Esiteri 3:1-15
3 Oti qo e tosoya cake o Tui Esuerosi na itutu i Emani+ na luvei Emitaca na kai Ekaki,+ e vakacerecerea na nona idabedabe vei ira na vo ni turaga era tiko vata kei koya.+
2 Era dau lolou ra qai tekicuva vei Emani o ira kece na dauveiqaravi ni tui era tiko ena matamata ni tui, ni vakarota na tui mera cakava qori vua. Ia o Motekai e sega ni lolou se tekicuva vua.
3 Era kaya vei Motekai na dauveiqaravi ni tui era tiko ena nona matamata na tui: “Na cava o beca tiko kina na ivakaro ni tui?”
4 Era dau tarogi koya e veisiga, e sega ga ni rogoci ira. Era qai tukuna vei Emani me raica se na va tiko ga qori o Motekai se sega,+ ni tukuna vei ira ni dua na Jiu+ o koya.
5 Ni raica o Emani ni sega ni dau lolou se tekicuva vua o Motekai, dua na ka na cudru katakata nei Emani.+
6 Ia e ka beci vua me vakamatei Motekai duadua, nira sa tukuna oti vua na ka me baleti ira na wekai Motekai. E qai saga o Emani me vakawabokotaki ira kece na Jiu era tiko ena matanitu taucoko nei Esuerosi, qo o ira na kaivata kei Motekai.
7 Ena imatai ni vula, oya na vula o Naisani,* ena ika12 ni yabaki+ i Tui Esuerosi, era vakawiri Puri+ (oya na Madigi) e mata i Emani me kilai kina na siga kei na vula, e mani lutu na madigi ena ika12 ni vula, oya o Eta.*+
8 E tukuna sara o Emani vei Tui Esuerosi: “E tiko e dua na matatamata era veiseyaki ra qai veituyaki vei ira na lewe ni veivanua+ ena yasana kece ni nomuni matanitu,+ e duidui na nodra lawa vei ira kece na vo ni lewe ni veivanua, era sega tale ga ni muria na nomuni lawa na tui, e sega ni vinaka vei kemuni na tui moni biuti ira tu va qori.
9 Ke vinaka vei kemuni na tui, me volai mada e dua na lawa mera vakarusai. Au na sauma e 10,000 na taledi siliva* vei ira na vakailesilesi me biu ena valeniyau ni tui.”*
10 E luvata sara na tui nona mama vakaturaga+ mai ligana qai solia vei Emani+ na luvei Emitaca na kai Ekaki,+ na kedra meca na Jiu.
11 E kaya na tui vei Emani: “Sa soli vei iko na siliva kei ira na tamata, mo cakava vei ira na ka e vinaka vei iko.”
12 Era kacivi sara mai na nona vunivola na tui+ ena imatai ni vula ena ika13 ni siga. Era vola+ na ka kece e vakarota o Emani vei ira na vakailesilesi liu ni nona yasana na tui kei ira na kovana era lewa tiko na dui yasana, kei ira na turaga ni dui matatamata, ina dui yasana ena kena ivolavolai vei ira na lewe ni veivanua ena nodra dui vosa. E volai ena yaca i Tui Esuerosi qai dregati ena mama vakaturaga.+
13 Era kauta na ivola na italai ena yasana kece e lewa na tui, e vakarota mera vakawabokotaki, mera vakamatei, mera vakarusai na Jiu kece, o ira na gone kei ira na qase, o ira na lalai kei ira na yalewa ena dua ga na siga, ena ika13 ni siga ena ika12 ni vula, oya na vula o Eta,+ me tauri tale ga na nodra iyau.+
14 Me veisoliyaki na ilavelave ni ivola me lawa ena veiyasana kece, me vakarogoi vei ira kece na lewe ni veivanua mera vakarautaki ira ena siga qori.
15 Era vakusakusa na italai+ ena ivakaro ni tui, e soli na lawa mai Susani*+ na vanua viribaiti.* E dabe na tui kei Emani me rau gunu, ia era veilecayaki na lewenikoro o Susani.*
iVakamacala e ra
^ Se rawa ni, “Au na saumi ira na cakava qo ena 10,000 na taledi siliva me biu ina valeniyau ni tui.”
^ Se “Susa.”
^ Se “valenitui, koronivalu.”
^ Se “Susa.”
