vakasavi vata kei Tui Jekonaia*+ e Juta, o koya a kauta vakavesu o Tui Nepukanesa e Papiloni.
7 E susugi Etasa,* oya o Esiteri na luvei wekai tamana,+ ni sega tu na tamana kei na tinana. E goneyalewa totoka qai matavinaka, ni rau mate o tamana kei tinana e qai kauti koya o Motekai me luvena.
8 Ena gauna e vakarogoi kina na vosa ni tui kei na nona lawa, era kumuni yani e levu na goneyalewa e Susani* na vanua viribaiti* me vakatawai ira o Ikai, e kau tale ga yani o Esiteri ina valenitui me vakatawai koya o Ikai+ na nodra ivakatawa na yalewa.
9 E taleitaka sara ga o koya na goneyalewa qori qai lomani* koya, e mani vakarota totolo me sauni,+ me soli vua na kakana digitaki, e lesia vua e vitu na goneyalewa eratou digitaki mai na valenitui. E tokitaki koya tale ga kei ratou na goneyalewa dauveiqaravi ina vanua vinaka duadua ena nodra vale na yalewa.
10 A sega ni tukuna o Esiteri e dua na ka me baleti ira na kainona+ se o ira na wekana, ni a vakaroti koya o Motekai+ me kua ni tukuna.+
11 E dau lako tiko e veisiga o Motekai ena mata ni rara ni nodra vale na yalewa me kila se vakacava tiko o Esiteri, kei na ka e yaco vua.
12 Era dau lako yadua na goneyalewa vei Tui Esuerosi ni sa cava na 12 na vula era sauni tiko kina me vaka e vakaroti vei ira na yalewa, qori na balavu ni gauna mera sauni tiko kina, e ono na vula ena waiwai mura,+ e ono tale na vula ena waiwai vakaisaluaki+ kei na veimataqali ilumu mera sauni* kina.
13 Ni sa vakarau lako vua na tui na goneyalewa, ena soli vua na ka kece e kerea ni biubiu mai na nodra vale na yalewa me lako ina valenitui.
14 Ena lako yani ena yakavi qai lesu ena mataka ina ikarua ni nodra vale na yalewa e lewa o Seasikasi na vakailesilesi liu ni tui,+ e dau vakatawani ira na watina lalai. Ena sega ni lako tale vua na tui na goneyalewa vakavo ke vinakati koya tale na tui qai kacivi na yacana.+
15 Ni sa kena gauna me lako vua na tui o Esiteri, na luvei Epaieli na wekai Motekai a kauta me luvena,+ a sega ni kerea e dua na ka, a kauta ga na ka e tukuna o Ikai na nona vakailesilesi liu na tui, na nodra ivakatawa na yalewa. (Ena gauna kece qori era taleitaki Esiteri tiko ga o ira kece na raici koya.)
16 E kau o Esiteri vei Tui Esuerosi ena nona vale vakatui ena ikatini ni vula, oya na vula o Tipeci,* ena ikavitu ni yabaki+ ni nona veiliutaki.
17 E domoni Esiteri vakalevu na tui ni vakatauvatani kei ira na vo ni yalewa, e taleitaki koya qai lomani* koya vakalevu vei ira na vo ni goneyalewa. E ubi koya sara ena iubiniulu* ni ranadi qai buli koya me ranadi+ me sosomitaki Vasitai.+
18 E vakarautaka na tui e dua na kanavata levu mera tiko kece kina na nona tamata turaga kei ira na nona dauveiqaravi, na kanavata me baleti Esiteri. E tukuna mera sereki o ira ena veiyasana qai soli iloloma tiko ga me vaka na ka e rawata na tui.
19 Ia nira soqoni vata na goneyalewa+ ena ikarua ni gauna, e dabe tiko o Motekai ena matamata ni tui.
20 E sega ni tukuna o Esiteri na ka me baleti ira na wekana kei ira na kainona+ me vaka e vakaroti koya kina o Motekai, e cakava tiko ga o Esiteri na ka e tukuna vua o Motekai me vaka ga na gauna e susugi koya kina.+
21 Ena gauna oya ni dabe tiko o Motekai ena matamata ni tui, erau cudru o Pikicani kei Teresi, e rua na vakailesilesi ni tui, erau ivakatawa ni katuba, rau qai saga me rau vakamatei Tui Esuerosi.
22 Ia e kila qori o Motekai, e tukuna totolo sara vei Ranadi Esiteri. E mani tukutuku vua na tui o Esiteri ena yaca i Motekai.
23 E vaqaqai gona na leqa qori qai kilai, rau mani vakaliligi ruarua ena kau, e volai na ka kece qo ena ivolatukutuku ni gauna oya e matana na tui.+
iVakamacala e ra
^ Se “sega ni taratagane.”
^ Se “Susa.”
^ Se “valenitui, koronivalu.”
^ Ena vosa vakaIperiu, qo e dua e sele na nona iyaya vakatagane.
^ Se “valenitui, koronivalu.”
^ Se “Susa.”
^ Kena ibalebale “Mateli.”
^ Se “valenitui, koronivalu.”
^ Se “Susa.”
^ Se “dei ni lomani.”
^ Se “masi.”
^ Se “dei ni lomani.”
^ Se “ivauniulu.”